9
Phic Vphaungx Miq Phvnx htenc muex Phox tueq
1 Vruex kuex Yehowa bomjungc rvtueq:
Vpiq rueq Hadrak mungx nuiyc Damasku ghaqyungx muex murx tvgurc tvkoc htvp htaz gay tueq. Israel phvnx htenc dvyx rvmuq, Siria mungx wawc ghaqnyuiuz jungx kvtauk Yehowa rueq guimz yaq.Ref 9:1 Esa 17:1-3; Yer 49:23-27; Amo 1:3-5 Ref 9:1-4 Esa 23:1-18; Ezk 26:1—28:26; Yoel 3:4-8; Amo 1:9-10; Mat 11:21-22; Luk 10:13-14
2 Hadrak mungx ghaqruiy nuex httax yaq Hamat nuiyc vthenc vtuiux vhttax Tire nuiyc Sidon ghaqyungx htenc muinz vpiq muex seng yaq.
3 Tire kuex vpiq tvkoc vphaungx nolaungx ghaqshungc htenc tec vtueq, kuimphox nuiyc kuimshawx kuex bokkhuyx ikhoc phungc taq tueq!
4 Yuq muinz piq rueq vlvp hup vsvmx htenc kuex Taungjix rueq tvjomx vtueq svmuktvrax nuex tuip gay shuex, ghaqyungx kuex ghaqrawz nuex httuiuc laz khamc gay shuex.
5 Ashkelon ghaqyungx rueq vruex khiz vtueq hiyaz wuez tuex. Gaza ghaqyungx rueq muinz kvruex khiz vtueq kuilc daz yunghvlc rvhumc tuex. Kvkhoc rvtueq Ekron ghaq nuiyc piq rueq tvluimc yaq kuex bunx wvnc tuex. Gaza hokhvmx moz wvnc ruiux, Ashkelon ghaq kuex ghaqkuiyq ghaq khvmx gay shec rvhumc tuex.Ref 9:5-7 Esa 14:29-31; Yer 47:1-7; Ezk 25:15-17; Yoel 3:4-8; Amo 1:6-8; Zeph 2:4-7
6 Ashdod ghaq nuex muinz miq rvshot rvshauk httax tuex. Yehowa rueq, “Vruex ngamc boq yaq Philistin miqsaz lotlaz kuex ngaz rueq tvyomx gay shaungx.
7 Tsuingshiq rueq tvguiy lomx yaq phuiuz vsvy jac kuex mkaq muinz phauk saq shuex rvmuq, vtvwanc vruez shec vganc muinz phauk saq lvp muq. Vtvraungx httax yaq htenc kuex ngvy miqsaz nuex lomx naungx vtueq tsuingshiq kuex Yuda phvnx waruiuz wawc taungshiz ikhoc muex yaungx wvnc tuex. Ekron ghaq wuinz kuex Jebusi ghaq wuinz ikhoc ngvy miqsaz vkhoz vhtaq muex yaungx wvnc tuex.
8 Ngaz rueq ngvy mungtan kuex unuk ralx rueq muinz yanz lot muq juing tvkhup wungx shaungx. Honc bac layx tac jix muex ngvy miqsaz htenc kuex tuinghtuing naqsaq tvkoc vkhangx kuq shaungx rvmuq. Ngvy miqsaz htenc kuex mtanc lac kuilc daz rvhumc yaq nguinx ngaz rueq khiz tauk,” ngoz tueq jungx tueq.
Max Kox wawc Hokhvmx
9 Zion miqsaz lex, kokez wuez kuinz, kokez wuez kuinz!
Yerusalem miqsaz lex, vkoz vkez maq guyc sez wuez kuinz!
Lawc shuinz, nuimshiq hokhvmx waz kuex nuimshiq kox nuex kaz yaq!
Vpiq rueq taungx vtueq lotlaungc wvnc tueq,
yuq muinz thuinz tvyomz vtueq loze htauk nuex ngaungc yaq,
loze saz vshiz htauk nuex, loze kuiux kvruex saz htauk nuex ngaungc yaq.Ref 9:9 Mat 21:5; Yoh 12:15
10 Yehowa rueq,
“Ngaz rueq Israel wawc ralx lungc renc htenc kuex tvhttot lvmz gay ruiux
Yerusalem wawc mvre htenc kuex lvmz gay shaungx;
ralx khvt nuex shuimx yaq laq htenc kuex tvbac gay shaungx.
Nuimshiq hokhvmx waz kuex miqphvnx htenc hvlwvl nuex nomic tvhttax vtueq;
vpiq rueq svmuktvrax maq svmuktvrax nuex httuiuc laz,
Euphrat Ruilx maq ghaq tvsuip nuex httuiuc laz guimz shuex,” ngoz tueq jungx tueq.Ref 9:10 Tvts 72:8
Tishox rueq Vpiq Miqsaz Tvjomx Gvl Yek tueq
11 Yehowa rueq,
“Shomc nawk juing tvguiy maq mal htuinc vtueq,
nuimshiq rulc ngaz rueq vtvhungx bomkhvrc kvmaq
ngaz rueq nuimshiq miqsaz htenc kuex tvdung wvnc phaungx,
yuix vguez ghaqkhurx ngoz yaq
vthuq lvy rvhumc tuit wawc tvdung wvnc phaungx.Ref 9:11 Dw 24:8
12 Vthuq lvy rvhumc jix hez lex, yek waung luit, tvluimc juing vhttax;
nuimshiq kvguing kvwungx juing ghaq baung nuex yek luit.
Majuiuc ngaz rueq nuimshiq muex jungx ix, nuimshiq rvhumc wvnc tuit kuilc daz lotlaz laung nuex
kejux mvnnueyc tvyez kuq phaungx.
13 Ngaz rueq Yuda kuex nolaungx washiz laq ikhoc
Israel kuex laqsvnz htenc ikhoc tvyaungc vtueq shuimx shaungx.
Ngaz rueq Zion ghaq wuinz kuex yaung ikhoc shuimx vtueq,
Greek waz hez kuex khvt shaungx.”
14 Yehowa kuex vpiq miqsaz htenc htauk nuex kvkhic kaz vtueq;
vpiq rueq vpiq laqsvnz htenc kuex raunglep yaq ikhoc gap shuex.
Johvlc Yehowa rueq bolic tuimx shuex;
vpiq kuex ghaqyaz kox raunghtiq raungguil rulc khuemx wvnc yaq.
15 Tvphaungc Tvsuip Yehowa rueq vpiq miqsaz kuex tvkhup wungx shuex,
tsuingshiq rueq tsuingshiq ralx htenc kuex tvbac gay shuex.
Tsuingshiq kuex ralx khvt nuex joal pawc jix hez ikhoc guyc ramc vtueq
tsuingshiq ralx htenc tvguiy kuex ruiuc gay shuex;
kvruex kuex shomrawx htauk nuex httax yaq pantuimz wawc
vruiuc gay shomc nawk juing tvguiy ikhoc svrc tuex.
16 Kvruex raungnuiyq httuiuc wvnc tuex nuex, Yehowa rueq vpiq miqsaz kuex,
khelbuenx remc jix waz rueq piq khelbuenx kung kuex kvhiz
juing baung wawc palc wvnc tueq ikhoc palc wvnc shuex.
Tsuingshiq kuex vpiq mungtan
nuex lungsex khushec ikhoc phelez tuex.
17 Mungtan kuex hvlc hvlc maq svp rvp tuex nyix!
Yalx rox rulx muinz kvruex wawc tuiz vtsvmz nuiyc svpiq
tix rueq tvhungc laungc tvpeluz wvnc shuex.