15
Gvnz maq Dung yaq Sawc Muq Phvnx
1 Yehowa rueq Israel miqsaz htenc tvkoc phvnc juing tvrac htenc kuex
2 Moshe nuiyc Arun muex kuq tueq. Miqwaz ukhaq yuq muinz miqmac hupsvmx maq tvjuiuz dung ruiux yuq, kvkhoc phvnx kuex sawc muq rvtueq.
3 Tvjuiuz dung yaq baunglaung muinz, tvjuiuz dung muq shex ngoz ruiux muinz, sawc muq shex.
4 Kvruex waz ngaungc chuing, rvmuq ngoz ruiux piq woalchuing kuex sawc muq shex.
5 Miq washiz shiz rueq kvruex waz woalchuing kvyuq kvtungc ruiux,
6 rvmuq ngoz ruiux kvruex waz ngaungc chuing nuex ngaungc gay ruiux yuq, miqmac khvy htenc kuex huy gay ruiux, yuix rvhoalc rax, piq kuex raungyac nuex httuiuc laz sawc muq rvtuex.
7 Hupsvmx maq tvjuiuz dung yaq waz gvnz nuex kvtungc jix waz kuex miqmac khoz vkhvy htenc huy gay ruiux, yuix rvhoalc rax, piq kuex raungyac nuex httuiuc laz sawc muq rvtuex.
8 Hupsvmx maq tvjuiuz dung yaq waz rueq nawk palx htungx maq vsawc miq washiz htauk nuex htoz maq htoz iruiux yuq, htohtoz rvhumc jix waz rueq miqmac khvy kuex huy gay ruiux, yuix rvhoalc rax, piq kuex raungyac nuex httuiuc laz sawc muq rvtuex.
9 Hupsvmx maq tvjuiuz dung yaq waz ngaungc chuing kuex yvmx dvyx yuq muinz sawc muq.
10 Kvruex waz ngaungc chuing kuex shuimc gay jix waz kuex raungyac nuex httuiuc laz sawc muq rvtuex. Kvruex waz ngaungc tueq hup vsvmx kuex tenpic jix waz rueq miqmac khoz vkhvy kuex huy gay ruiux, yuix rvhoalc rax, piq kuex raungyac nuex httuiuc laz sawc muq rvtuex.
11 Hupsvmx maq tvjuiuz dung yaq waz rueq piq yauk hoalc guez maq, miq washiz shiz shuimx gay ruiux yuq, vshuimc rvhumc jix waz kuex piq khoz vkhvy huy gay ruiux, yuix rvhoalc rax, piq kuex raungyac nuex httuiuc laz sawc muq rvtuex.
12 Hupsvmx maq tvjuiuz dung yaq waz rueq vshuimx gay gvmtuik gvmkok kuex tvbunx rvgay rax, piq rueq vshuimx gay pulx tuik pulx kok kuex vhoalc ruec rax.
13 Kvruex waz hupsvmx maq tvjuiuz dung yaq kuex hvlc kay yix, raungx mvshix yix maq miqmac khoz vkhvy kuex huy ruiux, yuix saz ruilx nuex rvhoalc kay rax, kvkhoc ngoz ruiux jix piq kuex nawk palx htungx maq vsawc muex yaungx tuex.
14 Raungx tvjvt ngoc yaungc raungnuiyq piq rueq hituiuc vnueyc, rvmuq ngoz ruiux baro vnueyc kuex Yehowa httax yaq Tap kaluix daungx nuex lvmz laq vtueq shomc waz muex lekuy rax.
15 Shomc waz rueq mvrax kvdawc shomc kuy tvkoc wushawx vshiz kuex shomc kuq ruiux, vganc kuex wvr maq jauk shomc kuy rax. Vkhoc maq shomc waz rueq kvruex waz tvkoc nawk palx htungx maq tvsawc nawc shuimc kuy juing rvtueq.
16 Miqwaz washiz kuex vthuiyx dung ruiux yuq, gvnpumz yuix rvhoalc rax, piq kuex raungyac nuex httuiuc laz sawc muq rvtuex.
17 Vthuiyx vkv-nyvt khoz vkhvy, rvmuq ngoz ruiux ngvmx khuix khvy kuex vhuy ruec rax, kvruex hup vsvmx kuex raungyac nuex httuiuc laz sawc muq.
18 Kvmaq miqwaz nuiyc yalxjuik vdvmz nuex woalc ngaungc ruiux yuq wanueyc vtaungx yuix rvhoalc rax, tsuingnueyc kuex raungyac nuex httuiuc laz sawc muq rvtuex.
19 Yalxjuik nyuiuz shiz kuex khvysvmc kaz ruiux yuq, piq kuex raungx mvshix sawc muq rvtuex, kvruex nyuiuz kuex shuimc gay jix waz kuex raungyac nuex httuiuc laz sawc muq rvtuex.
20 Khvysvmc kaz yaq baunglaung yalxjuik nyuiuz piq ngaungc chuing, rvmuq ngoz ruiux piq woalchuing kuex sawc muq.
21-23 Piq ngaungc chuing, rvmuq ngoz ruiux piq woalchuing kuex shuimc gay jix rueq miqmac khoz vkhvy kuex huy ruiux, yuix rvhoalc rax, piq kuex raungyac nuex httuiuc laz sawc muq rvtuex.
24 Khvysvmc kaz yaq baunglaung yalxjuik nyuiuz kvrulc woalc naungc jix miqwaz kvruex muinz raungx mvshix nuex httuiuc laz sawc muq rvtuex, piq woalchuing muinz sawc muq.
25 Yalxjuik nyuiuz shiz kuex khvysvmc tvguiy kay lvy vtueq, tvguiy thauk muq maq kaz kaz ruiux yuq, piq tvguiy thauk muq wawwawx kuex khvysvmc kaz yaq baunglaung nuex ikhoc dvyx sawc muq.
26 Khvysvmc kaz yaq baunglaung piq ngaungc chuing, rvmuq ngoz ruiux piq woalchuing kuex sawc muq.
27 Kvruex phvnx htenc kvyuq kvheq kvtungc jix kuex sawc muq ningkhvnc nuex miqmac khvy kuex huy ruiux, yuix rvhoalc rax, piq kuex raungyac nuex httuiuc laz sawc muq rvtuex.
28 Yalxjuik nyuiuz kuex khvysvmc kay thauk yix, raungx mvshix htvmx ruiux, piq kuex nawk palx htungx maq vsawc shex.
29 Raungx tvjvt vngoz raungnuiyq piq rueq hituiuc vnueyc, rvmuq ngoz ruiux baro vnueyc kuex Yehowa httax yaq Tap kaluix daungx shomc waz kox nuex lvmc lvy rax.
30 Shomc waz rueq mvrax kvdawc shomc kuy muex vshiz, kvmaq wvr maq jauk shomc kuy muex vshiz kuex shomc kuy rax. Vkhoc maq shomc waz rueq yalxjuik nyuiuz kvruex tvkoc tvsawc nawc lvmx kuex shuimx lvmz yaq.
31 Yehowa rueq Israel miqsaz htenc sawc muq lvmz nuex seng vtueq tsuingshiq muex honc tvsvmz kuy tvkoc Moshe muex jungx tueq, kvkhoc jerak hvlwvl wawc vpiq httax yaq Tap kuex tsuingshiq rueq tvshuy shac mvy muq. Tsuingshiq rueq shuimx gay tueq ngoz ruiux, vthvy gay rvhumc tuex.
32 Vruex kuex miqwaz hupsvmx maq tvjuiuz dung yaq, rvmuq ngoz ruiux vthuiyx dung yaq waz,
33 khvysvmc tvguiy kaz yaq nyuiuz, rvmuq ngoz ruiux nawk palx htungx maq sawc muq nyuiuz rulc woalc ngaungc jix waz nuex seng vtueq tvrac rvtueq.