16
Polu rueq Gvnhttuingc ngoc Kvjaz
1 Kenkrea ghaq wawc phungc nuex romc kuy yauk shuimc jix naungshiq nyaz Phoebe kuex nuimshiq kox nuex tvtay jungx vphaungx.
2 Nuimshiq kuex Tishox miqsaz vdvmz dvmz rvlvp wvnc ikhoc maq Taungjix muingc maq piq kuex lvp wvnc wuez shuinz, piq muex rax yaq phvnx ruip saz muinz romc kuq shuinz, yvmx khoc lac ngoz ruiux lec piq kuex miq paunghvlc muex muinz, ngaz muex muinz romc kuy jix kungjix vhvlx vshiz rvtueq.
3 Christu Yesu yauk shuimc shuimx tauk nuex ngvy htuiz daungx jix Priskila nuiyc Aquila muex muinz gvnhttuingc ngoz kuq shuinz.Ref 16:3 Kamx 18:2; 2Tim 4:19
4 Tsuingshiq kuex ngvy tvkoc nuex miqmac khux maq khvmc vtueq shuimc kay jix rvtueq. Tsuingshiq muex ngaz rueq dvyx rvmuq Pungnuk phvnx wawc phungc miqsaz htenc rueq muinz kejux vyungx ngoz yaq.
5 Tsuingnueyc yuimx nuex rvtuimx httax vtueq nawk palx yaq phungc miqsaz htenc kvmac muinz gvnhttuingc ngoz tueq jungx kuq shuinz,
Asia mungx wawc vphaungc phungc miqsaz muex yaungc jix waz ngvy kungjix shauk Epaenetu muex muinz gvnhttuingc ngoz kuq shuinz.
6 Nuimshiq tvkoc yauk shuimc pinhtumc hunglaungx shuimc kuy jix nyuiuz Mary muex muinz gvnhttuingc ngoz kuq shuinz.
7 Androniku nuiyc Junia muex muinz gvnhttuingc ngoz kuq shuinz, tsuingnueyc kuex ngaz rulc vroc khoktep nuex shuiuz rvhumc naungc jix Yuda miqsaz rvtueq, tsuingnueyc kuex kamx waz muex yaungx vtueq muingc jungc vhttax jix, ngvy htauk nuex muinz max khux Christan miqsaz muex yaungc wvnc jix rvtueq.
8 Taungjix nuex vshiz dvyx ngaz rueq lungwawc hvlc Ampliatu muex muinz gvnhttuingc ngoz kuq shuinz.
9 Naungshiq rulc vdvmz Christu yauk shuimc htuiz daungx jix Urbanu nuiyc ngvy kungjix shauk Stakhi muex muinz gvnhttuingc ngoz kuq shuinz.
10 Apela muex gvnhttuingc ngoz kuq shuinz, piq kuex Christu nuex tvmtuing httaz jix waz rvtueq. Kvmaq Arisbulu yuimx wuinz muex muinz gvnhttuingc ngoz kuq shuinz.
11 Yuda phvnx rvtueq Herodion muex muinz gvnhttuingc ngoz kuq shuinz, Christan miqsaz yaungx yaq Narkisu yuimx wuinz muex muinz gvnhttuingc ngoz kuq shuinz.
12 Taungjix yauk shuimc gurc pic jix Triphaena nuiyc Triphosa muex muinz gvnhttuingc ngoz kuq tauk, ngvy kungjix shauk Persia muex muinz gvnhttuingc ngoz kuq shuinz, piq kuex Taungjix yauk shuimc nuex pinhtumc hunglaungx jix waz rvtueq.
13 Taungjix yauk shuimc nuex hunglaungx jix waz Rufu nuiyc ngaz muex muinz piq saz ikhoc tsvp kvp kuy jix nvnueyc nyuiuz muex muinz gvnhttuingc ngoz kuq tauk.Ref 16:13 Mak 15:21
14 Asinkritu, Phelegon, Herme, Patroba, Herma nuiyc tsuingshiq rulc vdvmz nuex httaz naungc jix Christan miqsaz htenc muex muinz gvnhttuingc ngoz kuq shuinz.
15 Philologu, Julia, Nereu nuiyc vnyaz Olimpa hez rulc vdvmz nuex httaz guilc ngaungc jix Tishox miqsaz lotlaz muex muinz gvnhttuingc ngoz kuq tauk.
16 Nuimshiq vdvmz dvmz vsawc maq rvshup vtueq gvnhttuingc ngoz tueq rvbomc wuez kuinz, Christu phungc miqsaz lotlaz rueq nuimshiq muex gvnhttuingc ngoz kuq yaq.
Vtvsuip Bomjungc
17 Phunox bix lex, nuimshiq rueq lvp wvnc tuit tvluingc tvlaungc lvmz kuex khawx lvlx ruiux, miq muex thuinz tv-phvlc lvmx, miq htenc kvmluimx thuinz kuex lvmx tvyaq kuy jix htenc kvmac honc lvmz wuez shuinz. Tsuingshiq kuex koayc wuez shuinz.
18 Yvmx khoc lac ngoz ruiux lec tsuingshiq kuex naungshiq Taungjix Christu yauk shuimc jix rvmuq. Miqmac wuk tvkoc yauk shuimc svy jix dvyx rvtueq. Tsuingshiq bomc nyenz samaq raz tueq tenpic kvjaz maq, kenrix jix htenc thuinz kuex tvshonx ronx yaq.
19 Nuimshiq rueq shuenruenc bomjungc nuex mtanc lac kvmluimx vtuinx lvmx kuex miq lotlaz rueq tuiuz yaq, kvkhoc rvtueq ngaz kuex nuimshiq ningkhvnc nuex kokez vtaungx. Nuimshiq kuex vhvlx lvmx mruex lac rvtvnx kuex tuiuz tay tharc vhttax jix muex yaungx ruiux, honc vbac lvmx maq yal wvnc vtueq mvrax kop muq jix htenc nuimshiq kuex httax hvt tvyaungc roc vphaungx.
20 Nomic vjungx ruingx Tishox rueq Satan kuex nuimshiq yaz phaungx nuex tvbunx nuiuz gay shuex.
Naungshiq Taungjix Yesu kejux kuex nuimshiq rulc vdvmz mhttax kueq.
21 Ngaz htuiz daungx jix rvtueq Timothy nuiyc ngvy phvnx Yuda miqsaz rvtueq Lukiu, Jason nuiyc Sosipater rueq muinz nuimhez muex gvnhttuingc ngoz kuq yaq.Ref 16:21 Kamx 13:1; 16:1; 17:5; Phil 2:19; Kol 1:1; 1Tim 1:2
22 Luik vruex wuiyq jix waz ngaz Tertiu rueq muinz Christan maq nuimshiq muex gvnhttuingc ngoz kuq vphaungx.
23 Ngaz muex shuimx kaz kuq yaq kvdvyx muinz rvmuq, vyuimx nuex phungc miqsaz lotlaz rvtuimx juing yuimx muex tvyaungc yaq yuimx taungjix waz Gaiu rueq muinz nuimshiq muex gvnhttuingc ngoz kuq yaq. Ghaqyungx kuimphox tumz shuimc jix waz Erastu nuiyc phunox waz Kuartu rueq muinz nuimshiq muex gvnhttuingc ngoz kuq yaq.Ref 16:23 Kamx 19:29; 1Kor 1:14; 2Tim 4:20
24 Naungshiq Taungjix Yesu Christu kejux kuex nuimshiq lotlaz htauk nuex mhttax wvnc kueq. Amen.Ref 16:24 Greek kvjaz maq vwuiyq shec vsawc luik vbez nuex pvlruinx 24 vruex lomx muq.
Kejux Tvtsvmc Vjux Thoz Bomc Tvsuip
25 Tishox ngauz vngax kuex naungshiq rueq tvtsvmc wuez ix! Ngaz rueq nuimshiq muex jungphvnx kuq phaungx Yesu Christu lvmx Thuix Thaungx Vhvlx nuiyc mvnnuex pat maq phuex vhttuiyq vpuiuc vruez shec tsuingrux lvmx nuex tvkhic kuq tueq rulc rv-ngvlc, vpiq rueq nuimshiq kuex nuimshiq kvmluimx lvmx nuex tv-phaungx ngaungx kuq yaq.
26 Yuq muinz majuiuc kvruex vhttuiyq vpuiuc vruez tsuingrux lvmx kuex shvmmax luik htenc maq kvkhic wvnc tuex; miqphvnx lotlaz kuex Tishox muex kvmluimx vtueq mtay phvnx shueq, pattup pat-sac Tishox rueq nvr tueq rulc rv-ngvlc tsuingrux lvmx kuex jungphvnx kuq tueq.
27 Vshiz dvyx rvtueq, vpiq dvyx taksux httaz hvlc Tishox nuex Yesu Christu maq pattup pat-sac ngauz vngax mhttax kueq! Amen.