TVTSVMC 84
1 Tvphaungc Tvsuip Yehowa lex, Mshomc Yuimx kuex ngaz rueq mtanc lac lungwawc vshaungx!
2 Kvruex yuq ngaz pinhtumc httaz roc hvlc!
Yehowa Mshomc Yuimx mungx nuex httaz lvp tvkoc
ngaz rueq rvnphvnx vshaungx.
Ngvy shauk pumz wvtaungx maq
vtvraungx Tishox muex ngaz rueq vkoz vkez maq shix ngoyx vtaungx.
3 Ngvy hokhvmx nuiyc ngvy Tishox rvtoq,
Tvphaungc Tvsuip Yehowa lex,
wuruiyx shalx sahez rueq doc muinz mshomrawx hep nuex
tsuingshiq jejez wuez yaq,
wuna jawk htenc rueq muinz
tsuingshiq tvkoc yuimx lvp wuez yaq,
kvkhoc tsuingshiq saz sadawz htenc kuex kvruex baung htenc
kvyuq taq wuez yaq.
4 Mshomc Yuimx mungx nuex mnoz
muex mkaq muinz tvtsvmc shix vtueq,
httaz jix htenc kuex pinhtumc thuinhvlx wuez yaq.
5 Mnoz kox wawc hungc vlaungc lvp wvnc vtueq,
Zion Kanx nuex waungc tvkoc thuinz tvthuiuz jix htenc kuex
pinhtumc thuinhvlx wuez yaq.
6 Tsuingshiq kuex htuiz rawk hvlc
Baka warc tvnx yanz wvnc tueq nuex yuix saz ruilx htenc
dungc juing baung yaungx wvnc tueq,
yunc phaungc raungyunx vtueq yuix jumx htenc tvmvrc wvnc tueq.
7 Tsuingshiq kuex lvmx khuemx wvnc hungc vlaungc lvp wvnc rvtueq;
Zion Kanx htauk maq tishox htenc muex Tishox kuex
tsuingshiq rueq khiz waung tuex.
8 Tvphaungc Tvsuip Yehowa Tishox
lex, ngvy vjux thoz bomc kuex tay kuq koq.
Yaku Tishox lex, tay shuiuz!
9 O Tishox lex, mnoz rueq vthvl shec hokhvmx waz ngoz yaq,
nuiyshiq hokhvmx waz muex ruimruimx kuq shuiuz.
10 Mshomc Yuimx nuex nuiyqshiz
httax vtix kuex vbez nuex raungnuiyq hingshiz httax tix
htauk nuex muinz vhvlx pinhtumc rvtueq;
Layx bac waz yuimx nuex httax taungx htauk nuex
Tishox yuimx kaluix daungx nuex jvp kuex jvnc vtueq roc vshaungx.
11 Yehowa kuex naungshiq muex
tvkhup wungx kuy jix ngauz vngax yunghvlc hokhvmx rvtueq,
menjenc thuinz maq tvtsanc nganc vtueq naungshiq muex ruimruimx kuq yaq.
Vpiq rueq vlvmx yauk shuimc jix htenc muex vhvlx phvnx kuy
tvkoc tvdux gay yaq rvmuq.
12 Tvphaungc Tvsuip Yehowa lex,
mnoz muex tvluimc jix htenc kuex pinhtumc thuinhvlx wuez yaq!