29
Yaku Hpadan Aram Mung De Du Ai Lam
1 Ya Yaku hkawm sa wa nna sinpraw mung masha ni a ga de sa du ai.
2 Shaloi shi mada yu wu yang, dai prang e hka htung langai mi nga ai, mu wu ai; dai hka htung na ntsin hte sagu hpung ni hpe ntsin jaw ga ma ai rai nna, dai makau e sagu hpung masum hpum nga ma ai: dai hka htung a magap gaw nlung kaba rai nga ai.
3 Dai kaw e sagu hpung yawng hpe jahpawng da ngut jang, shanhte gaw dai hka htung mahka na nlung hpe galau kau nna, sagu ni hpe ntsin jaw nhtawm, dai nlung hpe hka htung mahka e bai magap da da di mu ai.
4 Shaloi Yaku gaw, “Hpunau ni e, nanhte kanang na rai myit ta?” ngu nna san wu yang, shanhte gaw, “Haran na rai ga ai,” ngu mu ai.
5 Bai shi gaw, “Nahura a kashu Laban hpe nanhte chye myit ni?” ngu nna bai san wu yang, shanhte gaw, “Chye ga ai,” ngu wu ai.
6 Shaloi, “Shi hkam kaja nga a ni?” ngu nna bai san wu yang, shanhte gaw, “Hkam kaja nga ai: yu u, shi a shayi sha Rahkela mung sagu gawt nna sa wa ra ai,” ngu nna tsun mu ai.
7 Bai Yaku gaw, “Yu mu, jan naw rawng nga ai; yamnga ni hpe jahpawng na aten garai n re ai; sagu ni hpe ntsin shayaw nhtawm naw sa rem mu,” ngu nna shanhte hpe tsun mu ai.
8 Shanhte gaw, “Sagu hpung mahkra du hpawng ma nna ndai nlung hpe garai n galau kau yang gaw, anhte n rai lu ga ai: galau kau ngut yang she anhte sagu ni hpe ntsin jaw lu ga ai,” ngu nna htan mu ai.
9 Shing nga shanhte hte naw shachyen nga yang, Rahkela mung kawa a sagu ni rem ai rai nna, sagu gawt let du sa ai.
10 Yaku gaw katsa wa Laban a shayi sha Rahkela hte, shi a sagu ni hpe mu jang, sit sa nna, dai hka htung mahka na nlung hpe galau kau nhtawm katsa wa Laban a sagu ni hpe ntsin jaw wu ai.
11 Shaloi Yaku Rahkela hpe pup nhtawm nsen shaja nna hkrap wu ai.
12 Yaku shi gaw Rahkela a kawa a kahkri, Rebeka a kasha re ai gaw, Rahkela hpe tsun dan wu ai majaw, shi gaw gat wa nna kawa hpe wa tsun shana wu ai.
13 Ya Laban gaw shi a kahkri Yaku a lam na jang, shi hpe tau la na gat sa wa nhtawm, shi hpe ahpum let pup nna nta de woi wa wu ai: Yaku mung shi a lam yawng Laban hpe tsun dan wu ai.
14 Dai rai nna Laban gaw, “Gaja wa nang gaw nye a nrut nra hte sai shan rai nga ndai,” ngu wu ai. Shing rai shi kaw shata mi daram nga nga sai.
Lea Hte Rahkela Hpe Yaku Hkungran La Ai Lam
15 Shaloi Laban gaw, “Nang ngai hkri rai nga ai; dai re ai majaw nang ngai hpe kaman a galaw yam kau na rai ni? na a shabrai gade hku tawn na ngai e tsun e,” ngu wu ai.
16 Ya Laban shayi sha lahkawng lu da wu ai: kaba ai a amying gaw Lea, kaji ai a amying gaw Rahkela rai nga ai.
17 Lea gaw myi mam mam re ai; Rahkela chyawm gaw hkumhkrang tsawm ai hte ahpraw asam htap nga ai.
18 Yaku gaw Rahkela hpe tsawra wu ai rai nna, Laban hpe, “Na shayi sha kaji Rahkela a matu, ngai nang hpe sanit ning galaw jaw na nngai,” ngu wu ai.
19 Laban mung, “Masha kaga hpe ya sha na hte nang hpe ya yang grau mai nga ai; ngai kaw nga ga,” ngu wu ai.
20 Shaloi Yaku gaw Rahkela a matu sanit ning galaw jaw wu ai; Rahkela hpe tsawra nga ai re ai majaw, gade ya na ai zawn n nawn wu ai.
21 Ya nhtoi du yang Yaku gaw, “Ladaw tawn ai nhtoi du sai; nye a num ngai la ni ga, ngai e ya sha ni,” ngu nna Laban hpe tsun wu ai.
22 Shaloi Laban gaw dai yang na ni nlang hpe shaga nna poi galaw wu ai.
23 Shana rai jang shi a shayi sha Lea hpe Yaku kaw shi woi shawn tawn da wu ai; Yaku mung shi kaw shang wu ai.
24 Laban gaw shi a mayam Zilhpa hpe Lea a shingnan tai na jaw wu ai.
25 Ya, jahpawt rai jang, yu u, Lea rai nga lu ai; dai majaw Yaku gaw Laban hpe, “Ndai nang ngai hpe galaw ndai gaw hpa rai nga a ta? Rahkela a matu ngu nna she ngai nang hpe galaw jaw de ai n rai ni? dai re ai mi hpa majaw ngai hpe maw sha kau n ta?” ngu wu ai.
26 Laban gaw, “Kaba ai hpe garai n ya yang kaji ai hpe shawng ya sha ai gaw anhte ga e n galaw ga ga ai:
27 ndai nhtoi bat mi naw la u: dai hpang sanit ning nang naw galaw jaw na matu kaga hpe mung anhte ya na ga ai,” ngu nna htan wu ai.
28 Yaku mung dai ga hte maren bat mi naw la nga ai rai nna, Laban gaw shi a shayi sha Rahkela hpe mung ya sha wu ai.
29 Laban gaw, Rahkela a shingnan shatai na, shi a mayam Bila hpe sharung dat wu ai.
30 Rahkela kaw mung shi shang nna, Lea hta Rahkela hpe grau tsaw wu ai: shing rai sanit ning tup naw bai galaw jaw wu ai.
Yaku A Kasha Ni
31 Ya Lea gaw n dawng n yawt hkrum nga ai hpe Yehowa mu ya wu ai rai nna, kashu kasha shaprat na lam hpaw ya wu ai; Rahkela chyawm gaw maudung dung nga ai.
32 Shaloi Lea na-um nasin rai nna shadang sha shangai wu ai. Shi hpe Rubin ngu nna shamying wu ai: kaning rai nme law, shi gaw, “Ngai nga karen nga ai hpe Yehowa mada yu ni ai; dai rai nna ya nye a madu wa ngai hpe tsawra na ni ai,” nga ai.
33 Bai shi na-um nasin rai nna shadang sha shangai wu ai. Shaloi shi gaw, “Ngai n dawng n yawt hkrum nngai hpe Yehowa na ya ni ai majaw, ngai hpe ndai ma mung jaw ni ai,” nga nna shi hpe Simun ngu shamying wu ai.
34 Bai shi na-um nasin rai nna shadang sha shangai wu ai. Shaloi shi gaw, “Ya, nye a madu wa ngai hte kanawn na ra ai; ngai shi a matu shadang sha masum shangai ya se ai,” nga nna shi hpe Lewi ngu shamying wu ai.
35 Bai shi na-um nasin rai nna shadang sha shangai wu ai. Shaloi shi gaw, “Ya gaw ngai Yehowa hpe shakawn na we ai,” nga nna shi hpe Yuda ngu shamying wu ai: dai hpang kasha n shaprat ai shalung nga mat ai.