11
Dawid kuex Israel nuiyc Yuda nuex Hokhvmx Yaungx tueq
(2Sam 5:1-10)
1 Israel miqsaz htenc lotlaz kuex Hebron nuex httax yaq Dawid kox nuex kaz vtueq piq muex ngoc, “Nuiyshiq kuex mngvmx nuiyc mtvguiy rvtiq.
2 Lvy wvnc tueq nuex, Sholu kuex naungshiq hokhvmx muex yaungx wvnc tueq jauz nuex phuex, Israel miqsaz kuex ralx khvt ralx lungc nuex mnoz rueq shunshvlx wvnc toq, Yehowa m-Tishox rueq muinz mnoz kuex vpiq miqsaz htenc shunshvlx vtueq guimz lawc jix waz muex yaungx tuiux ngoz tueq bomkhvmc kuq shec kv-phux,” ngoz tueq jungx wuez tueq.
3 Kvkhoc rvtueq Israel miqsaz walaungx bix lotlaz kuex Hebron nuex Hokhvmx Dawid kox nuex kaz tueq. Piq rueq tsuinghez rulc vsawc bomkhvmc tvhungx vtueq phunox rvyaungc tueq, tsuinghez rueq muinz piq muex ruimruimx kuq ruiux, Yehowa rueq Samuel maq raz tueq bomkhvmc kuq shec tueq rulc rv-ngvlc piq muinz Israel hokhvmx muex yaungx wvnc tueq.
4 Hokhvmx Dawid nuiyc Israel miqsaz lotlaz rueq Yerusalem ghaqyungx kuex khvt kaz tueq. Kvtanc jauz kvruex mungx kuex Jebu ngoz yaq, kvruex yuq ghaqshungc httax jix Jebusi miqsaz httax yaq shauk dvyx doc rvtueq.Ref 11:4 Yosh 15:63; Phoc 1:21
5 Jebusi miqsaz htenc rueq ghaqyungx mungx nuex mkaq muinz nyuip lvp tuiux rvmuq ngoz tueq Dawid muex ngoz tueq, yuq muinz Dawid rueq tsuingshiq Zion nolaungx ghaqshungc kuex khvt taungx gay ruiux, kvruex ngoc, “Dawid Ghaqyungx,” ngoz tueq muingc dung wvnc tueq.
6 Dawid rueq, “Jebusi miqsaz washiz kuex kungkhux thvy lvp jix waz kuex nolaungx bix guimz lawc jix waz muex yaungx tuex!” ngoz tueq jungx tueq rulc rv-ngvlc, Zeruia saz Joab kuex lvmx khux nuex khvt wvnc jix waz ningkhvnc nuex guimz lawc jix vyungx muex yaungx wvnc tueq.
7 Dawid kuex nolaungx ghaqshungc mungx kvyuq httaz waungc ningkhvnc nuex “Dawid Ghaqyungx,” ngoz tueq muingc tueq.
8 Piq rueq kanx maq shaldungc kox ghaq tvmvrc htawc tueq baung kvmaq ghaqyungx kuex tec phaungc wvnc tueq, Joab rueq ghaqyungx wawc kvjungx yek yaq kuex tvhvlc guirx tueq.
9 Dawid hungc vlaungc kuex jvt wvnc jvt wvnc rvtueq, yvmx khoc lac ngoz ruiux lec Tvphaungc Tvsuip Yehowa kuex piq rulc vdvmz httaz ningkhvnc nuex rvtueq.
Muingc Dung yaq Dawid Shvrvyx Bix
(2Sam 23:8-39)
10 Vruex kuex muingc dung yaq Dawid shvrvyx bix muingc wvlc tvtsuingc rvtueq. Yehowa rueq bomkhvmc taq tueq rulc rv-ngvlc kvjungx yaq Israel miqsaz htenc rulc vdvmz nuex piq hokhvmx yaungc tvkoc tsuingshiq rueq romc kuq naungx ruiux, piq mungtan hungc vlaungc tvhttax wvnc tueq.
11 Hakmon taungx wawc Jashobeam kuex walaungx waz thuimxRef 11:11 Vlayc vruez vkez vshiz nuex; “Waz thuimx” Hebre nuex “Waz rok thuimx” (2Sam 23:8 nuex lawc shuinz). wawc vphaungc shauk shauk waz rvtueq. Piq rueq laukshiz rv-khvt tueq nuex dvyx miq 300 kuex piq paq maq shuiuq thvt gay tueq.
12 Kvmaq Aho taungx wawc Dodo saz Eleazar muinz muingc dung yaq shvrvyx “Waz thuimx” nuex lomx yaq.
13 Piq kuex Dawid kox nuex raz tueq Pa Dammim maq rv-khvt rvlungc tueq nuex Philistin miqsaz htenc kuex khvt jix rvtueq. Israel miqsaz htenc yuz wvnc phaungc yaq nuex piq kuex nyenz saz tsvmz vyuingc wuik vshiz nuex httax yaq,
14 kvkaq piq nuiyc piq miq hez kuex wuik mungx baung maq jvp vtueq Philistin miqsaz kuex khvt tueq. Yehowa rueq piq muex yunghvlc taungx wvnc lvmz kuq tueq.
15 Raungnuiyq shiz Philistin miqsaz kungshiz Rephaim Warc tvnx nuex jerak tec vtueq httax yaq nuex, vyungx vlaungx waz 30 wawc waz thuimx kuex Dawid httax yaq Adullam ghaqluix hep wawc lungshaung vshiz kvyuq kaz tueq.
16 Kvruex baunglaung Dawid kuex ghaqluimx htauk wawc nolaungx ghaqshungc kvyuq httax yaq, Philistin miqsaz kungshiz rueq Betlehem ghaq kuex nyvlc lvp gay tueq.
17 Dawid rueq vyuimx roc vtueq, “Betlehem ghaq palx kaluix hep yuix jumx wawc vnuingc muex yuix svrc shiz tanc miq washiz shiz rueq lvmc kuy wvnc tvkoc ngaz rueq pinhtumc raungc raq vshaungx!” ngoz tueq kvbot tueq.
18 Shvrvyx muingc dung yaq waz thuimx kuex Philistin miqsaz jerak mungx maq nyuip yanz wvnc vtueq, yuix jumx wawc yuix khuz wvnc vtueq Dawid muex kuq waung tueq. Yuq muinz piq rueq kvruex nuingx muq; kvkhoc ruec tvraung Yehowa muex shomc kuq ruiux waz vhvlx ngoz tueq ruiuc vtueq,
19 “Ngaz rueq yuix vruex mkaq muinz nuingx mauk! Vruex kuex miqmac thuiuzthuic maq khvmc jix hez tvguiy nuingx gay ikhoc muex yaungx tuex!” ngoz tueq. Kvkhoc rvtueq piq rueq yuix kuex nuingx khvmc muq rvtueq. Kvruex kuex muingc dung yaq shvrvyx waz thuimx rueq khvmc tueq lvmz rvtueq.
20 Joab nox Abishai kuex muingc dung yaq “Shvrvyx waz rok thuimx” Ref 11:20 Vlayc vruez vkez vshiz nuex; Waz rok thuimx: Hebre nuex Waz thuimx ngoz tueq. wawc miqlaungx rvtueq. Piq rueq miq 300 kuex piq paq maq shuiuq thvt gay ningkhvnc nuex, piq kuex “Waz rok thuimx” phungc nuex muingc dung yaq waz yaungx wvnc tueq.
21 Piq kuex shvrvyx waz rok thuimx phungc wawc muingc jungc yunghvlc ningkhvnc nuex tsuinghez muex walaungx yaungx wvnc tueq, yuq muinz shvrvyx “Waz thuimx,” tanc khvnc muingc dung muq.
22 Kabzeel ghaq wawc muingc dung yaq nolaungx washiz kuex Jehoiada saz Benaia rvtueq; piq rueq khvmc vtueq shuimx wvnc tueq lvmz paunghvlc httax yaq wawc wvyungc wvloayc Moba shvrvyx waz nueyc kuex thvt gay tueq. Laukshiz tsuik hek dvy yaq raungnuiyq ghaqluix nuex nyuip waung vtueq hangsic vshiz kuex thvt gay tueq.
23 Piq rueq vshauk vyungx, vloayc kox meter 2 luz yaq piq rueq paq yunghvlc shuimc jix Ejip miq washiz kuex thvt gay tueq. Benaia rueq wungrawc maq mulx khvt ruiux Ejip miq waz yauk wawc paq kuex nyvlc vtueq, kvruex maq dvyx piq kuex thvt gay tueq.
24 Vruex kuex shvrvyx “Waz rok thuimx” phungc nuex washiz lomx yaq Benaia shvrvyx laqkongx kvmungx rvtueq.
25 Piq kuex shvrvyx “Waz rok thuimx” phungc nuex muingc dung yaq miq rvtueq, yuq muinz shvrvyx “Waz thuimx” tanc khvnc kuex muingc dung muq. Dawid rueq kvruex waz kuex piq bvmc jix hez shunshvlc jix waz muex tvyaungc taq tueq.
26-47 Vruex hez kuex shvrvyx bix vganc htenc rvtueq:
Joab nox Asahel
Betlehem wawc Dodo saz Elhanan
Harod ghaq jix Shammot
Pelet ghaq jix Heleza
Tekoa ghaq jix Ekkesh saz Era
Anathot ghaq jix Abiezer
Husha ghaq jix Sibbekai
Aho ghaq jix Elai
Netopha ghaq jix Maharai
Netopha ghaq jix Baana saz Heled
Benjamin mungx Gilead ghaq jix Ribai saz Ethai
Pirathon ghaq jix Benaia
Gaash hep warc tvnx wawc Hurai
Arba ghaq jix Abiel
Bahurum ghaq jix Azmawet
Shaalbon ghaq jix Eliab
Gizon ghaq jix Hashem Ref 11:26-47 Vkvmx juing vkez nuex Hashem; Hebre nuex Hashem sahez ngoz tueq.
Harar ghaq jix Shagee saz Yonathan
Harar ghaq jix Sakar saz Ahiam
Ura saz Eliphal
Mekera ghaq jix Hepher
Pelon ghaq jix Ahija
Karmel ghaq jix Hezro
Ezbai saz Naarai
Nathan nox Yoel
Hagri saz Mibhar
Ammon ghaq jix Zelek
Joab yaung vpaq shuimc kuy jix Beerot ghaq jix Naharai
Jattir ghaq jix Era nuiyc Gareb
Hitti miqsaz Uria
Ahalai saz Zabad
Shiza saz Adina (piq rulc vdvmz httax jix nolaungx bix waz 30 rac Ruben phvnx walaungx bix nuex lomx yaq waz rvtueq)
Maaka saz Hanan
Mithan ghaq jix Joshaphat
Ashtera ghaq jix Uzia
Aroer ghaq wawc Hotham saz Shamma nuiyc Jeiel
Tiza ghaq jix Shimri saz Jediael nuiyc Joha
Mahawa ghaq jix Eliel
Elnaam saz Jeribai nuiyc Joshawia
Moba mungx wawc Ethamar
Zoba ghaq jix Eliel, Obed nuiyc Jaasiel rvtueq.