MATTHEW
SHUENRUENC BOMJUNGC LUIK
(MATTHEW)
Matthew Shuenruenc Bomjungc luik vruex kuex Bomkhvmc Vkez luik nuex Tishox rueq vpiq miqsaz htenc muex kuq shec tueq bomkhvmc rulc rv-ngvlc, httuiuc kaz yaq Palc Daungc Taungjix kuex Yesu rvtueq lvmz thuix thaungx jungx wvnc tueq. Vruex Shuenruenc Bomjungc kuex Yesu jawx vtueq rullungx tvraungx httax wvnc tueq kuex Yuda miqsaz tvkoc dvyx rvmuq, mungkawx lotlaz tvkoc muinz rvtueq.
Matthew Luik kuex rvkhauk laz tvhungx vtueq vwuiyq shec luik rvtueq. Vruex luik kuex Yesu mvnphvnc maq phaungc vtueq vpiq jawc lvmz, yuix lvmc lvmz nuiyc mvyx tvy rvhumc tueq lvmz, kvruex yimaq Galile mungx nuex vpiq rueq jungphvnx lvmz, tvluing kuq tueq lvmz, tvhvlc kuy lvmz, yauk shuimc lvmz htenc kuex rvtueq. Kvruex yimaq vruex Shuenruenc Bomjungc kuex Yesu khuemc tueq Galile mungx maq Ye rusalem nuex, Yesu vtvsuip jepat nuex yaungx wvnc tueq lvmz htenc nuiyc vpiq thueyc vtueq kvtenc yuing waung tueq lvmz wuiyq tvtsuingc taq tueq.
Vruex Shuenruenc Bomjungc luik kuex Yesu rueq Tishox Tvrac vlvmz jalc kuy nuex nuiyc raungx mungtan lvmx tvluingc kuy vkhangx htenc vpaung kox kuex phvnshiz maq phvnshiz pungpungx raz tueq pvlyungx bv-ngac tv-phvlc taq tueq: (1) Kankhux wawc bomjungc. Kvruex yuq raungx mungtan miqsaz shauk nuex seng vtueq honc vyaungc, yauk shuimc htenc, lvp wvnc shuex vkhangx htenc nuiyc rullungx tvraungx lvmx tvsuip wawc vpuic htung lvmx htenc lomx tueq. Mat 5:-7: nuex; (2) Sangac rokshiz rac wanueyc muex tsuinghez rueq shuimc juing phungc yauk shuimc nuex seng vtueq jungx tueq lvmz, Mat 10: nuex; (3) Raungx mungtan lvmx bomc tv-ngvlc, Mat 13: nuex; (4) Sangac yaungc ngoz yaq vlvmz nuex seng vtueq tvluing kuq tueq, Mat 18: nuex; (5) Vruex pat vtvsuip nuex seng vtueq raungx mungtan nuex httuiuc tuex lvmx htenc tvluing tueq kvjaz htenc, Mat 24:-25: rvtueq.
1
(Luk 3:23-38)
1 Abraham nuiyc Dawid suiuz vsaz phvnx Yesu Christu vpiq waruiuz lvmx phvnc kuex vkhoc rvtueq.
2 Abraham saz kuex Esak, Esak saz kuex Yaku, Yaku saz kuex Yuda nuiyc vphuz vnox hez rvtueq,
3 Yuda nuiyc Tamar saz kuex Pereza nuiyc Zera rvtueq. Pereza saz kuex Hesron, Hesron saz kuex Aram,
4 Aram saz kuex Aminadab, Aminadab saz kuex Nashon, Nashon saz kuex Selmon,
5 Selmon nuiyc Rahab saz kuex Boaza, Boaza nuiyc Rutha saz kuex Obed, Obed saz kuex Jese,
6 Jese saz kuex Dawid hokhvmx rvtueq. Dawid kuex Uria taungnyuiuz rulc httax vtueq vsaz Solomon humc tueq,
7 Solomon saz kuex Rehoboam, Rehoboam saz kuex Abija, Abija saz kuex Asa, Asa saz kuex Jehoshaphat,
8 Jehoshaphat saz kuex Jehoram, Jehoram saz kuex Uzia, Uzia saz kuex Jotham,
9 Jotham saz kuex Ahaza, Ahaza saz kuex Hezekia,
10 Hezekia saz kuex Manase, Manase saz kuex Amon, Amon saz kuex Josia,
11 Josia kuex Babelon mungx nuex thuq wvnc tueq kvkaq, Jehoiachin nuiyc vphuz vnox hez humc tueq,Ref 1:11 2Hokh 24:14-15; 2Tvts 36:10; Yer 27:20
12 Babelon nuex thuq wvnc tvkoc Israel miqsaz htenc lvp shvlx wvnc tueq yix maq, Jehoiachin rueq Shealtiel lvp tueq, Shealtiel saz kuex Zerubabel,
13 Zerubabel saz kuex Abiud, Abiud saz kuex Eliakim, Eliakim saz kuex Azor,
14 Azor saz kuex Zadok, Zadok saz kuex Achim, Achim saz kuex Aliud,
15 Aliud saz kuex Eleazar, Eleazar saz kuex Mathan, Mathan saz kuex Yaku,
16 Yaku saz kuex Mary taungwaz Yosep rvtueq, Mary rueq Mesia ngoz yaq Yesu kuex jawx tueq.
17 Abraham pat maq Dawid pat nuex httuiuc laz pat rokshiz rac pat bvlic. Dawid pat maq Israel miqsaz Babelon mungx nuex thuq wvnc tueq nuex httuiuc laz pat rokshiz rac pat bvlic. Babelon nuex thuq wvnc tueq pat maq Mesia jawx kaz tueq nuex httuiuc laz pat rokshiz rac pat bvlic rvtueq.
(Luk 2:1-7)
18 Yesu Christu jawx kaz tueq lvmz kuex vkhoc rvtueq, vpiq nyuiuz Mary kuex Yosep rueq vtvkvp taq nyuiuz rvtueq, tsuingnueyc vroc max httax shauk nuex dvyx piq nuex Vsawc Siyac maq vlvp wvgvnz rvtueq.Ref 1:18 Luk 1:27
19 Yosep kuex tsuingrux raz tueq vlvmz maq mkaq muinz shuimx lvmz yaq waz rvtueq rulc rv-ngvlc, piq rueq Mary kuex miq htumc nuex yvlc svy tvrvhumc roc muq ningkhvnc nuex piq vtvkvp taq shec lvmz kuex vyumx maq httvrc tvy gay dvnc tueq.
20 Kvkhoc tvmaung yaq baunglaung Taungjix kamx waz vshiz rueq maung nuex kvkhic kaz vtueq, “Dawid suiuz vsaz Yosep lex, mtaungx nyuiuz Mary lvmc tvkoc nauk hiz kaz, yvmx khoc lac ngoz ruiux lec piq wvgvnz yaungx yaq kuex Vsawc Siyac maq yaungx wvnc tueq.
21 Piq rueq miqwaz saz jawx shuex, mnoz rueq vpiq muingc kuex Yesu ngoz tueq muingc shuiux. Yvmx khoc lac ngoz ruiux lec vpiq miqsaz htenc kuex mvrax mungx wawc palc tvdungc wvnc jix waz rvtueq,” ngoz tueq.Ref 1:21 Luk 1:31
22 Vruex lvmz htenc kuex Taungjix vpiq pumz maq shvmmax nuix maq raz tueq jungx tueq kvjaz kuex hungx wvnc muex yaungx wvnc tueq.
23 Piq rueq, “Lawc shuiuz, kvruex yalxtux shauk nyuiuz kuex wvgvnz yaungx vtueq vsaz miqwaz saz jawx shuex, vpiq muingc kuex Immanuel ngoz tueq muingc shuex,” ngoz tueq. Kvruex vlvmz kuex, “Tishox kuex naungshiq rulc vdvmz httax yaq!” ngoc rvtueq.Ref 1:23 Esa 7:14
24 Kvkhoc rvtueq Yosep kuex vkvtsoalx wawc tvsvmc wvnc vtueq Taungjix raungkamx waz rueq jungx kaz tueq rulc rv-ngvlc phvnx vtueq, Mary kuex lvmz tueq.
25 Yuq muinz nox raungwuic khic nuex httuiuc laz piq rulc gvnngvmx maq guilc ngaungc naungx muq maq httax tueq; nox miqwaz saz kuex piq rueq Yesu ngoz tueq muingc tueq.Ref 1:25 Luk 2:21