9
Dawid nuiyc Mephiboshet
1 Raungnuiyq shiz Dawid rueq, “Sholu yuimx wuinz wawc washiz tanc kvjungx muq haz? Httax ruiux kuex Yonathan ningkhvnc nuex ngaz rueq piq muex menjenc lvmz tvkhic khvmz tauk,” ngoz tueq jungx tueq.Ref 9:1 1Sam 20:15-17
2 Sholu yuimx wuinz nvrc waz vmuingc Ziba ngoz yaq washiz httax yaq, kvruex waz kuex Dawid kox nuex kay tvkoc jungx tueq. Hokhvmx waz rueq, “Mnoz kuex Ziba haz?” ngoz tueq wiz tueq.
Piq rueq, “Jiyungx waz lex, mnvrc waz ngaz rvtauk,” ngoz tueq tvralc tueq.
3 Hokhvmx waz rueq piq muex ngoc, “Ngaz rueq shuimx shaungx ngoz tueq Tishox muex bomkhvmc kuq tauk rulc rv-ngvlc, tvmtuing maq menjenc lvmz ngaz rueq tvkhic kuy muex, Sholu yuimx wuinz wawc washiz tanc kvjungx muq doc haz?” ngoz tueq wiz tueq.
Ziba rueq, “Yonathan saz washiz kvjungx yaq. Piq kuex vyaz vbac,” ngoz tueq jungx tvralc tueq.Ref 9:3 2Sam 4:4
4 Hokhvmx waz rueq, “Piq m-yuq lac?” ngoz tueq wiz tueq.
Ziba rueq, “Lodebar ghaq wawc Ammiel saz Makhir yuimx nuex httax yaq,” ngoz tueq jungx tvralc tueq.
5 Kvkaq Hokhvmx Dawid rueq miq tvkaz vtueq tvshvlx kaz tueq.
6 Sholu suiuz, Yonathan saz Mephiboshet httuiuc kaz vtueq, Dawid khaungkac nuex bumx nawk tueq. Dawid rueq, “Mephiboshet,” ngoz tueq gvl tueq, piq rueq, “Jiyungx waz lex, ngaz kuex mnvrc waz rvtauk,” ngoz tueq tvralc tueq.
7 Dawid rueq, “Nauk hiz kaz, m-waz Yonathan ningkhvnc nuex ngaz rueq mnoz muex menjenc kuq phaungx. Mjix Sholu rueq guimz wvnc tueq ghaqphux lotlaz kuex ngaz rueq mnoz muex yez kuq phaungx. Mnoz rueq ngvy humpanx wawc mkaq muinz phauk saq lvp shuiux,” ngoz tueq jungx tueq.
8 Mephiboshet kuex laukshiz hulawx bumx yek vtueq, “Jiyungx waz lex, ngaz kuex guyhex maungx vshiz htauk nuex muinz nauc laq hvlc rvtauk! Yvmx ngoz tueq lac ngaz muex kvtanc khvnc hvlx rix vtuiux?” ngoz tueq jungx tueq.
9 Kvruex yimaq Sholu nvrc waz Ziba kuex hokhvmx waz rueq gvl vtueq, “Sholu nuiyc piq yuimx wuinz rueq guimz wvnc tueq phvnx ruip saz kuex, mjiyungx waz suiuz Mephiboshet muex ngaz rueq lekuq vshaungx.
10 Mnoz kuex msaz hez nuiyc mnvrc waz hez rulc vdvmz mjiyungx waz Sholu yuimx wuinz tvkoc wuik vnax shuimx kaz khic yuingc ruiux, tuiuz vtsvmz kuex lvp luz vtueq tsuingshiq muex phuiuz vsvy tvhungx htaungx kuq shuiuz. Yuq muinz Mephiboshet piq pumz kuex ngvy humpanx wawc mkaq muinz wuinz waz muex ikhoc ngaz rueq kuq phauk saq shaungx,” ngoz tueq jungx tueq. (Ziba kuex vsaz waz 15 rac nvrc waz 20 httax yaq.)
11 Ziba rueq, “Taungjix hokhvmx waz rueq nvr phux rulc rv-ngvlc ngaz rueq shuimx shaungx,” ngoz tueq tvralc tueq.
Kvkhoc rvtueq Mephiboshet kuex hokhvmx waz saz ikhoc hokhvmx humpanx wawc phauk saq tueq.
12 Mephiboshet nuex vmuingc Mika ngoz yaq vsaz washiz httax yaq. Ziba yuimx wuinz lotlaz kuex Mephiboshet nvrc waz hez sawc sauk yaungx wvnc wuez tueq.
13 Kvkhoc rvtueq vyaz vnueyc wvtaungx vbac waz Mephiboshet kuex Yerusalem nuex httax vtueq hokhvmx waz humpanx wawc phuiuz vsvy htenc kuex piq rueq phauk saq lvp yaq.