26
Yuda Hokhvmx Uzia
(2Hokh 14:21-22; 15:1-7)
1 Yuda miqsaz lotlaz rueq Amazia saz Uzia kuex vrullungx wawc 16 nuex vwaz httungx nuex hokhvmx tvyaungc tvkoc thvl tueq.
2 (Vruex kuex Amazia thueyc yix maq Uzia rueq Elat ghaq kuex khvt yek vtueq ghaqyungx kuex tec yek tueq.)
3 Uzia kuex piq rullungx wawc 16 nuex hokhvmx yaungx vtueq, Yerusalem nuex wawc 52 guimz lawc tueq. Vnyuiuz kuex Yerusalem ghaq jix Jekolia rvtueq.
4 Piq kuex vwaz layx phvnx vtueq Yehowa rueq raungc raq yaq yauk shuimc shuimx tueq.
5 Nawk palx htungx nuex seng vtueq piq muex tharc jungc kuy jix Zecharia rullungx tvraungx wawwawx Yehowa muex tvmtuing maq nawk palx kuy ningkhvnc nuex Tishox rueq piq muex ruimrix kuq tueq.
6 Uzia rueq Philistin miqsaz kuex khvt kaz tueq. Piq rueq Gad, Jamnia nuiyc Ashdod ghaqyungx palx ruk htenc kuex httak gay ruiux, Ashdod ghaq hep wawc ghaqyungx htenc kuex palx ruk ruk ruiux Philistin mungx wawc kvjungx yaq htenc kuex tec taq tueq.
7 Tishox rueq piq muex Philistin miqsaz kvmuinz, Gurbal ghaq nuex httax yaq Arab miqsaz kvmuinz, Meuni miqsaz htenc kvmuinz khvt taungx laz romc kuq tueq.
8 Ammon miqsaz rueq Uzia muex hihic rawc rawc kuq ruiux yaq, piq luimc vkawc yungx wvnc vtueq, piq muingc dungc kuex Ejip mungx nuex httuiuc laz nyvmc wvnc tueq.
9 Uzia rueq Vshuk Kaluix muinz, Warc tvnx Kaluix muinz palx ruk vhttak gay baung nuex pvrrawx htenc tvhungx guirx vtueq, Yerusalem ghaq kuex palx ruk tv-phaungx ngaungx taq tueq.
10 Piq rueq kuz hong nuex phaungx ngaungx yaq pvrrawx htenc kuex guirx taq ruiux, shalx nyuip kox kanx yaz htenc nuex suiux vmanx paunghvlc httax yaq ningkhvnc nuex yuix jumx paunghvlc kuex tvhungx shec tueq. Piq rueq vkhic vyuingc yauk shuimc kuex roc hvlc ningkhvnc nuex ghaq luimx htenc nuex svpiq sunc tvhungx tvkoc muinz, ghaq vbur baung htenc nuex tuiz vtsvmz khic yuingc tvkoc hungc vlaungc kuq tueq.
11 Piq rulc ralx khvt naungc tvkoc tvyoalc yoalx nolaungx phungc yungx vshiz httax yaq. Kvruex kuex piq yauk shuimc jungx waz hez Jeiel nuiyc Maseia rueq tvtsuingc lvmz taq yaq, tsuinghez kuex Hanania rueq shunshvlx lawc yaq.
12 Nolaungx bix phungc nuex shunshvlc jix vyungx vlaungx bix waz 2,600 httax yaq.
13 Tsuinghez khung nuex hokhvmx waz tvkoc ralx htenc kuex taungx laz khvt lot jix nolaungx bix 307,500 httax yaq.
14 Uzia rueq nolaungx bix tvkoc lak, paq, yanx khux phuk, yanx khop svmhung, laq, laqsvnz nuiyc kalilaq lung thuey htenc maq romc kuq tueq.
15 Piq rueq Yerusalem ghaq nuex pvrrawx nuiyc palx ruk shuk rungx htenc kvmaq laq gap juing nuiyc lung kuiux yungx htenc kuex tuip tvdvy tvkoc taungx vwawx vnyalx tvhungx thenc yaq jix htenc muex tvshuimc tueq. Piq thaungc kuex baung ruip saz nuex nyvmc wvnc vtueq Tishox kox wawc romc lawc kuy rvhumc ningkhvnc nuex luimc vkawc httaz hvlc httax wvnc tueq.
Uzia kuex Kvsomc Raungc koq tueq Murx Tvgurc tueq
16 Yuq muinz Hokhvmx Uzia kuex hungc vlaungc httax wvnc koq tueq, piq ngamc yungx wvnc vtueq piq dvy wvnc juing lvmx nuex shvlx wvnc tueq. Piq rueq shomrawx htauk nuex vhomc vtumc phvnx kuex jauk shomc kuy ngoz tueq Shomc Yuimx mungx nuex nyuip vtueq Yehowa piq Tishox muex yaq tueq.
17 Shomc waz Azaria kuex hungc vlaungc httaz hvlc maq khvmc thuinz vhttax shomc waz 80 rulc vdvmz hokhvmx waz yix nuex phvnx laq naungx vtueq
18 piq muex tvwanc tueq. Tsuinghez rueq, “Uzia lex! Mnoz rueq Yehowa muex vhomc vtumc juiuz kuy vkhangx lvp muq. Arun suiuz vsaz hez wawc vsvt wvnc shomc waz bix rueq dvyx vkhoc yauk shuimc kuex shuimc tvkoc lekuy rvhumc yoalx hez rueq dvyx mvy yaq. Kvkhoc rvtueq vruex vsawc baung vmaq dung kaz wvnc kuiuz. Mnoz rueq Yehowa Tishox muex yaq gay toq ningkhvnc nuex vpiq ruimrix kejux kuex mkaq muinz lvp shuiux rvmuq,” ngoz tueq jungx tueq.Ref 26:18 Dw 30:7-8; Wkh 3:10
19 Uzia kuex Shomc Yuimx mungx wawc vhomc vtumc phvnx juiuz juing shomrawx hep nuex jvp vtueq vhomc vtumc phvnx juiuz juing kuex shuimx tueq. Piq kuex shomc waz bix muex khaq koq tueq piq khaungkuimx nuex vshungx mac tsac kuex huingc rvhek laz maq dung kaz tueq.
20 Azaria nuiyc vganc shomc waz hez kuex miqhiz vsac hokhvmx waz khaungkuimx kuex lawc tvtsuingc vtueq piq kuex Shomc Yuimx wawc dungc kay tvkoc yurc gay tueq. Yehowa rueq piq muex murx tvgurc koq tueq piq muinz lvmx lvy dung kaz tueq.
21 Hokhvmx Uzia kuex piq vshungx mac tsac ningkhvnc nuex kvjungx yaq piq rullungx wvlex htungx vlayx rulc rv-ngvlc sawc muq shex rvtueq. Piq kuex Shomc Yuimx mungx nuex nyuip waungc mvy muq shex ningkhvnc nuex, vsaz Jotham muex piq yauk shuimc htenc kuex lekuq gay tueq, mungtan kuex vsaz rueq guimz lawc yaq nuex piq kuex vyuimx nuex dvyx shex httax tueq.
22 Hokhvmx Uzia rueq guimz lawc vtueq piq rueq shuimx wvnc tueq yauk shuimc lotlaz kuex Amo saz shvmmax Esaia rueq tvtsuingc taq shec tueq.
23 Uzia thueyc kaz koq tueq hokhvmx bix luip ruiuz khux ghaq baung nuex luip gay tueq, yuq muinz piq vshungx mac tsac httaz ningkhvnc nuex hokhvmx bix luip ruiuz khux nuex luip muq. Vsaz Jotham kuex piq kvlayc hokhvmx yaungx wvnc tueq.Ref 26:23 Esa 6:1