14
Jan Gri Ai Lam, Hku Hku Ai Lam, Nhtu Hpyen A Lam
1-2 Jan gri ai lam lakap nna, Yeremia kaw du ai Yehowa mungga gaw:
Yuda mung sharung shayawt nga nna,
de a mare chyinghka ni
gawng kya nga ma ai;
mung masha ni gaw chyang ai
hpun palawng bu hpun let
ga hta dung nga nna,
Yerusalem masha ni hkrap
shabam ai nsen lung wa sai.
3 Arawng lu ai ni tinang a ma ni hpe
hka ja shangun nna, shanhte
ntsin htung de du jang
ntsin n mu ma ai; dibu kaman sha hte
bai nhtang wa ma ai; shanhte baw
htinggrum let kaya kahpa hte
mak mat ai hkrum ma ai.
4 Jan gri nna, ga ga kaprang ai majaw,
hkauna galaw ai ni gaw
tinang baw htinggrum let kaya dum ma ai.
5 Pa ga e hkalung woi ai ashan gaw,
ushat n nga ai majaw, kasha hpe
kau da nga ai.
6 Lawze nhprang ni gaw, krin ai
kawng ni a ntsa e tsap let,
nam gwi zawn nbung hpe
marawp ma ai: namlaw namlap
n nga ai majaw, shanhte a
myi amam mat sai.
7 Yehowa e, anhte a shut hpyit ai
mara gaw, anhte a lam sakse
hkam timung, na a amying nsang hpe
tau yu nna, naw sharang u law;
anhte law law lang htak mat saga ai;
nang hpe shut kau saga ai.
8 Israela amyu a myit mada ai
wa ru tsang hkrum ai aten e,
Hkye hkrang la ai wa e, nang gaw
ndai mung hta manam hte,
shana shalai na dabang tam ai
malet nhprang wa zawn, hpa majaw
tai nga n ta?
9 Mak mat ai wa hte, n mawai la lu ai
share wa zawn, hpa majaw tai nga n ta?
gaja wa, Yehowa e, nang gaw
anhte a ka-ang e shanu nga ndai;
anhte gaw na a mying hte
shamying ai ni tai saga ai;
anhte hpe hkum kau da mi law.
10 Yehowa gaw ndai amyu masha ni hpe ning nga tsun ai: Shanhte nwan hkawm na sharawng ma ai; tinang a lagaw hpe n hkang ma ai; dai majaw Yehowa shanhte hpe n ra nga ai; ya shi gaw shanhte a shut hpyit ai hpe dum nna, shanhte a yubak majaw ari ahpri jaw na ra ai.
11 Bai Yehowa ngai hpe ning nga ai: Ngamu ngamai lu la hkra, ndai amyu a matu akyu hkum hpyi et;
12 shanhte lusha gam yang, shanhte a hpyi jahtau ai hpe ngai madat na n rai; shanhte a wan nat hkungga hte lusha hkungga hpe, ngai hkap la na n rai; ngai gaw, nhtu tsin-yam, kawsi hpang gara ai, ana zinli hte shanhte hpe shamyit kau na nngai.
13 Dai rai nna ngai gaw, Aga, Madu Yehowa e, myihtoi ni mahtang, Nanhte nhtu hkrum na n rai, kawsi hpang gara mung hkrum na n rai; ngai gaw ndai yang e nanhte hpe tut ngwipyaw nga shangun na nngai, nga nna shanhte hpe hkaw tsun ma ai, nga nngai.
14 Shaloi Yehowa gaw, Dai myihtoi ni nye a mying gang nna, masu ga htoi ma ai; ngai shanhte hpe shangun ai n rai, hkang da ai mung n rai, shingran madun ai mung n rai: shanhte nanhte hpe htoi ai lam gaw, masu ai shingran, shaba wawt ai ga, myi le le ai hte tinang a n hkru ai nyan maw ai hku hkrai, rai nga ai.
15 Dai re ai majaw, Ndai mung hta nhtu hte kawsi hpang gara shang lu na n rai, nga nna ngai n shangun tim, nye amying gang nna htoi ai myihtoi ni a lam Yehowa ning nga ai: Dai myihtoi ni gaw nhtu tsin-yam kawsi hpang gara hte htum mat na mara ai.
16 Bai, shanhte a myihtoi ga hta la ai shawa masha ni gaw, kawsi hpang gara ai hte nhtu tsin-yam majaw, tinang nan kaw nna madu jan ni, shayi shadang sha ni hte hpawn, Yerusalem mare lam ni hta kabai kau ai hkrum nna, shanhte hpe lup makoi na kadai n nga ai: shanhte a ntsa e tinang a mara hpe ngai ru bun na nngai.
17 Nang shanhte hpe ndai ga tsun mu:
Nye amyu shayi hkawnsek gaw
hkala nba kaba hkrum nna, shi a nma
grai baw wa ai majaw,
nye a myi prwi shani shana
lwi nna, galoi n sim u ga.
18 Ngai pa ga de hkawm yang,
si ai ni hkrai jawng ma ai;
mare kata de shang yu yang,
kawsi hpang gara majaw
machyi hkrum ai ni hkrai
rai nga ma hka! Myihtoi wa hte
hkinjawng wa pyi, hpa n chye ai,
shara magup hkan e jawt hkawm ma ai.
19 Nang gaw Yuda mung hpe
atsai awai kau da nu ni?
na a myit masin Ziun hpe
matsat kau nu ni? anhte n mai
wa lu hkra, nang anhte hpe
hpa majaw adup kau n ta?
Anhte ngwipyaw lam myit
mada timung, mai kaja ai
n mu ga ai; gan ga ai aten hpe
myit mada timung, mak mat ai
hkrai hkrum ga hka!
20 Yehowa e, anhte tara tawt lai ai hte,
ji wa ni a shut hpyit ai hpe,
anhte yin la ga ai: anhte nang hpe
shut kau saga ai.
21 Na amying ningsang majaw,
anhte hpe hkum matsat kau et;
na a arawng sadang tingnyang hpe,
hkum shayuk kau et; dum u,
anhte hte tawn da ai ga shaka hpe,
hkum run kau et.
22 Maigan masha ni a
hpara sumla ni hta, marang jahtu lu ai wa,
nga a ni? lamu gaw shi hkrai
marang htu lu a ni? Anhte a
Karai Kasang Yehowa e, ndai lam
nang hkrai shabyin lu ai, n rai ni?
dai re majaw, anhte nang hpe
ala nga ga ai; ndai lam yawng
nang tawn da nit dai.