13
Abija nuiyc Jeroboam Rvkhvt tueq
(1Hokh 15:1-8)
1 Israel Hokhvmx Jeroboam rueq guimz lawc tueq wawc 18 nuex, Abija kuex Yuda hokhvmx muex yaungx tueq,
2 piq rueq Yerusalem nuex wawc thuimx guimz lawc tueq. Vnyuiuz kuex Gibea ghaqyungx wawc Uriel saz Mikaia rvtueq.
Abija nuiyc Jeroboam hvlwvl nuex rvlungc rv-khvt dung wvnc tueq.
3 Abija nolaungx bix kuex 400,000 maq khvt koq tueq, Jeroboam rueq nolaungx bix 800,000 maq tvgawx khvt tueq.
4 Nolaungx bix htenc kuex Ephraim kuz maq rvhumc wuez tueq. Hokhvmx Abija kuex Zemaraim Kanx nuex duiz vtueq Jeroboam nuiyc Israel miqsaz htenc muex vkhoc ramc tueq, piq rueq, “Ngvy kvjaz tay wuez shuinz!” ngoz tueq.
5 Yehowa Israel Tishox rueq Dawid rulc phaungx ngaungx yaq bomkhvrc kuex taq ruiux, Israel kuex pattup guimz lawc vkhangx piq muex muinz, piq suiuz vsaz htenc muex muinz kuq shec tueq kuex nuimshiq rueq tuiuz muit haz?
6 Nebat saz Jeroboam rueq piq hokhvmx waz Solomon kuex khawx lvlx tueq.
7 Kvruex yimaq piq rueq khuec guez miq kungshiz kuex tvtuimx vtueq, tsuinghez kuex humc wvnc tvkoc rullungx nosaz shauk vtuiuz vtay muinz vguez dvyx doc rvtueq Solomon saz Rehoboam kuex tsuingshiq rueq vroc ruez gay tueq.
8 Majuiuc nuimshiq rueq Dawid suiuz vsaz hez muex Yehowa rueq kuq shec tueq hokhvmx vrangx vpangx kuex tvgap gawx tvkoc dvnc wuez vshuinx. Nuimshiq nuex hungc vlaungc yunghvlc nolaungx bix nuiyc nuimshiq tishox htenc yaungc kuy tvkoc Jeroboam rueq vtvhungx kuimshawx manx pung saz htenc muinz nuimshiq rulc vdvmz httax yaq.
9 Nuimshiq rueq Arun suiuz vsaz hez rvtueq Yehowa shomc waz bix nuiyc Lewi miqsaz htenc kuex yurc tuip gay tuit. Tsuingshiq rueq shuimc juing baung kvyuq pungnuk miqsaz htungx vlayx rulc rv-ngvlc shomc waz bix kuex tvduiz taq tuit. Uraq yuq muinz manx pungshiz, rvmuq ngoz ruiux khelbuenx mvshix kuex laq ruiux yuq, nuimshiq rueq nawk palx vshuinx muingc tishox htenc shomc waz kuex lvp lot shuinx rvtueq.
10 “Yuq muinz Yehowa nuiyshiq Tishox muex nuiyshiq rueq nawk palx vtueq vpiq kuex tuip gay miq. Arun suiuz vsaz hez shomc waz bix rueq muinz tsuingshiq rueq shuimc juing htenc kuex gurx pix wuez vtueq Lewi miqsaz htenc rueq tsuinghez muex romc kuq naungx wuez yaq.
11 Tsuingshiq rueq wvraungx nvp wvraungx yac vhomc vtumc phvnx nuiyc nyvmx saz kuex vpumz maq jauk vtueq shomc nawk kuq wuez yaq. Tsuinghez rueq htungx vlayx rulc rv-ngvlc vsawc humpanx htauk nuex wanx kuex shomc kuq vtueq, wvraungx yac tek kuimshawx wvrkok tochuing htauk wawc wvrkok htenc kuex tvluic wuez yaq. Yehowa rueq nvr tueq rulc rv-ngvlc nuiyshiq rueq shuimx vshix, yuq muinz nuimshiq rueq vpiq kuex tvdux gay vshuinx.
12 Tishox vpiq kuex naungshiq walaungx rvtueq vpiq shomc waz bix muinz bolic htenc tauk raz tueq vruex yuq httax yaq ningkhvnc nuex, bolic tuimc tvkoc tvyoalc yoalx httax yaq nuiyc nuimshiq kuex khvt tvkoc nuiyshiq kuex gvl yaq. Kvkhoc rvtueq Israel miqsaz htenc lex, Yehowa nuimshiq jix vwaz tamx Tishox kuex nauk khvt kaz! Nuimshiq rueq taungx lot shuinx rvmuq!”
13 Kvruex baunglaung Israel nolaungx bix rueq Yuda nolaungx bix kuex htvlx rvhumc khvt muex kvtsaq hvt nuex Jeroboam rueq piq nolaungx bix wvyvmc kuex Yuda nolaungx bix yix kox maq kvhttuiyq vtueq khvt tvkoc tvkaz tueq.
14 Yuda miqsaz htenc rueq tvroz nuex lawc koq tueq vtuimc gay rvhumc tueq kuex khiz wuez tueq. Kvkaq tsuingshiq kuex Yehowa rueq romc kuy tvkoc thoz wuez tueq, shomc waz bix rueq muinz bolic htenc kuex tuimz tueq.
15 Yuda miqsaz kuex Abija rueq shunshvlx rex wuez vtueq khvt tueq; Tishox rueq Jeroboam nuiyc Israel nolaungx bix htenc kuex khvt taungx gay tueq.
16 Israel miqsaz htenc kuex Yuda miqsaz kox wawc yuz wvnc koq tueq, Tishox rueq Yuda miqsaz htenc muex tvtaungx wvnc lvmx tvlvp tueq.
17 Abija nuiyc piq nolaungx bix rueq Israel miqsaz htenc kuex huyx hut khvt taungx gay koq tueq, vhvlx pinhtumc Israel shvrvyx bix 500,000 kuex thvt gay tueq.
18 Yuda miqsaz htenc kuex Yehowa tsuingshiq jix vwaz tamx Tishox muex tvluimc ningkhvnc nuex Israel miqsaz htenc kuex tvtaungx gay tueq.
19 Abija rueq Jeroboam nolaungx bix kuex yurc khvt vtueq, piq ghaqyungx wvyvmc rvtueq Bethel, Jeshana, Ephron nuiyc kvruex hep wawc miqghaq htenc kuex khvt lvp gay tueq.
20 Jeroboam kuex Abija rueq guimz lawc tueq baunglaung htenc nuex piq luimc vkawc kuex yez lot muq yomx wvnc tueq. Tvsuip nuex Yehowa rueq piq muex murx tvgurc vtueq thvt gay tueq.
21 Yuq muinz Abija kuex luimc vkawc httaz hvlc httax wvnc tueq. Kvkhoc rvtueq piq kuex vtaungx nyuiuz hez rokshiz rac nyuiuz bvlic, vsaz miqwaz sahez 22 nuiyc yalxjuik sahez rokshiz rac tvruk httax tueq.
22 Abija piq rueq jungx wvnc tueq kvjaz nuiyc piq rueq shuimx wvnc tueq yauk shuimc htenc nuiyc kvjungx yaq piq mvnphvnc khuec vlvmz htenc kuex Shvmmax Eddo Mvnphvnc luik nuex wuiyq tvtsuingc shec tueq.