TVTSVMC 91
1 Kvkhup wungx tvkoc Yehowa kox nuex httuiuc kay jix waz ukhaq rueq muinz,
Tvphaungc Tvsuip Waz rueq tv-guing tvwungx yaq khung nuex
httax jix ukhaq rueq muinz,
2 “Mnoz kuex ngvy kvgawx juing nuiyc kvguing kvwungx juing waz rvtoq.
Mnoz kuex ngvy Tishox; ngaz kuex
mnoz muex tvluimc vphaungx,” ngoz tueq vpiq muex jungx lot shuex.
3 Vpiq rueq kvkhic muq phvnx kuilc daz lotlaz nuiyc,
tvthueyc lot yaq vthuiuz vsac lotlaz wawc mnoz kuex tvkhup wungx kuq kv-phux.
4 Vpiq rueq vraungx kungx htenc
maq mnoz kuex puingc kuq kv-phux;
vpiq rueq lawc mawc yaq nuex mnoz kvwungx httax lvp tuiux;
vpiq tvmtuing rueq mnoz kuex tvguing tvwungx vtueq nuiyc tvguing tvgawx kv-phux.
5 Raungwvrx nuex rvhumc yaq vhiz juing yvmx yuq muinz,
raungnuiyq nuex huingc rvhek laz maq khvt lvmx yuq muinz,
6 raungnyauk nuex yaungx wvnc yaq suk-ric jarkanx yuq muinz,
raungnuiyq nuex honc bac jix rueq thvt wvnc ruiux muinz
kvruex htenc kvmac mnoz hiz rac muq.
7 Mhep nuex miq hingshiz,
mtvroz nuex miq munshiz rul thueyc wvnc ruiux muinz,
mnoz kuex heq kv-phux rvmuq.
8 Layx bac jix htenc rueq mkhoc
phvnx murx lac gurc yaq nguinx kuex mnoz rueq khiz lawc wvnc shuiux.
9 Mnoz rueq Yehowa kuex mnoz tv-guing gawx jix waz muex nuiyc
Johvlc Pinhtumc Waz kuex mnoz kvwungx juing muex tvyaungc vshuiux,
10 kvkhoc rvtueq thuimkux kuilc daz
kuex mnoz rvhumc tuiux rvmuq,
yauk laungc yalawx lvmx muinz m-yuimx nuex nyek wvnc tuex rvmuq.
11 Khuemx kaz tuiux baung ruip
saz nuex mnoz muex tvguing tvwungx shuex nuiyc mnoz muex
tvkhup wungx kuy tvkoc Tishox rueq vpiq raungkamx bix htenc muex nvr tueq.Ref 91:11 Mat 4:6; Luk 4:11
12 Lung htenc nuex m-yaz kuex htuiuz muq rvshuiux
tsuingshiq yauk htenc maq mnoz kuex tenz wvnc shuex.Ref 91:12 Mat 4:6; Luk 4:11
13 Hangsic htenc nuiyc puiuc htenc,
bac hvlc hangsic nuiyc vyangx vhttax puiuc htenc htauk nuex
mnoz rueq nuiuz khuemx tuiux.Ref 91:13 Luk 10:19
14 Tishox rueq, “Ngaz muex lungwawc
jix htenc kuex ngaz rueq palc shaungx,
ngaz ngoc Yehowa rvtueq ngoz tueq kvjungc jix htenc muex
ngaz rueq tvguing tvwungx kuq shaungx.
15 Tsuingshiq rueq ngaz gvl ruiux yuq, ngaz rueq tvralc shaungx;
tsuingshiq kuilc daz rvhumc tuex nuex ngaz kuex
tsuingshiq rulc vdvmz httax taungx.
Ngaz rueq tsuingshiq kuex palc
wvnc vtueq tvtsanc nganc shaungx.
16 Ngaz rueq tsuingshiq rullungx kuex tvluz kuq shaungx,
ngaz rueq tsuingshiq kuex palc wvnc shaungx,” ngoz tueq jungx tueq.