3
1 Kvkhoc ngoz ruiux yuq, Yuda miqsaz kuex Pungnuk miqsaz htauk nuex muinz vhvlx yvmx khoc lac jvnc yaq nguinx? Vhttoar gvnc lvmc muinz yvmx vjux lac httax yaq nguinx?
2 Lvmx ruip saz nuex vjux httaz hvlc httax yaq! Vphaungc shauk shauk Yuda miqsaz htenc rueq Tishox bomjungc lvp wvnc wuez tueq.
3 Yuq muinz mkhoc shoc maq tsuingshiq wawc miq wvyvmc kuex tvmtuing vguez ngoz ruiux yuq, Tishox muinz tvmtuing vguez ngoz tueq ngoc juing haz?
4 Kvkhoc kuex rvmuq! Miqsaz lotlaz vrot vkaq muex yaungx ruiux muinz Tishox kuex tsuingrux hvlc waz rvtueq. Rumvrc luik nuex,
“Mnoz rueq jungphvnx ruiux yuq
mnoz kuex vlvmx waz rvtoq lvmz kvkhic wvnc tuex;
khac phoc rvhumc ruiux muinz mnoz rueq dvyx taungx shuiux,”
ngoz tueq wuiyq shec tueq.Ref 3:4 Tvts 51:4; 62:9; Yoh 3:33
5 Yuq muinz miq wvyvmc kuex naungshiq rueq vyaq yauk shuimc ningkhvnc nuex Tishox vlvmx yauk shuimc kuex tvkhic kuq vshix rvmuq haz? ngoz tueq wiz wuez shuex. Naungshiq rueq yvmx khoc jungc kuy juing lac? Tishox rueq naungshiq muex murx tvgurc kuq yaq kuex tvrac muq ngoz tueq haz tvralc shix? (Vruex kuex miq thuinz maq jungx yaq kvkhoc jungx vshaungx rvtueq.)
6 Kvkhoc kuex rvmuq! Mkhoc shoc maq Tishox kuex tsuingrux muq waz ngoz ruiux yuq mungkawx vruex yvmx khoc lac phox kuq lot shvnx?
7 Mkhoc shoc maq ngaz tsuingrux muq rvtauk lvmx rueq Tishox tsuingrux lvmx kuex pinhtumc tvkhic vtueq, vpiq ngauz vngax kuex tvdung tvkhic ruiux yuq, mvrax kop yaq waz ikhoc vphoc kuex ngaz yvmx rvtueq lac rvhumc taungx?
8 “Vhvlx yaungc wvnc tvkoc vbac kuex naungshiq rueq shuimx wvnc wuez ix,” ngoz tueq jungc juing haz? Kvkhoc ngaz rueq jungx yaq ngoz tueq miq wvyvmc rueq mvrax tvgurc vtueq ngaz muex shummarc wuez yaq. Tsuingshiq kuex vphoc rvhumc aungx yaq rulc rv-ngvlc vsuing rvhumc tuex.
Tsuingrux jix Washiz muinz Httax muq
9 Kvkhoc rvyruiux naungshiq Yuda miqsaz kuex Pungnuk miqsaz htauk nuex jvnc vtueq yvmx khoc rvtueq lac vhvlx lvmx nuex httax vtix? Ukhaq muinz vhvlx lvmx nuex httax wuez muq. Yuda miqsaz muinz Pungnuk miqsaz muinz mvrax luimc vkawc khung nuex rv-ngvlc dvyx httax yaq lvmx ngaz rueq vphaungc phuex vtvkhic kuy wuez shex.
10 Rumvrc luik nuex:
“Tsuingrux miq washiz muinz vguez;Ref 3:10 Tvts 14:1-3; 53:1
11 Wvtharc jix miq washiz muinz vguez Tishox muex nawk palx jix muinz vguez.
12 Miq lotlaz rueq Tishox muex yix tvnungx shung kuq wuez yaq;
tsuingshiq lotlaz yaq wvnc vtuex;
vlvmx shuimc jix miq washiz muinz vguez, vsuing washiz muinz vguez.
13 Tsuingshiq rueq kvhiz juing kvjaz dvyx jungx wuez yaq;
tsuingshiq rueq miqmac tvlix maq laulawc phauk saq yaq;
tsuingshiq nuix bar maq tvhiz sungx yaq kvjaz kuex puiuc yangx ikhoc httax yaq.Ref 3:13 Tvts 5:9; 104:3; Yer 5:16
14 Tsuingshiq nuix nuex khuip hvlc mvnhttonc mvntvmc bomc dvyx mvrc yaq.
15 Tsuingshiq kuex miq tvthuiuz sac tvkoc nuiyc miq thvy tvkoc lvwvnz yaq.Ref 3:15 Btg 1:16; Esa 59:7-8
16 Tsuingshiq khuemx shamx kaz tuex baung htenc kuex tvbac tac gay dvyx rvyaq.
17 Tsuingshiq rueq nomic lvmx kuex mkaq muinz tuiuz shec muq.
18 Tishox muex hisungx thuinz muinz vguez,”
ngoz tueq wuiyq shec tueq rulc rv-ngvlc yaq.Ref 3:18 Tvts 36:1
19 Tvrac nuex httax yaq vnvrc lvmx phvnx ruip saz kuex Tvrac rueq khung nuex httaz jix htenc tvkoc rvtueq kuex, majuiuc naungshiq rueq tuiuz vshix, kvkhoc yaungx wvnc tueq lvmz kuex miq nuix lotlaz tvthauk tvkoc nuiyc miq lotlaz kuex Tishox rueq phox shuex kvyuq tvrvhumc tvkoc rvtueq.Ref 3:19 Rom 9:23; 1:20; 2:2; Yoh 10:39
20 Yvmx khoc lac ngoz ruiux lec Tvrac rueq nvr yaq htenc kuex phvnx tvhungx vtueq ukhaq muinz Tishox htumc nuex tsuingrux wvnc lot muq. Tvrac rueq shuimx yaq yauk shuimc kuex miqsaz rueq mvrax yaq gay tueq lvmx kuex tvtuiuz wvnc tvkoc dvyx rvtueq.Ref 3:20 Tvts 143:2; Rom 7:7; Kamx 13:39; Gal 2:16; Eph 2:8-9; Tit 3:5
Tishox rueq Naungshiq kuex Yvmx khoc lac Tvtsuing tvrux wvnc phvnx
21 Yuq muinz majuiuc Tishox rueq miqsaz kuex vpiq rulc yvmx khoc maq lac tvtsuing tvrux kuq yaq nguinx lvmx kuex tvkhic kuq yaq. Tishox htumc nuex tsuingrux wvnc tvkoc Tvrac rueq ruez lot muq, kvruex lvmz vsuing rvtueq kuex Moshe Tvrac nuiyc shvmmax bix hakhix khvmc wuez tueq.
22 Yesu Christu muex kvmluimx ningkhvnc nuex jix miqsaz kuex Tishox htumc nuex tsuingrux wvnc lvp tueq. Tishox rueq Yesu Christu muex kvmluimx jix miqsaz lotlaz htauk nuex tvtsuing tvrux kuq tueq. Tvrv-phvlc juing lvmx muinz vguez:Ref 3:22 Gal 2:16; 3:28; Kol 3:11
23 lotlaz kuex mvrax vhttax jvnc ningkhvnc nuex Tishox rueq tvguing wvnc yaq wawc yal wvnc vtuex.
24 Yuq muinz vhtawz vrawz kuy rac muq Tishox kejux maq Christu Yesu ningkhvnc nuex tsuingrux nuex httuiuc wvnc lot tueq.
25-26 Christu vthueyc khvmc vtueq miqsaz kuex mvrax htenc wawc dawc kuy gay lot tvkoc Tishox rueq Taungjix kuex shomc nawk kuy juing phvnx muex tvyaungc gay tueq. Miqsaz kuex Christu muex kvmluimx vtueq mvrax htenc wawc dawc kuy rvhumc wuez tueq. Tishox rueq Christu kuex shomc nawk kuy juing ikhoc muex tvyaungc gay tueq lvmz kuex, vpiq tsuingrux lvmx tvkhic kuy rvtueq. Majuiuc pat nuex httuiuc laz Tishox kuex thuinz vluz nanx thuinz maq miqsaz vyaq vrax wvnc mvrax htenc kuex tvtsuingc kuq muq. Yuq muinz majuiuc pat nuex vpiq tsuingrux lvmx tvkhic tvkoc miqsaz mvrax kuex tvtsuingc kuq yaq. Kvkhoc maq Tishox rueq vpiq kuex tsuingrux waz rvtueq lvmz muinz, Yesu muex kvmluimx jix htenc kuex vpiq rulc tvtsuing tvrux yaq lvmz muinz tvkhic tueq.
27 Kvkhoc rvtueq naungshiq laungc jungc juing lvmx m-yuq lac httax yaq nguinx? Naungshiq laungc jungc juing lvmx vguez. Yvmx ningkhvnc nuex lac? Tvrac kuex naungshiq rueq phvnc ningkhvnc nuex haz? Kvkhoc kuex rvmuq! Naungshiq kvmluimx ningkhvnc nuex rvtueq.
28 Tvrac nuex nvr shec tueq shuimc vkay kuex shuimx vtueq rvmuq, kvmluimx htauk maq jix miqsaz kuex Tishox htumc nuex tsuingrux muex yaungx yaq kuex majuiuc naungshiq rueq tuiuz lvp vshix.
29 Tishox kuex Yuda miqsaz Tishox dvyx haz rvtvnx? Pungnuk miqsaz htenc Tishox muinz rvtueq rvmuq haz? Rvtueq, vpiq kuex rvtueq.
30 Tishox kuex vshiz dvyx rvtueq, Yuda miqsaz tsuingshiq kvmluimx ningkhvnc nuex vpiq rulc tvtsuing tvrux rvhumc wvnc tueq, kvmaq Pungnuk miqsaz htenc muinz kvmluimx ningkhvnc nuex vpiq rulc tvtsuing tvrux rvhumc wvnc tueq.Ref 3:30 Tvrac 6:4; Rom 3:8,20,28; Gal 3:20
31 Kvkhoc ngoz ruiux yuq naungshiq kvmluimx thuinz maq Tvrac kuex vtvdux haz rvgay vshix? Kvkhoc kuex rvmuq; Tvrac kuex naungshiq rueq tv-phaungx ngaungx vshix rvtueq.