3
(Mat 12:9-14; Luk 6:6-11)
1 Kvruex yimaq Yesu kuex vjux thoz juing baung nuex hulawx kaz yek koq tueq, kvyuq yauk kox vmaungx miq washiz vhttax rvtueq.
2 Kvruex yuq Yesu ngoc vyaq yauk shuimc jix ngoz tueq mvrax tvgurc roc jix miq wvyvmc httax yaq, Vguilc Raungnuiyq kvruex waz kvmac tvhvlc kuq shuex shuex tvhvlc kuq muq lac ngoz tueq lawc wuez tueq.
3 Yesu rueq kvruex waz muex ngoc, “Nuk miqsaz khaungkac nuex kvkhic jvp kaz loq,” ngoz kuq tueq.
4 Kvruex yimaq vpiq rueq miq htenc muex, “Naungshiq Tvrac nuex Vguilc Raungnuiyq yvmx shuimc mvy yaq ngoz tueq lac nvr shec tvnx? Romc kuy tvkoc shuex, rvmuq ngoz ruiux tvjamz jaux tvkoc lac? Miq vshiz thuiuzthuic palc wvnc tvkoc shuex, rvmuq ngoz ruiux vthvy gay tvkoc lac?” ngoz tueq wiz tueq.
Yuq muinz tsuingshiq kuex yvmx muinz kvjak muq.
5 Kvkhoc tsuingshiq thuinz tsanc hvlc khuec nuex, Yesu thuinbac hvlc maq thuinkhaq vtueq tsuingshiq kuex tvroz lawc tueq. Kvruex yimaq vpiq rueq yauk maungx waz muex ngoc, “M-yauk kuex tenz shuiuz,” ngoz tueq. Kvruex waz rueq muinz vyauk tenz koq tueq vyauk kuex hvlx kaz tueq.
6 Kvkhoc rvtueq Pharise nuk kuex vjux thoz juing baung wawc dung kaz vtueq, vpiq kuex yvmx khoc maq thvy gay juing lac lvmx kvkaq dvyx Herod phungc jix rulc vyumx maq raz tsaz wuez tueq.
7 Yesu nuiyc vpiq sangac bix kuex Galile Jumx kawx nuex kvhttot kaz tueq, Galile mungx nuiyc Yuda mungx wawc miq vkung vdaungx phungc shiz vpiq yix phvnx naungx tueq,
8 kvmaq raz tueq Yerusalem ghaq Idumea mungx nuiyc Yodan ruilx shaldungc kox wawc hez htenc, Tire nuiyc Sidon ghaq htenc tvroz hong wawc miq vkung vdaungx lotlaz kuex vpiq rueq shuimx wvnc tueq lvmz htenc tay ningkhvnc nuex Yesu kox nuex httuiuc kaz wuez tueq.
9 Nuk miqsaz htenc kuex vpiq gvnz nuex kvtungc muq mrvkueq, lix vruinx saz vshiz vpiq tvkoc mtvyoalc taq shueq ngoz tueq vpiq sangac hez muex jungx tueq.Ref 3:9 Mak 4:1; Luk 5:1-3
10 Miq paunghvlc muex vpiq rueq tvhvlc kuy ningkhvnc nuex, vthuiuz vsac miq htenc kuex vpiq gvnz nuex kvtungc lvp laz juing ngoz tueq, vpiq kox nuex kvtuiuz nyuip wvnc wuez tueq.
11 Vshuy vshac htaungc kop yaq miq htenc rueq Yesu kuex khiz shuex ruip rawx, vpiq khaungkac nuex bumx vtueq, “Mnoz kuex Tishox Saz rvtoq,” ngoz tueq ramc wuez yaq.
12 Yesu rueq vpiq ukhaq lac rvtvnx lvmx kuex ukhaq muex muinz nauk jungx kaz, vshuy htaungc htenc muex vpiq rueq daungdaungx htuing tueq.
(Mat 12:46-50; Luk 8:19-21)
13 Kvruex yimaq Yesu kuex kanx nuex duiz wvnc vtueq vpiq yix phvnc roc jix htenc kuex vpiq rueq gvl tueq. Tsuinghez vpiq kox nuex httuiuc kaz wuez tueq,
14 kvkaq vpiq rueq waz rokshiz rac vnueyc kuex thvl vtueq, tsuinghez ngoc kamx waz hez ngoz tueq muingc tueq. Kvruex yimaq tsuinghez kuex, “Ngaz rulc vdvmz httax tvkoc nuimhez kuex ngaz rueq thvl taq vphaungx nuiyc jungphvnc kuy tvkoc ngaz rueq nuimhez tvkaz vphaungx.
15 Htaungc htenc kuy gay muex vrangx vpangx nuimhez muex ngaz rueq kuq vphaungx,” ngoz tueq jungx tueq.
16 Kvruex waz rokshiz rac wanueyc kuex vpiq rueq thvl taq ruiux raz tueq: (Yesu rueq Peter ngoz tueq muingc kuq tueq waz) Simon;
17 Zebede saz Yaku nuiyc vnox Yohan, (tsuingnueyc saqnox kuex Boanerga ngoz tueq muingc tueq; kvruex vlvmz kuex, “Raungmuk wanueyc,” ngoc rvtueq.)
18 Kvmaq Andru, Philip, Barhtolemi, Matthew, Thoma, Alphaeu-u saz Yaku, Thaddaeu, Kanani miqsaz Simon,
19 Yesu lekuy gay jix Yuda Iskarut rvtueq.
(Mat 12:22-32; Luk 11:14-32; 12:10)
20 Kvruex yimaq Yesu kuex yuimx nuex waung tueq. Nuk miqsaz vkung vdaungx rvtuimx kay ningkhvnc nuex Yesu nuiyc vpiq sangac hez kuex dungc svy vkhing doc muinz lvp muq.
21 Miq wvyvmc rueq, “Vpiq kuex vturux shex rvkaz,” ngoz yaq kvjaz kuex vpiq yuimx wuinz rueq tay vtueq vpiq kuex bvmc lawc tvkoc vpiq kox nuex httuiuc kaz tueq.
22 Yerusalem wawc vkaz Tvrac tvluingc waz hez wvyvmc rueq, “Vpiq kuex Beelzebul kvpumz kaz, kvruex htaungc walaungx waz luimc vkawc maq vpiq rueq htaungc htenc kuex yurc lot yaq,” ngoz tueq jungx tueq.Ref 3:22 Mat 9:34; 10:25
23 Kvkhoc rvtueq Yesu rueq tsuinghez kuex gvl vtueq bomc tv-ngvlc maq jungx tueq kuex, “Satan kuex Satan rueq mkhoc lac yurc gay lot yaq nguinx?
24 Mungtan vshiz mungx wawc rv-phvlc nyanc wvnc vtueq vdvmz dvmz rvkhvt ruiux yuq kvruex mungtan kuex ngaungx tuex rvmuq.
25 Yuimx vshiz jix muinz yuimx taungx nuex thaungthoz wawx yez raz tueq vdvmz dvmz rvthoz thvy ruiux yuq kvruex yuimx kuex ngaungx tuex rvmuq.
26 Kvrulc rv-ngvlc Satan mungtan muinz penx yanx wvnc ruiux yuq, ngaungx lot muq nuiyc vsumx vrumx htumx wvnc tuex.
27 “Hungc vlaungc httax hvlc waz kuex kungkhux khvrc taq muq maq, piq yuimx wawc hup vsvmx kuex uraq muinz lvmz woz lot muq, piq kuex khvrc taq vtueq jix piq hup svmx kuex nyvlc lot shuex.
28 “Ngaz rueq nuimshiq muex vsuing jungx kuq ix, mungkawx miqsaz mvrax lotlaz nuiyc tsuingshiq rueq vjungc vphvnc yaq yaq honc vbac lotlaz tvkoc mvrax htenc kuex dawc kuq lot yaq.
29 Yuq muinz Vsawc Siyac muex honc vbac yomnamc kvjaz kvjak jix miqsaz ukhaq muex yuq muinz mvrax dawc kuy rvhumc lvp tuex rvmuq, piq kuex pattup pat-sac nuex seng yaq mvrax shuimc jix waz rvtueq,” ngoz tueq jungx tueq.Ref 3:29 Luk 12:10
30 (Yesu rueq kvkhoc ngoz tueq lvmz kuex miq wvyvmc rueq vpiq ngoc, “Vpiq nuex vshuy htaungc vshiz kvpumz kaz,” ngoz tueq jungc ningkhvnc nuex rvtueq.)
(Mat 12:46-50; Luk 8:19-21)
31 Kvkaq Yesu nyuiuz nuiyc vnox hez httuiuc kaz tueq. Tsuinghez kuex yuimx kvlc nuex jvp vtueq vpiq kuex gvlc kuy tvkoc bomjungc tvjungx kaz tueq.
32 Nuk miqsaz htenc Yesu tvroz nuex ngaungc wuez tueq, tsuingshiq rueq, “Lawc shuiuz, mnyuiuz nuiyc mnox hez kuex kvlc nuex ngaungc wuez yaq. Tsuinghez rueq mnoz kuex thuiyx yaq,” ngoz tueq vpiq muex jungx tueq.
33 Yesu rueq tvralc tueq, “Inyuiuz kuex ukhaq lac? Inox tamx kuex ukhaq hez lac rvtvnx?” ngoz tueq.
34 Vpiq tvroz nuex ngaungc yaq miq htenc kuex tvroz lawc vtueq vpiq rueq, “Lawc shuinz! Inyuiuz nuiyc inox hez kuex vyuq httax yaq!
35 Tishox thuinroc rulc rv-ngvlc phvnc jix ukhaq yuq muinz inox, ishvlx nyuiuz, inyuiuz rvtueq,” ngoz tueq.