4
Lewi Phvnx Wawc Kohat Taungx Hez Yauk Shuimc
1 Yehowa rueq Moshe muex ngoc,
2 Lewi phvnx wawc Kohat taungx hez wawc,
3 rullungx wawc rokthuimx maq wawc rok bv-ngac nuex httuiuc laz Yehowa httax yaq Tap nuex yauk shuimc taungx lot jix miqwaz rulx htenc kuex vtaungx muingc tv-phvnc muingc lvmz shuiuz.
4 Tsuinghez rueq shuimc juing yauk shuimc htenc kuex vsawc pinhtumc yauk shuimc nuex seng yaq htenc kuex shuimc kay rax.
5 Yehowa rueq Moshe muex vkhoc jungx kuq tueq. Jerak kvruex httak gay vkhing httuiuc ruiux yuq, Arun nac sahez kuex Tap mungx kvyuq nyuip vtueq, Bomkhvrc Jep khaungkac nuex httax yaq vtuk juinc juing kuex lvmz vtueq, kvruex maq Jep kuex puingc rax.
6 Vjuinc juing khvymvnz htauk kvyuq nyenz taungtaung hvlc ngvmx khuix maq puingc ruiux, kvruex htauk kvyuq khvymvnz khuingc wuil maq hulawx puingc yek rax, kvruex yimaq kantaung htenc kuex vwaungx kamz htenc kvyuq relc tvy rax.
7 Yehowa muex wanx tvdaungc vtueq shomc kuy juing humpanx htauk kvyuq, khvymvnz khuingc wuil kuex phawc vtueq panjamc htenc, vhomc vshot kok htenc, kuimx wanc htenc, svpiq tix kaytauc htenc kuex tvy rax. Ekvkhoc shomc kuy juing wanx htenc kuex mkaq muinz humpanx htauk nuex httaz rax.
8 Tsuinghez rueq kvruex hup svmx htenc lotlaz kuex khvymvnz vshawx maq puingc ruiux, kvruex htauk kvyuq nyenz taungtaung hvlc ngvmx khuix maq puingc rax, kvruex yimaq kantaung htenc kuex vwaungx kamz htenc kvyuq relc tvy rax.
9 Tsuinghez rueq wvrkok htung nuex seng yaq wvrkok htenc, kap htenc, wvr jungc juing kok htenc nuiyc olip puiz kok htenc kuex khvymvnz khuingc wuil maq puingc tvy rax.
10 Tsuinghez rueq wvrkok htung nuex seng yaq hup svmx lotlaz kuex nyenz taungtaung hvlc ngvmx khuix mvnz maq htop vtueq, pic juing pvrrawx htauk nuex tvdaungc rax.
11 Kuimshawx shomrawx kuex khvymvnz khuingc wuil maq puingc ruiux, kvruex htauk kvyuq nyenz taungtaung hvlc ngvmx khuix mvnz kvmaq puingc tvy shec rax. Kvruex yimaq kantaung htenc kuex relc tvy rax.
12 Tsuinghez rueq Vsawc Baung nuex shuimc juing hup vsvmx lotlaz kuex khvymvnz khuingc wuil maq puingc ruiux, kvruex htauk kvyuq nyenz taungtaung hvlc ngvmx khuix mvnz maq puingc vtueq pic juing pvrrawx htauk nuex tvdaungc tvy rax.
13 Tsuinghez rueq shomrawx wawc vpuiz nuiyc tvp kuex tvsawc pex gay ruiux, shomrawx kuex pasic nvm-yaz khvymvnz maq puingc tvy rax.
14 Tsuinghez rueq kvruex htauk kvyuq shomrawx nuex seng yaq wvr jungc juing kok, khuiyq, phawc tsawk, khvp maq phaungc vtueq vshuimc vlvmc juing hup svmx lotlaz kuex tvdaungc tvy shec rax. Kvruex yimaq shomrawx nuex shuimc lvmc juing hup svmx htenc kuex nyenz taungtaung hvlc ngvmx khuix mvnz maq puingc ruiux, kantaung htenc kuex relc tvy rax.
15 Jerak httak gay vkhing httuiuc ruiux yuq, Arun nac sahez rueq vshuimc vlvmc juing hup svmx lotlaz kuex puingc tvy lot yix jix Kohat taungx hez kuex kaz vtueq hup svmx htenc kvruex gurc pic juing. Kohat taungx hez rueq hup vsvmx htenc kuex yauk maq heq kay mvy muq, heq ruiux kuex vthueyc rvtuex.
Tap kvruex tvhttot shuex ruip rawx Kohat taungx hez rueq kvkhoc yauk shuimc htenc kuex shuimc rax.
16 Shomc waz Arun saz Eleazar rueq Tap tvkoc muinz, wvrkok puiz, vhomc vshot, ruiy vwungx, ruimruimc puiz tix maq phaungc vtueq Yehowa muex vlekuy wuez Tap wawc hup svmx httax yaq lotlaz kvmuinz khvmc tvy rax.
17 Yehowa rueq Moshe nuiyc Arun muex ngoc,
18-19 “Kohat taungx hez kuex vthvy gay rvhumc muq tvkoc vsawc hup svmx htenc kvruex hep kvyuq nauk tvnvp kaz. Kvkhoc rvhumc muq tvkoc Arun nac sahez kuex Tap mungx nuex nyuip vtueq, miq pumz tek rueq shuimc juing yauk shuimc nuiyc gurc pic juing htenc kuex phvlc kuy rax.
20 Kohat taungx hez kuex Tap nuex nyuip vtueq vsawc hup svmx htenc kuex yauk lox saz lawc iruiux yuq, vthueyc rvhumc tuex,” ngoz tueq jungx tueq.
Lewi Phvnx Wawc Gershon Taungx Hez Yauk Shuimc
21 Yehowa rueq Moshe muex,
22-23 Lewi phvnx wawc Gershon taungx hez wawc rullungx wawc rokthuimx maq wawc rok bv-ngac hvlwvl miq, yauk shuimc taungx jix miqwaz rulx kuex Yehowa httax yaq Tap nuex yauk shuimc tvkoc jix vwaz tv-phvnc vtaungx maq vtaungx muingc wvlc lvmc tvkoc nvr tueq.
24 Tsuinghez rueq shuimc juing nuiyc gurc pic juing yauk shuimc kuex vkhoc rvtueq:
25 Tap, tap gaq kox nuex phawc juing, kantsec kox tuk juing, raungx kox nuex shuip juing nyenz taungtaung hvlc ngvmx khuix mvnz, kaluix nuex juinc juing,
26 Tap nuiyc shomrawx tvroz nuex juinc juing khvymvnz htenc nuiyc ruiuz htenc, wangx kaluix nuex juinc juing khvymvnz htenc kvruex muinz, hup svmx htenc kvruex tvhungx ruiux yuq shuimc juing svmx vkhak lotlaz kuex gurc pic tvkoc rvtueq. Tsuinghez rueq hup vsvmx htenc nuex seng vtueq shuimc kay juing phvnx htenc kuex khvmc tvy shec rax.
27 Gershon taungx hez kuex Arun nac sahez rueq htvp htaz kuq shuex yauk shuimc htenc nuiyc vgurc vpic juing httax yaq lotlaz kuex shuimc kay tvkoc Moshe nuiyc Arun rueq tvhungx htaungx kuy rax.
28 Vruex kuex Tap nuex Gershon taungx hez rueq shuimc kay juing yauk shuimc htenc rvtueq: shomc waz Arun saz Ethamar rueq tvkhic nvr shuex rulc rv-ngvlc tsuinghez rueq shuimc kay rax.
Lewi Phvnx wawc Merari Taungx Hez Yauk Shuimc
29 Yehowa rueq Moshe muex Lewi phvnx Merari taungx wawc miq muingc lvmc tvkoc jungx tueq,
30 rullungx wawc rokthuimx maq wawc rok bv-ngac hvlwvl miq, yauk shuimc taungx jix miqwaz rulx kuex Yehowa httax yaq Tap nuex yauk shuimc tvkoc jix vwaz tv-phvnc vtaungx maq vtaungx muingc wvlc lvmc tvkoc nvr tueq.
31 Tsuinghez kuex Tap koalc juing pulx htenc, vjuinc juing kawz htenc, htung htenc nuiyc gaq kox nuex sap juing htenc kvmuinz,
32 Tap tvroz wawc htung htenc, gaq kox nuex sap juing htenc, wuythvmc htenc nuiyc ruiuz htenc kvmuinz, hup svmx htenc kvruex tvhungx htaungx ruiux yuq shuimc juing hup vsvmx lotlaz kvmuinz gurc pic rax. Miq pumz tek vtueq miqmac muex aungx yaq hup svmx kuex gurc pic rax.
33 Vruex kuex Tap nuex Merari taungx hez rueq shuimc kay juing yauk shuimc htenc rvtueq: shomc waz Arun saz Ethamar rueq tvkhic nvr shuex rulc rv-ngvlc tsuinghez rueq shuimc kay rax.
Lewi Phvnx Muingwvlc
34-48 Yehowa rueq nvr tueq rulc rv-ngvlc Moshe, Arun nuiyc walaungx bix rueq Lewi phvnx wawc Kohat, Gershon nuiyc Merari taungx thuimx wawc rullungx wawc rokthuimx maq wawc rok bv-ngac hvlwvl miq, yauk shuimc taungx jix miqwaz rulx kuex Yehowa httax yaq Tap nuex yauk shuimc tvkoc jix vwaz tv-phvnc vtaungx maq vtaungx muingc vlvmz taq muingc wvlc kuex vkhoc rvtueq:
49 Yehowa rueq Moshe muex nvr tueq rulc rv-ngvlc, Lewi phvnx wawc miqwaz rulx pumz tek vtueq muingc lvmz ruiux; Moshe maq raz tueq vkuq Yehowa rueq vnvr kvjaz htenc kuex miq pumz tek rueq shuimc kay juing yauk shuimc nuiyc gurc pic juing htenc kuex phvlx kuq tueq.