6
Naziri rueq Phvnc juing Tvrac htenc
1 Yehowa rueq Moshe maq raz tueq,
2 Israel miqsaz muex vkhoc jungx tvkhic kuq tueq. Miqwaz rvmuq ngoz ruiux yalxjuik kuex Naziri ngoz yaq bomkhvmc nuex rvkhauk laz nyuip vtueq, miqmac pumz kuex Yehowa muex lekuq ruiux yuq,
3 kvruex waz rueq vjuk vpawc juing joal vtsvmz kuex koayc rax. Piq rueq svpiq tix nuingc mvy muq, svpiq thuey httuingx, rvmuq ngoz ruiux thuey shanx muinz svy mvy muq.Ref 6:3 Luk 1:15
4 Piq kuex Naziri nuex nyuip tuex wawwawx svpiq thuey vrawz, vkhuix maq phaungc vtueq svpiq ruiuz wawc yvmx muinz svy mvy muq.
5 Piq kuex Naziri nuex nyuip vtueq bomkhvmc taq shuex baunglaung piq khux mul kuex vgvnc vsulc gay mvy muq. Piq rueq Yehowa muex lekuy bomkhvmc taq tueq baunglaung piq khux mul kuex vgvnc vsulc gay mvy muq.
6-7 Piq khux mul kuex piq pumz Tishox muex lekuq gay tueq lvmz tvtsuingc tuiuz juing rvtueq, kvkhoc rvtueq piq pumz kuex tvshuy shac muq tvkoc miq maungx hep nuex kay mvy muq, vnyuiuz, vwaz, vphuz vnox, rvmuq ngoz ruiux vnyaz vnox thueyc kaz ruiux muinz kvnvp mvy muq.
8 Piq kuex Naziri nuex nyuip tueq wawwawx Yehowa muex lekuy yoalx miq rvtueq.
9 Piq hep kvyuq miq washiz kuex huingc rvhek maq thueyc kaz vtueq, Naziri waz rueq lekuq shec tueq khux mul kuex shuy shac kaz ruiux yuq, raungx mvshix tup tvlvy lot yix maq jix khux mul kuex sulc gay rax. Kvkaq piq kuex nawk palx htungx maq kvsawc nawc wvnc tuex.
10 Raungx tvjvt vngoz raungnuiyq piq rueq hituiuc vnueyc rvmuq ngoz ruiux baro vnueyc kuex Yehowa httax yaq Tap kaluix nuex httax yaq shomc waz kox nuex lvmc lvy rax.
11 Piq kuex miq maungx nuex kvthoay vtueq shuy shac kaz tueq ningkhvnc nuex shomc waz rueq piq laung tvsawc nawc yauk shuimc kuy tvkoc wushawx vshiz kuex mvrax dawc tvkoc, kvjungx yaq vshiz kuex wvr maq jauk shomc kuy tvkoc shomc kuy rax. Kvruex raungnuiyq piq khux mul kuex Yehowa muex lekuy juing,
12 Naziri nuex nyuip jix muex miqmac pumz kuex lauk shiz lekuy yek rax. Vkhux mul shuy shac kaz tueq shex ningkhvnc nuex kungkhux wawc bomkhvmc vtaq kuex bac kaz shex. Piq rueq mvrax kvdawc shomc kuy muex wawc shiz khelbuenx saz kuex lvmc lvy rax.
13 Naziri nuex nyuip jix kuex bomkhvmc vtaq htumx kaz ruiux yuq, shuimc juing yauk shuimc kuex vkhoc rvtueq. Piq kuex Tap kaluix daungx nuex kaz vtueq,Ref 6:13-21 Kamx 21:23-24
14 Yehowa muex nawk kuy tvkoc wvr maq jauk shomc kuy tvkoc vmac vtsac vguez wawcshiz khelbuenx pung vshiz, mvrax kvdawc shomc nawk kuy tvkoc vmac vtsac vguez khelbuenx vshiz, lux rvyaungc shomc kuy tvkoc vmac vtsac vguez khelbuenx pung vshiz kuex lvmc lvy rax.
15 Olip puiz nuiyc wungwanx tvshot vtueq vtvhungx wisiz lomx muq wanx poz htenc nuiyc olip puiz nyvt yoalx wisiz lomx muq wanx phux htenc vhtawc taq boarx kvmuinz, kvmaq hulawx ruiy vwungx phvnx nuiyc svpiq tix maq muinz shomc kuy rax.
16 Shomc waz rueq yauk noalc lotlaz kuex Yehowa muex shomc kuy tvkoc mvrax kvdawc shomc kuy juing nuiyc wvr maq jauk shomc kuy juing kuex shomc kuy rax.
17 Piq rueq lux rvyaungc shomc kuy juing khelbuenx pung kuex shomc kuq ruiux yuq, wanx boarx kvmuinz shomc kuy rax; kvkaq dvyx ruiy vwungx phvnx nuiyc svpiq tix kvmuinz shomc kuy rax.
18 Naziri nuex nyuip jix waz rueq Tap kaluix daungx nuex miqmac khux mul kuex sulx vtueq, lux rvyaungc shomc kuq yaq wvr kvyuq juiuz gay rax.
19 Kvruex yimaq shomc waz rueq lumc yoalx khelbuenx vphauk ngvmx kvrulc vdvmz boarx wawc wanx poshiz, wanx phushiz kuex Naziri waz yauk nuex htawc kuy rax.
20 Shomc waz rueq yauk noalc htenc kuex Yehowa muex yauk noalc htep muex tvyaungc shomc kuy rax; vsawc shomc kuy juing htauk nuex lvy vtueq, tvrac rulc rv-ngvlc shomc waz rueq guimz yaq khelbuenx vkhuiuq ngvmx nuiyc vwex ngvmx kuex shomc waz muex kuy juing rvtueq. Kvruex yimaq jix Naziri waz rueq svpiq tix kuex nuingx lvp shuex.
21 Kvruex kuex Naziri nuex nyuip jix tvkoc htvp htaz tvrac rvtueq; yuq muinz miq washiz kuex Naziri muex yaungc tvkoc bomkhvmc vtaq shomc kuy juing htauk nuex jvnc vtueq shomc kuy muex bomkhvmc taq ruiux kuex, kvkhoc bomkhvmc rulc rv-ngvlc shuimc kay rax.
Shomc Waz Hez rueq Ruimc Vruimx Kuq
22 Yehowa rueq Moshe maq raz tueq,
23 Arun nac sahez rueq Israel miqsaz muex vkhoc ruimruimc kuy rax ngoz tueq nvr tueq:
24 Yehowa rueq nuimshiq muex
ruimruimx kuq ruiux, mtvkhup wungx shueq:
25 Yehowa rueq nuimshiq muex
menjenc kuq ruiux, kejux mkuq shueq:
26 Yehowa rueq nuimshiq kuex lawc
vtueq muingc jungc kejux kuq ruiux, nomic kuex mkuq kv-phuinx.
27 Yehowa rueq ngoc, “Shomc waz bix rueq Israel miqsaz muex ruimruimc kuy tvkoc ngvy muingc kuex jungx ruiux yuq, ngaz rueq tsuingshiq muex ruimruimx kuq shaungx,” ngoz tueq jungx tueq.