5
Menjenc tvkoc Vjux thoz lvmz
1 O Yehowa lex, nuiyshiq nuex yvmx lac yaungx yaq nguinx kuex rvwvl shuiuz.
Nuiyshiq kuex lawc vtueq, nuiyshiq tvyvlc sac yaq kuex khiz kuq koq.
2 Nuiyshiq tsak vnyvmx kuex juiuc httuingx wuinz waz yauk nuex nyuip woz vtueq;
pungnuk miqsaz muinz nuiyshiq yuimx htenc nuex httax yaq.
3 Nuiyshiq muex vwaz tamx kuex ralx rueq thvt gay wuez tueq,
majuiuc nuiyshiq muex vnyuiuz tamx kuex mvntix nyuiuz muex yaungx wuez yaq.
4 Nuiyshiq rueq nuingc juing yuix kuex vhtawz kuy juing shex;
nuiyshiq muex rax yaq janx kuex vrez raz tueq jauk vshix.
5 Loze rvmuq ngoz ruiux kamel htenc ikhoc tvyuz tvbaz yurc gay rvhumc vtix,
nuiyshiq hunnyex vtix, yuq muinz nyec tvkuiyq lvp miq.
6 Nuiyshiq rueq miqmac tvraungx lvp tvkoc phuiuz svy kuex hungx laz lvp tvkoc,
Ejip mungx nuiyc Asiria mungx wawc thoz kaz vtix.
7 Nuiyshiq jix vwaz tamx rueq mvrax yaq wvnc tueq,
yuq muinz majuiuc tsuingshiq kuex vguez shex,
nuiyshiq kuex tsuingshiq mvrax ningkhvnc nuex kuilc daz rvhumc vtix.
8 Nuiyshiq kuex dax hez htauk nuex jvnc vtueq vbac miqsaz rueq guimz lawc rvhumc vtix,
vshiz raung rueq muinz tsuingshiq luimc kawc wawc
nuiyshiq kuex daungc wvnc lot muq.
9 Miq thvy gay jix hez kuex mungtan shuk vnoz nuex kvroz khuemx wuez yaq;
nuiyshiq rueq phuiuz vsvy kuex thuiuzthuic maq khvmc vtueq thuiyx wuez vshix.
10 Rvmc thuiuz rueq nuiyshiq tvthuiuz sac vtueq
nuiyshiq khuix htenc kuex wvrkez ikhoc khamc gay yaq.
11 Nuiyshiq juik nyuiuz tamx kuex
Zion Kanx htauk nuex yom- namc gay rvhumc wuez yaq;
Yuda mungx ghaqtek nuex httax yaq nuiyshiq saz yalxjuik
sahez muinz laungc maq woalc naungc rvhumc wuez tueq.
12 Nuiyshiq vyungx vlaungx bix kuex shvlx laq vtueq tvshuirc pauk gay tueq;
nuiyshiq walaungx bix kuex tvtsanc nganc rvhumc yaq rvmuq.
13 Nuiyshiq yalxrox bix kuex dax ikhoc tsvmz htuiuz wuez yaq;
miqwaz sahez muinz janx mvrx liq kuex ruiklez roplez gurx.
14 Rullungx nyuiuz waz rulx kuex
ghaqyungx palx kaluix nuex mkaq muinz ngaungc kaz muq shex,
yalxrox bix rueq vtuimc vtvlc raungluingx muinz vguez shex.
15 Vkokez juing kuex nuiyshiq rullungx nuex htumx kaz shex;
vyonz vyec juing rueq nuiyshiq wvnuemc nvyc juing nuex nyuip lvp wvnc tueq.
16 Nuiyshiq kvsomc parc juing yvmx muinz vguez shex.
Nuiyshiq rueq mvrax yaq ning- khvnc nuex, majuiuc vkhoc rvhumc vtix.
17 Nuiyshiq thuinz vmungx bac rvhumc vtix
muik phic kvjumx ningkhvnc nuex sawc riric kvkhic lot muq,
18 Zion Kanx kuex miq vguez ghaq
kuiyq ghaqkhvmx ningkhvnc nuex,
yaruix guyhex htenc kuex bac wvnc tueq baung kvyuq khuemx shamx wuez yaq,
19 Yuq muinz, O Yehowa lex, mnoz kuex pattup hokhvmx rvtoq,
vkhing htumx wvnc nuex httuiuc laz guimz lawc shuiux.
20 Mnoz rueq yvmx ngoz tueq lac
nuiyshiq kuex kvtanc khvnc httvmx laz gay shec tonx?
Mnoz rueq nuiyshiq kuex rvwvl yek phux haz?
21 Yehowa lex, nuiyshiq kuex mnoz
kox nuex tvyez shvlx wvnc yek koq!
Nuiyshiq kuex tvyez shvlx wvnc yek koq!
Mvnnuex wawc nuiyshiq ngauz vngax kuex yez kuq koq.
22 Rvmuq ngoz ruiux, nuiyshiq kuex
pattup pat-sac tuip gay shex lac?
Mthuinz khvy kuex tvshiz gay jauz vguez shex haz?