TVTSVMC 57
1 Ngaz mnoz nuex kvwungx tvkoc httuiuc kaz raungx ningkhvnc nuex,
O Tishox lex, menjenc kuq koq, ngaz muex menjenc koq.
Raunghtiq raungguil lvy wvnc nuex httuiuc laz,
mraungx kungx khung nuex ngaz kvwungx vtaungx.Ref 57:1-11 1Sam 22:1; 24:3
2 Johvlc Pinhtumc Tishox ngoz yaq, ngaz muex rax yaq phvnx ruip
rawx romc kuy jix Tishox kuex ngaz rueq gvl vshaungx.
3 Vpiq rueq raungmungx maq tvralc vtueq ngaz kuex palc wvnc phuex;
ngaz muex tuinghtuing jix htenc kuex yurc gay shuex.
Tishox rueq vpiq phaungx ngaungx yaq lungwawc thuinz nuiyc
tvmtuing kuex ngaz muex tvkhic kuq phuex.
4 Miq ngvmx phuiuz jix hangsic htenc ikhoc
ralx htenc rueq ngaz tvroz tuimc wvnc rvhumc vtaungx.
Tsuingshiq wac htenc kuex paq nuiyc laqsvnz htenc ikhoc rvtueq,
tsuingshiq tvlix htenc kuex httehvlc yaung ikhoc rvtueq.
5 O Tishox lex, raungmungx nuex mnoz yungx luz vtuiux nuiyc
ghaq htauk nuex muinz, mnoz ngauz vngax kuex mdung wvnc kueq.
6 Ngvy ralx htenc rueq ngvy lvp muex lvmz nuex jak kuex juinc shec tueq;
ngaz kuex kuilc daz rvhumc vtaungx.
Ngvy lvmx nuex tsuingshiq rueq htawkhurx htuz taq shec tueq,
yuq muinz tsuingshiq dvyx kvyuq dvy wvnc wuez tueq.
7 O Tishox lex, ngaz kuex tvsawc rix kvmx vtaungx;
ngaz rueq mnoz muex shic vngoyc maq tvtsvmc phaungx!
8 O ngvy siyac lex, kvsvmc kuiuz!
Ngvy torox nuiyc toloz lex, kvsvmc kuinz!
Shalx muinz ngaz rueq tvsvmc shaungx.
9 O Yehowa lex, miqphvnx htenc hvlwvl maq mnoz muex
ngaz rueq kejux vyungx ngoz vshaungx.
Miq htenc htumc nuex ngaz rueq mnoz muex tvtsvmc phaungx.
10 Mnoz phaungx ngaungx yaq lungwawc thuinz kuex
raungmungx nuex htanc yaq;
mnoz tvmtuing lvmx kuex raung-wuilx wanc nuex httuiuc laz htanc yaq.
11 O Tishox lex, raungwawc mnoz yungx luz vtuiux lvmx nuiyc
ghaq lotlaz nuex muinz mnoz ngauz vngax dung yaq kuex tvkhic shuiuz.