18
Di bu Sama Kaw Na Sharin La Ai Lam
1-2 Yehowa kaw na Yeremia hpang de du ai mungga gaw: Rawt u, dibu sama a nta de yu wa su; dai yang e ngai nang hpe ga shana ya na de ai.
3 Shaloi ngai gaw dibu sama a nta de yu wa nna, yu u, dai wa gaw tinang a htang hta amu galaw nga ai.
4 Ga kagam hte galaw ai dibu gaw, sama a lata hta ga mat ai rai yang, dibu sama gaw, myit ra ai hte maren, dibu kaga bai galaw nga ai.
5 Shaloi Yehowa a mungga ngai kaw du nna, Yehowa ning nga ai:
6 Israela dap e, dibu sama zawn, ngai nanhte hpe n galaw lu na rai i? Israela dap e, yu u, ga kagam gaw dibu sama a lata hta rai nga ai zawn, nanhte gaw nye a lata hta rai nga myit dai.
7-8 Gara amyu, gara mungdan hpe, baw kau na, run kau na hte jahten shabyak kau na matu, ngai tsun nga yang, ngai lakap nna tsun ai amyu gaw, tinang a n hkru ai lam hpe kau da yang, ngai myit malai lu nna, shanhte hpe jaw na maw ai ari hpe n jaw na nngai.
9-10 Gara amyu, gara mungdan hpe, gaw da na hte hkai da na matu, ngai tsun nga yang, shanhte gaw nye a ga hpe n madat ai hte, nye a man e n hkru ai amu galaw nga ma yang, ngai myit malai nna, shanhte hpe tsun ai chyeju madun dan na n rai.
11 Dai re ai majaw, ya Yehowa ning nga ai: Yu mu, ngai nanhte a lam n hkru ai hku maw nna, nanhte a matu tsin-yam mazing da nngai: ya langai hte langai tinang a n hkru ai lam hta na kayin wa mu; nanhte a htung hking hte arawn alai hpe shading mu, ngu nna Yuda mung na ni hte Yerusalem masha ni hpe htawn tsun u, nga ai.
12 Shanhte mahtang, Lam n la ai; anhte ra ai hku anhte hkan sa nna, langai hte langai tinang myit ja ai hte maren galaw na ga ai, nga ma ai.
13 Dai re ai majaw Yehowa ning nga ai:
Dai zawn re ai amu kadai na yu ai kun?
ngu nna maigan amyu ni
hpe san yu mu: Israela shayi
hkawnsek gaw, grai n tsawm ai
amu galaw nu ai.
14 Lebanon bum na hkyen gaw,
pa ga na nlung hpe n madit na a ni?
tsan ai kaw nna lwi ai
katsi ai hka gaw,
hkyet mat lu na rai ni?
15 Nye a amyu masha ni mahtang,
ngai hpe malap kau ma ai;
hpa n re ai hpara ni a man e
manam pyaw ai baw nat
nawng ma ai: moi kaw nna
hkan ai nmaw lam hta
shanhte kataw wa nna,
n lajang yu ai lam masun ni hta
yit mat ma ai:
16 shing rai shanhte a mungdan gaw
katsi katsang shara hte,
tutnawng asawng shara tai nga ai;
dai lam lai ai ni yawng mayawng
mau mat nna tinang a
baw kanga na mara ai.
17 Ngai gaw, sinpraw nbung hte zawn,
hpyen ni a man e shanhte hpe
kamawng kau na nngai:
shanhte ru tsang hkrum ai
shani e myi man n rai, shingdu hkrai,
shanhte hpe madun na nngai.
18 Shaloi shanhte gaw, Sa marit; Yeremia hpe hpaji daw ga; hkinjawng wa hte tara, hpaji rawng ai wa hte hpaji daw ai ga, myihtoi wa hte myihtoi ga, htum mat na n rai; sa marit; shinglet hte shi hpe kayat gaw; shi a ga langai mi muk n madat ga, nga nna tsun ma ai.
19 Yehowa e, ngai hpe mada yu e; ngai hte dangrang hkat ai ni a ga hpe, matsing u.
20 Kaja ai a malai n kaja ai, htang mai a ni? shanhte gaw nye a asak matu nhkun htu masai: shanhte kaw na, na a pawt kahtet ai myit dawm mat hkra, shanhte a akyu matu tawngban let, na a man e ngai tsap nga ai hpe dum nga u.
21 Dai re ai majaw, shanhte a kashu kasha ni hku wa hkrum nna, shanhte hkum nan ri nhtu hte si mu ga: shanhte a num ni gaw, maudung dung nna, gaida tai mu ga; dinghku la ni sat kau ai hkrum nna, shabrang ni gaw, hpyen gasat kaw ri nhtu hte si mu ga.
22 Hpyen luksuk ni hpe, nang shanhte hpang de alawan jashawn ai majaw, shanhte a nta ni kaw na shabam ai nsen, ngoi pru u ga: kaning rai nme law, ngai hpe hkam na matu, shanhte nhkun htu masai: ngai sa wa ai lam hta, mahkam up da mu ai.
23 Nang chyawm gaw Yehowa e, ngai hpe sat kau na nga, shanhte hpaji daw ai lam yawng, nang chye nga ndai; shanhte a shut hpyit ai hpe hkum dat kau et; shanhte a yubak hpe na a man na hkum arut kau et; na a man e shanhte htum mat mu ga; nang pawt bu ai aten e shanhte hpe dawdan mu.