21
1 Jehoshaphat thueyc kaz koq tueq Dawid Ghaqyungx wawc hokhvmx luip ruiuz khux nuex luip tueq, vsaz Jehoram kuex piq kvlayc hokhvmx yaungx tueq.
Yuda Hokhvmx Jehoram
(2Hokh 8:17-24)
2 Yuda Hokhvmx Jehoshaphat saz Jehoram kuex vnox hez waz tvruk httax yaq: Azaria, Jehiel, Zecharia, Azariahu, Michael nuiyc Shephatia rvtueq.
3 Vwaz rueq tsuinghez muex kuimshawx, kuimphox nuiyc vganc htawz tsanz phvnx htenc paunghvlc kuq ruiux, Yuda mungx ghaq palx ruk yoalx ghaqyungx vshiz phok guimz lawc tvkoc ghaq baung kuq shec tueq. Yuq muinz Jehoram kuex pekhux waz rvtueq ningkhvnc nuex piq kvlayc hokhvmx tvyaungc tueq.
4 Jehoram rueq mungtan kuex shvmhvlx guimz lawc taungx wvnc tueq nuex, vnox hez lotlaz nuiyc Israel vyungx vlaungx bix wvyvmc kuex thvt gay tueq.
5 Jehoram kuex piq rullungx wawc 32 nuex hokhvmx yaungx wvnc tueq, Yerusalem nuex wawc tvjvt guimz lawc tueq.
6 Piq rueq Ahab saz nyuiuz shiz lvmc ningkhvnc nuex Hokhvmx Ahab nuiyc vganc Israel hokhvmx htenc layx bac lvmx kuex phvnx tueq. Piq rueq Yehowa muex mvrax yaq tueq,
7 yuq muinz Yehowa kuex Dawid rulc bomkhvrc taq ruiux piq suiuz vsaz hez rueq tvhttoarc wvnc tvkoc bomkhvmc tvy ningkhvnc nuex, Dawid hokhvmx phvnx vmaq kuex tvbac gay roc muq.Ref 21:7 1Hokh 11:36
8 Jehoram rueq guimz lawc tueq pat nuex Edom rueq Yuda kuex khawx lvlx vtueq dungc wvnc lvp tueq mungtan yaungx wvnc tueq.Ref 21:8 V.V 27:40
9 Kvkhoc rvtueq Jehoram nuiyc piq vyungx vlaungx bix kuex nolaungx renc htenc maq kaz wvnc vtueq Edom mungx kuex nyuip khvt kaz tueq. Kvkaq Edom rueq tsuinghez kuex tuimx wvnc tueq, yuq muinz raungwvrx nuex khvt tvkoc tvhungx vtueq yuz wvnc wuez tueq.
10 Edom mungx kuex Yuda rueq guimz lawc khung wawc mungtan lvp wvnc tueq. Jehoram kuex Yehowa piq jix vwaz tamx Tishox kuex tvdux gay ningkhvnc nuex, Libna ghaq jix rueq muinz piq kuex khawx lvlx wuez tueq.
11 Piq rueq Yuda mungx wawc kanx vjoz htenc nuex yac yuimx nawk palx juing htenc kuex tvhungx kuq ruiux, Yuda mungx nuiyc Yerusalem ghaq jix htenc muex lvmx shvlc tvyaq kuq vtueq Yehowa muex mvrax yaq kuq tueq.
12 Shvmmax Elia rueq Jehoram kox nuex luik phux shiz vkhoc wuiyq tvlaq tueq: “Mnoz kuex m-waz Hokhvmx Jehoshaphat, rvmuq ngoz ruiux mjix Hokhvmx Asa lvmx kuex phvnx muq ningkhvnc nuex Yehowa mjix m-waz Dawid Tishox rueq mnoz muex phox kuq kv-phux.
13 Kvkhoc ruec tvraung, Israel hokhvmx bix lvmx kuex phvnx vtueq, Ahab nuiyc piq yix phvnc jix hez rueq Israel kuex kvmluimx muq lvmx nuex lvmx shvlc tvyaq tueq ikhoc, Yuda mungx nuiyc Yerusalem miqsaz htenc kuex Tishox muex kvmluimx muq juing lvmx shvlc tvyaq kuq vshuiux. Mnoz rueq mhtauk nuex muinz vhvlx mnox hez htenc kuex thvt gay toq.
14 Kvkhoc rvtueq Yehowa rueq mmiqsaz htenc, msaz hez nuiyc mjuik nyuiuz hez htenc muex pinhtumc murx tvgurc ruiux, mtsak mnyvmx htenc kuex tvbac gay shuex.
15 Mshauk pumz muinz nuiyqshiz maq nuiyqshiz thuiuz sac wvnc tuiux puk thuiuz vmac vtsac kuex rvhumc tuiux.”
16 Philistin nuiyc Arab miqsaz wvyvmc kuex Ethiopi miqsaz htenc httax wuez yaq taung httoarc htenc nuex httax tuex. Yehowa rueq Jehoram kuex khvt khawc lvlc tvkoc tsuingshiq kuex tvkaz tueq.
17 Tsuingshiq rueq Yuda mungx nuex nyuip khvt ruiux hokhvmx hoc wawc tsak vnyvmx htenc kuex nyvlc laq tueq, hokhvmx waz taungx nyuiuz hez nuiyc vsaz nobung waz Ahazia maq lvy vtueq vsaz hez vganc htenc lotlaz kuex khoktep miqsaz muex thuq wvnc tueq.
18 Kvruex yimaq, Yehowa rueq puk thuiuz vmac vtsac kuex hokhvmx waz htauk nuex tvhttuiuc kuq tueq.
19 Kvruex thuiuz vsac kuex raungluingx luingx maq thuiuz wvnc vtueq wawc nueyc tanc httvmx yix maq hokhvmx waz kuex thueyc kaz tueq. Piq khung wawc miq hez rueq piq jix vwaz tamx muex ruez kuq tueq ikhoc piq tvkoc wvrkez moalx kuex tvhungx kuq muq doc.
20 Jehoram kuex piq rullungx wawc 32 nuex hokhvmx yaungx vtueq, Yerusalem nuex wawc tvjvt guimz lawc tueq. Piq thueyc kaz koq tueq ukhaq muinz yonzyex muq. Tsuingshiq rueq piq maungx kuex hokhvmx luip ruiuz khux nuex luip muq, Dawid Ghaqyungx nuex luip tueq.