2
Shawlumon Hpe Dawi Shatsam Ai Lam
1 Ya Dawi si na nhtoi du magang ra ai rai nna, shi gaw kasha Shawlumon hpe,
2 “Ngai gaw n-gawn shawa lam de sa wa na ni ai: dai rai nna, nang gaw n-gun atsam rawng nna, marai ningja shapraw nga u.
3 Nang shang hkawm wa ai lam shagu hta e awng wa lu hkra, Mawshe a tara hta ka da nga ai hte maren, na a Karai Kasang Yehowa hkang da ai ga, tara dara ai hku hte sakse ga hkan shatup nga u;
4 shing rai, Na nshu nsha ni sadi sahka nga nna, tengman ai hku hkan let, tinang a kraw lawang mahkra hte, myit masin mahkra hte, nye a man e hkawm nga ma yang, Israela mungdan tingnyang hta, na a aru arat kaw na langai mi matut manoi dung nga na ra ai, nga nna Yehowa ngai hpe tsun dan ai ga hpe shadik ya na ra ai.
5 Dai hta kaga, Zeruia kasha Yoab ngai hpe galaw ai lam nang chye nga ndai; shi gaw Nira a kasha Abna hte Yehtera kasha Abasa ngu ai, Israela hpyen du lahkawng hpe sat kau nna, hpyen majan n nga timung asai jahkaw kau ai hte, shi a nshang na shingkyit hpe mung, shi a lagaw na kyepdin hpe mung, majan sai shakap wu ai.
6 Nang hpaji lu ai hte maren shi hpe tai nna, ngwipyaw baw hpraw ai hte katsan ga de hkum yu wa shangun u.
7 Gilead masha Barazili a kashu kasha ni hpe nang chyeju madun dan u ga; shanhte gaw na a sha ku e sha ai ni hta lawm nga mu ga: ngai na nhpu Absalom gaw na hprawng wa yang, shanhte dai lam e ngai hpe sa tau la ma ai.
8 Bai yu u, Ngai Mahana-im de yu wa ai shani jang, n hkru la ai dagam ga hte ngai hpe sa dagam kau ai, Balurim kahtawng na, Ben-yamin amyu Gera a kasha Shimi mung, nang hte rau anga nga ai; shi chyawm gaw Yawdan hka kau e ngai hpe sa tau la ai majaw, Ngai nang hpe nhtu hte n sat kau na nngai, ngu nna Yehowa amying gang let ngai shi hpe dagam da se ai.
9 Nang hpaji rawng ai wa rai nga ndai majaw, dai wa mara n kap ai zawn hkum nawn et; nang shi hpe kaning di matai dawp na nang chye nga ndai: shi a baw hpraw hpe katsan ga de asai hte yu wa shangun u,” ngu nna htet da wu ai.
10 Shing rai Dawi gaw kaji kawa ni hte rau yup pyaw nna, Dawi a mare hta e makoi mayang di kau mu ai.
11 Dawi gaw Israela masha ni hpe up hkang ai aten mali shi ning rai nga ai: shi gaw Hebron mare hta e sanit ning, bai, Yerusalem mare hta e sumshi masum ning hkaw dung nga ai.
12 Shing rai Shawlumon gaw kawa Dawi a tingnyang hta dung nga ai rai nna, shi a mungdan nachying jat grin wa nga ai.
Shawlumon Hkawhkam Hkaw Shachyaw Ai Lam
13 Dai shaloi e Hagit a Kasha Adoniya gaw Shawlumon a kanu Batsheba hpang de sa wu ai. Batsheba gaw, “Nang ngwipyaw lam hte sa n ni?” ngu nna san wu yang, Shi gaw, “Ngwipyaw hte sa nngai,” ngu nna htan wu ai.
14 Bai shi gaw, “Ngai tsun shara lama ni lu nngai,” nga ai; Batsheba mung, “Tsun u,” ngu wu ai.
15 Shaloi shi gaw, “Nang chye nga ai hte maren, dai mungdan gaw nye a mungdan rai nga nna, ngai hkaw dung na, Israela masha ni nlang ngai hpang de myi man yawng wa masai; rai timung ban galai nna, mungdan gaw ngai nau wa a mungdan tai wa sai: dai lam gaw Yehowa a myit rai nga ai.
16 Ya chyawm gaw lam langai mi ngai nang hpe hpyi de ga; hkum ndang kau et,” ngu wu yang, Batsheba gaw, “Tsun u,” ngu wu ai.
17 Shaloi Adoniya gaw, “Hkawhkam Shawlumon Shunem num Abishaga hpe ngai e ya u ga, hpyi ya mi; shi nang hpe ndang kau na n rai,” ngu nna, tsun wu ai.
18 Batsheba gaw, “Mai sa, ngai na a lam hkawhkam wa hpe tsun ya na nngai,” ngu wu ai.
19 Shing rai Batsheba gaw Adoniya lam sa tsun na matu, hkawhkam Shawlumon hpang de shang wa sai. Hkawhkam wa gaw shi hpe tau la na nga, rawt nna, shi a man e gum dagup nhtawm, shi a tingnyang hta dung nga ai; hkawhkam wa a kanu a matu mung tingnyang langai mi shi tawn da nna, kanu gaw shi a hkra maga e dung nga ai.
20 shaloi kanu gaw, “Lam kaji sha mi ngai nang hpe hpyi de ga; hkum ndang kau ya et,” ngu wu yang, hkawhkam wa gaw, “Nu e, hpyi e, ngai ndang kau na nngai n rai,” ngu wu ai.
21 Bai kanu gaw, “Shunem num Abishaga hpe na nhpu Adoniya hpe ya sha gaw,” ngu wu ai.
22 Shaloi hkawhkam Shawlumon gaw, “Nang hpa majaw Adoniya matu Shunem num Abishaga hpe sha hpyi n ta? dai mungdan mung shi a matu hpyi u ga; shi gaw ngai hpu rai nga ai majaw, shi a matu mung, hkinjawng Abiahta yan Zeruia kasha Yoab a matu mung hpyi u ga,” ngu nna kanu hpe htan wu ai.
23 Bai hkawhkam Shawlumon gaw, “Adoniya asak sum na matu, ndai ga n tsun ai teng yang gaw, Karai Kasang dai hta grau nna ngai hpe deng u ga:
24 ga ndat tawn da ai hte maren ngai hpe shagrin da nna, nye wa Dawi a tingnyang hta dung nga shangun ai hte, ngai hpe dinghku arai ya ai Yehowa hkrung nga ai hte maren, Adoniya gaw gaja wa teng teng dai ni jang asak sum na ra ai,” ngu nna Yehowa amying gang let dagam wu ai.
25 Shing rai hkawhkam Shawlumon Yehoiada kasha Benaia hpe shangun dat nna, shi gaw Adoniya hpe adup sat kau wu ai.
26 Bai hkawhkam wa gaw hkinjawng Abiahta hpe, “Na a buga Anahtut mare de bai wa su; nang si ging ai wa rai nga ndai: rai timung nang gaw nye wa Dawi a man e Madu Yehowa a sumpu hpai ndai hte, nye wa hkrum sha ai yawng hte hta nang mung sha ndai majaw, dai ni ngai nang hpe sat mayu de ai n rai,” ngu nna tsun dan ai ga dat wu ai.
27 Shing ra, Yehowa gaw Shilo mare e Kli a amyu matu ni a lam tsun dan ai ga dik wa u ga, Shawlumon gaw Abiahta hpe Yehowa hkinjawng aya hta na jahkrat kau wu ai.
28 Dai shiga gaw Yoab hpang de du nna, shi gaw Absalom kaw n hkan nang ai sha, Adoniya kaw hkan nang ai majaw, Yehowa nawku Sum de hprawng nhtawm, tawn hkungri na jut nrung ni hpe sa jum nga ai.
29 Shing rai, “Yoab gaw Yehowa nawku Sum de hprawng nna, tawn hkungri makau e nga nga ai,” ngu nna hkawhkam Shawlumon hpe shana ya wu ai. Shaloi Shawlumon gaw Yehoiada kasha Benaia hpe shangun nna, “Shi hpe sa sat kau u,” ngu nna hkang da wu ai.
30 Benaia gaw Yehowa nawku Sum de sa nna, “Yoab hpe, Hkawhkam wa, Wa rit, nga ai,” ngu wu yang, shi gaw, “ngai n wa na nngai, nang e she si na nngai,” ngu wu ai. Benaia mung wa nna, “Yoab gaw ning nga ai hte ngai e htan ya ai,” ngu nna hkawhkam wa hpe shana ya wu ai.
31 Hkawhkam wa mung, “Shi tsun ai hte maren galaw u: mara n kap ai sai shi jahkaw ai gaw, ngai hte nye wa nta na shaprai kau na matu, shi hpe sat nhtawm lup makoi kau u.
32 Shi gaw, shi hta grau dinghpring nna kaja nga ai marai lahkawng hpe nhtu hte sat kau ru ai rai nna, nye wa Dawi dai lam n chye wu ai majaw, Yehowa gaw dai sai hpe shi baw ntsa e bai htang bun nu ai; dai yan lahkawng gaw, Israela luksuk ni a hpyen du Nira a kasha Abna hte Yuda luksuk ni a hpyen du Yehtera kasha Amasa rai ma ai.
33 Shing rai dai yan a sai gaw Yoab a baw ntsa e mung shi a amyu matu ni a baw ntsa e mung, tutnawng prat dingsa anga nga na ra ai: Dawi a ntsa e mung, shi amyu matu ni, shi a nta na ni hte shi a tingnyang ntsa e mung, Yehowa kaw na ngwipyaw ai gaw tutnawng prat dingsa anga nga na sai law,” ngu nna Benaia hpe tsun wu ai.
34 Shaloi Yehoiada kasha Benaia lung wa nna shi hpe adup sat kau wu ai; shi hpe mung, nam mali na tinang a nta hta makoi mayang di mu ai.
35 Shing rai hkawhkam wa gaw, shi a malai luksuk ni a ntsa e Yehowiada kasha Benaia hpe san tawn da wu ai; bai hkawhkam wa gaw, Abiahta a malai hkinjawng Zadok hpe san tawn da wu ai.
36 Shaloi hkawhkam wa gaw Shimi hpe shaga la nna, “Yerusalem hta e nta gap u; dai de anga nga nna, kanang mung hkum pru et.
37 Gara shani hta e rai ri mung nang pru hkawm wa nna, Kidron hkaraw e rap wa yang, nang teng teng si lu na ndai, dum chye nga u: na a sai gaw na a baw ntsa e rai na ra ai,” ngu nna shi hpe tsun wu ai.
38 Shimi gaw, “Mai sa, nye madu hkawhkam wa tsun ai hku, na a mayam wa hkan galaw na nngai,” ngu nna hkawhkam wa hpe tsun nem nhtawm, nhtoi tsawmra na hkra Yerusalem e anga nga ai.
39 Dai hpang masum ning lai yang, Shimi a mayam lahkawng, Gat a hkawhkam Mahka a kasha Ahkisha hpang de hprawng shang ma ai. Shanhte gaw, “Yu u, na a mayam yan Gat a mare e nga nga ma ai,” ngu nna shi hpe tsun mu ai.
40 Shaloi Shimi rawt nhtawm, shi a lawze byau nna, mayam yan hpe tam na Gat a mare na Ahkisha kaw du bang wa ai rai nna, shi a mayam yan hpe Gat a mare na woi wa mu ai.
41 Ya Shimi gaw Yerusalem mare nna, Gat a mare de sa nhtawm bai wa ai lam, Shawlumon hpe shana ya mu ai.
42 Dai re ai majaw hkawhkam wa gaw Shimi hpe shaga la nna, “Nang kanang pru hkawm wa yang, pru ai shani jang nang teng teng si lu na ndai, dum chye nga u, ngu nna, Yehowa amying gang let, ngai nang hpe dagam ginhtim da ni ai n rai ni? Nang mung nye man e nem nna, nye ga hkap la ya nit dai.
43 Dai rai yang, Yehowa man e dagam ai ga hpe mung, ngai dagam ai ga hpe mung hpa majaw tawt lai kau a ta?” ngu nna daru ku wu ai.
44 Bai hkawhkam wa gaw Shimi hpe, “Na kraw lawang na n hkru ai lam yawng, nye wa Dawi hpe nang madun dan ndai gaw nang nan chye nga ndai: dai re ai majaw Yehowa dai lam ni hpe na baw ntsa e bai tai na ra ai.
45 Hkawhkam Shawlumon chyawm ga gumring gumrat lu la nna, Dawi a tingnyang gaw Yehowa a man e tutnawng prat dingsa agrin nga na ra ai,” ngu nna kahtap tsun wu ai.
46 Shing rai hkawhkam wa gaw Yehoiada kasha Benaia hpe hkang da nna, shi pru nhtawm Shimi hpe adup sat kau wu ai. Dai mungdan chyawm gaw Shawlumon lata hta agrin nga ai.