8
Wvrkok htenc Tvdaungc tueq
1 Yehowa rueq Moshe muex ngoc,
2 “Arun rueq wvr htung kvyuq wvrkok mvshix kuex tvdaungc ruiux yuq, wvrkok htenc maq vluic kuex wvrkok htung max kvyuq tvdungc rax,” ngoz tueq Arun muex jungx shuiuz.Ref 8:1-4 Dw 25:31-40, 37:17-24
3 Arun rueq muinz kvkhoc phvnx vtueq wvrkok htung maq vluic kuex max kox nuex luic kay tvkoc wvrkok htenc kuex tvdaungc shec tueq.
4 Yehowa rueq Moshe muex tvkhic kuq tueq shvmx kvkhoc, wvrkok htung wvpumz tuimx kuex gaq kox maq raz tueq raungx kox nuex httuiuc laz kuimshawx maq tvhungx jek guirx shec tueq.
Lewi Miqsaz kuex Tvsawc lvmz nuiyc Lekuy lvmz
5 Yehowa rueq Moshe muex ngoc,
6 “Lewi miqsaz htenc kuex Israel miqsaz htenc wawc pungx thvlc thvl vtueq, tsuinghez tvkoc tvsawc nawc yauk shuimc kuex,
7 lvmx kaq nuex httax yaq rulc rv-ngvlc: tvsawc nawc juing nuex seng yaq yuix kuex tsuinghez shauk gvnz htauk kvyuq buit vtueq, gvnpumz wawc vmul htenc kuex sulx gay ruiux, khvy htenc kuex huy rax. Kvkaq tsuingshiq kuex nawk palx htungx maq vsawc yaungx wvnc tuex.
8 Kvruex yimaq tsuingshiq rueq manx roalc pung vshiz rac ruiy vwungx ikhoc muex olip puiz maq vshot wungwanx maq shomc kuy juing kuex lvmc lvy rax; mvrax kvdawc shomc kuy juing muinz manx pung vshiz lvmc lvy rax.
9 Kvruex yimaq Israel miqsaz lotlaz kuex tvtuimx ruiux, Lewi miqsaz htenc kuex ngaz httax yaq Tap khaungkac nuex jvp rax.
10 Israel miqsaz htenc rueq Lewi miqsaz htenc khux poz htenc htauk kvyuq yauk kuex tvdaungc rax.
11 Lewi miqsaz htenc kuex Israel miqsaz laung ngaz muex yauk noalc htep ikhoc tvyaungc vtueq Arun rueq lekuy rax. Ekvkhoc maq tsuingshiq rueq ngvy yauk shuimc kuex shuimx lvp shuex.
12 Kvruex yimaq Lewi miqsaz htenc rueq manx roalc pungnueyc khux poz nuex yauk kuex tvdaungc wuez rax; Lewi miqsaz htenc kuex nawk palx htungx maq tvsawc nawc tvkoc mvrax kvdawc shomc kuy muex manx roalc pung vshiz maq muinz, wvr maq jauk shomc kuy muex vganc manx roalc pung vshiz maq muinz shomc kuy rax.
13 “Lewi miqsaz htenc kuex ngaz muex yauk noalc htep ikhoc tvyaungc vtueq lekuq ruiux, Arun nac sahez rueq tsuinghez kuex lawc mawc shunshvlc rax.
14 Ekvkhoc maq tsuinghez kuex ngaz rueq guimz yaq miq muex yaungc tvkoc Israel miqsaz wawc thvl tvdung wvnc shuiuz.
15 Mnoz rueq Lewi miqsaz htenc muex tvsawc nawc kuy nuiyc lekuy lvmx kuex shuimx lot ruiux yuq jix, tsuinghez rueq Tap nuex yauk shuimx lvp wuez shuex.
16 Israel miqsaz pekhux jix pumz phuex tsuinghez kuex ngvy tvkoc thvl wvnc tueq ningkhvnc nuex tsuinghez kuex ngaz muex seng yaq.
17 Ngaz rueq Ejip mungx wawc pekhux htenc tvthueyc gay tauk nuex Israel miqsaz pekhux htenc nuiyc nyvmx saz nyuiuz phaungc htenc kuex ngaz rueq guimz vtueq pungx thvlc thvl taq wvnc tauk.Ref 8:17 Dw 13:2
18 Majuiuc ngaz rueq Israel miqsaz pekhux waz httax yaq lotlaz pumz phuex Lewi miqsaz htenc kuex thvl wvnc vtueq,
19 Israel miqsaz kox wawc yauk noalc ikhoc tvyaungc vtueq Arun nac sahez yauk nuex lekuq tauk, tsuinghez kuex Israel miqsaz pumz phuex Tap nuex yauk shuimc rax, Israel miqsaz kuex Vsawc Baung kvruex hep nuex kvnvp vtueq thuimkux rvhumc muq tvkoc tsuinghez rueq tvkhup wungx kuy rax,” ngoz tueq jungx tueq.
20 Yehowa rueq Moshe muex nvr tueq rulc rv-ngvlc, Moshe, Arun nuiyc Israel miqsaz htenc rueq Lewi miqsaz htenc kuex lekuq wuez tueq.
21 Lewi miqsaz htenc kuex miqmac shauk vgvnz tvsawc nawc ruiux, khoz vkhvy htenc kuex huy lot yix Arun rueq tsuinghez kuex Yehowa muex yauk noalc htep muex tvyaungc vtueq lekuq tueq. Tsuinghez tvkoc tvsawc nawc yauk shuimc muinz shuimx kaz wuez tueq.
22 Israel miqsaz htenc rueq Lewi miqsaz nuex seng vtueq Yehowa rueq nvr yaq rulc rv-ngvlc shuimx kaz wuez yaq. Kvkhoc rvtueq Lewi miqsaz htenc kuex Arun nac sahez rueq shunshvlx lawc mawc kuy ningkhvnc nuex Tap nuex yauk shuimx wuez yaq.
23 Yehowa rueq Moshe muex ngoc,
24 “Lewi phvnx wawc rullungx wawc roknueyc rac wawc bv-ngac httuiuc tueq jix kuex ngaz httax yaq Tap nuex yauk shuimx vtueq,
25 rullungx wawc rok bv-ngac httuiuc ruiux yuq yauk shuimc wawc thauk kay rax.
26 Rullungx wawc rok bv-ngac jvnc miq kuex Tap nuex seng yaq yauk shuimc kuex taungnyuing sanox muex romc kuq ruiux yuq muinz, miqmac rueq khvmc vtueq shuimc mvy muq. Mnoz rueq vkhoc phvnc juing tvrac htenc rulc rv-ngvlc Lewi miqsaz htenc muex yauk shuimc kuex tvhungx htaungx kuy lvmz rvtueq,” ngoz tueq jungx tueq.