10
1 Kvruex yimaq raungmungx wawc hungc vlaungc httaz hvlc raungkamx washiz svt kaz yaq kuex ngaz rueq khiz tauk. Piq rueq phuemx kuex svmx ruiux, vkhux tvroz tuimz nuex mvlx thuingx httax yaq; vhtvlx kuex shalx rulc rv-ngvlc yaq, Vyaz kuex wvr htung ikhoc rvtueq.
2 Vyauk nuex jalc tvy yoalx luik tul vruinx saz vshiz shuimx yaq. Piq yaz vkeq kox kuex svmuktvrax nuex nuiuz yaq, yaz phvrx kox kuex taungkawx nuex nuiuz vtueq,
3 hangsic thuic ikhoc yunghvlc maq guyc yaq. Piq guyc koq tueq raungmuk lauk mvshix maq tvralc tueq.
4 Kvkaq dvyx raungmuk tvruingc rueq jungx yaq kuex ngaz rueq wuiyq tvtsuingc dvnc tauk. Yuq muinz raungmungx maq, “Vruex raungmuk mvshix rueq jungx tueq kuex httuiyq puingc taq shuiuz, nauk wuiyq kaz!” ngoz tueq jungx yaq kuex ngaz rueq tay tauk.
5 Kvruex yimaq svmuktvrax nuex nuiyc taungkawx nuex nuiuz vtueq jvp yaq raungkamx waz rueq piq yauk vkeq kox kuex raungx nuex tenz vtueq, Ref 10:5-7 Dw 20:11; Tvrac 32:40; Dan 12:7; Amo 3:7
6 pattup pat-sac tvraungx httax vtueq raungmungx, ghaq nuiyc svmuktvrax maq phaungc vtueq httax yaq lotlaz tvdungc sungc jix waz Tishox muingc kuex ruingc vtueq tuemc tueq. Raungkamx waz rueq, “Kvyix httvmx tuex rvmuq!
7 Yuq muinz mvshix ngoc yaungc raungkamx waz rueq bolic tuimz koq tueq, Tishox rueq vpiq nvrc waz hez ngoz yaq shvmmax bix muex jungx kuq shec tueq rulc rv-ngvlc vpiq rueq thuiuz hvlc kvmungx yaq lvmx kuex hungx wvnc shuex,” ngoz tueq jungx tueq.
8 Kvruex yimaq raungmungx wawc ngaz rueq tay tauk tvruingc ngaz muex jungx yek yaq kuex, “Svmuktvrax nuiyc taung nuex jvp yaq raungkamx waz yauk nuex jalc taq tueq luik tul kuex lvmz kaz kuiuz,” ngoz tueq jungx phuex.Ref 10:8-10 Ezk 2:8-3:3
9 Kvkaq raungkamx waz kox nuex ngaz kaz vtueq, “Luik tul vruinx saz kuex ngaz muex kuq koq,” ngoz tueq thoz tauk. Piq rueq, “Lvmz vtueq phauk shuiuz, m-wuk nuex khuip wvnc tuex, yuq muinz mnuix nuex kuex nyaq ngurx ikhoc ruimx tuex,” ngoz tueq jungx phuex.
10 Ngaz rueq luik tul vruinx saz kuex piq yauk wawc lvmz vtueq phauk tauk, kvruex kuex ngvy nuix nuex nyaq ngurx ruimc ikhoc ruimx tueq. Yuq muinz kvruex ngaz rueq yuk gay koq tueq iwuk nuex khuip wvnc tueq.
11 Kvruex yimaq raungkamx waz rueq, “Mnoz rueq mungtan paunghvlc nuex muinz, kvjaz phvnx ruip saz maq kvjak yaq miqphvnx htenc muex muinz, hokhvmx bix lvmx nuex seng vtueq Tishox bomjungc kuex yix maq laukshiz jungphvnc kuy yek juing,” ngoz tueq ngaz muex jungx phuex.