24
1 Jehoiakim kuex hokhvmx muex yaungx yaq nuex Babelon Hokhvmx Nebukhadnezar kuex Yuda mungx nuex nyuip wvnc tueq, piq rueq guimz lawc yaq khung nuex wawc thuimx httax tueq; kvruex yimaq piq rueq khawx lvlx wvnc tueq.Ref 24:1 Yer 25:1-38; Dan 1:1-2
2 Yehowa rueq vpiq nvrc waz shvmmax bix maq raz tueq jungx wvnc tueq rulc rv-ngvlc, Jehoiakim kuex khawx lvlx vtueq Yuda mungx kuex tvbac gay tvkoc Babelon miqsaz, Asiria miqsaz, Moba miqsaz nuiyc Ammon miqsaz nolaungx bix htenc kuex Yehowa rueq tvkaz tueq.
3-4 Hokhvmx Manase rueq shuimx wvnc tueq mvrax lotlaz ningkhvnc nuex nuiyc jvnc vtueq kuex mvrax vguez miqsaz htenc thvt gay tueq mvrax lotlaz ningkhvnc nuex, Yuda miqsaz htenc kuex vpiq htumc wawc yurc gay tvkoc Yehowa rueq nvr tueq bomc rulc rv-ngvlc vruex yaungx wvnc tueq. Kvkhoc ningkhvnc nuex Yehowa rueq Manase mvrax kuex dawc kuq lot muq.
5 Jehoiakim rueq shuimx wvnc tueq phvnx ruip saz kuex Yuda Hokhvmx bix Mvnphvnc luik nuex wuiyq tvtsuingc shec tueq.
6 Jehoiakim thueyc kaz koq tueq, vsaz Jehoiachin kuex hokhvmx yaungx tueq.
7 Euphrat Ruilx maq Ejip hokhvmx ghaqkhux kox ghaqruiy nuex httuiuc laz yungx yaq Ejip hokhvmx rueq guimz yaq ghaq vraungx lotlaz kuex Babelon hokhvmx rueq guimz lvy ningkhvnc nuex, Ejip hokhvmx waz kuex piq nolaungx bix rulc mkaq muinz Ejip mungx maq dung kaz muq shex.
(2Tvts 36:9-10)
8 Jehoiachin kuex piq rullungx wawc 18 nuex Yuda hokhvmx yaungx vtueq, Yerusalem nuex yapix lex thuimx dvyx guimz lawc tueq. Vnyuiuz kuex Yerusalem ghaq jix Elnathan saz Nehushta rvtueq.
9 Jehoiachin kuex vwaz layx phvnx vtueq Yehowa muex mvrax yaq tueq.
10 Piq rueq guimz lawc yaq baunglaung Babelon nolaungx bix guimz lawc jix Hokhvmx Nebukhadnezar miq vyungx vlaungx bix rueq Yerusalem ghaq nuex waung vtueq tuimz wvnc tueq.
11 Kvkhoc tuimz wvnc tueq baunglaung Nebukhadnezar piq Yerusalem nuex httuiuc waung tueq.
12 Hokhvmx Jehoiachin kuex vnyuiuz, vsaz hez, piq vyungx vlaungx bix, hokhvmx hoc wawc walaungx bix htenc kuex Babelon miqsaz khung nuex nyuip wvnc tueq. Nebukhadnezar rueq guimz lawc tueq wawc tvjvt vngoz nuex Jehoiachin kuex khoktep miqsaz muex lvp wvnc vtueq,Ref 24:12 Yer 22:24-30; 24:1-10; 29:1-2
13 Shomc Yuimx nuiyc hokhvmx hoc mungx wawc tsak vnyvmx httax yaq lotlaz kuex Babelon mungx nuex thuq lvmz wvnc tueq. Yehowa rueq nvr tueq rulc rv-ngvlc Shomc Yuimx nuex shuimc tvkoc Hokhvmx Solomon rueq kuimshawx maq vtvhungx shex hup vsvmx lotlaz kuex Nebukhadnezar rueq jek tvbac gay tueq.
14 Nebukhadnezar rueq Yerusalem ghaq wuinz lotlaz, hokhvmx hoc wawc vyungx vlaungx lotlaz, vshunc vshvlc jix miq lotlaz, romshauk lotlaz kuex miq 10,000 lvp wvnc tueq. Piq rueq vthenc vtuiuz yauk shuimc jix lotlaz ngoc juing jek waz bix tauk vlomx thuq shvlx wvnc tueq, Yuda mungx nuex kuex htemc rvmc hvlc miqsaz dvyx shex taq shec tueq.
15 Nebukhadnezar rueq Jehoiachin rulc vdvmz vnyuiuz, vtaungx nyuiuz htenc, piq miq vyungx vlaungx bix, Yuda miqsaz walaungx bix kuex Babelon mungx nuex thuq shvlx wvnc tueq.Ref 24:15 Ezk 17:12
16 Nebukhadnezar rueq vkhek miq ngoc juing miq 7,000 kvmuinz, vthenc vtuiuz miq sawc shauk nuiyc jek waz bix tauk miq 1,000 rac nolaungx yauk shuimc nuex hungc vlaungc vmvrx httax yaq hez tauk Babelon nuex thuq shvlx wvnc tueq.
17 Nebukhadnezar rueq Jehoiachin muex vwaungx Mattania kuex Yuda hokhvmx muex tvyaungc ruiux, piq muingc kuex Zedekia ngoz tueq layc kuq tueq.Ref 24:17 Yer 37:1; Ezk 17:13
(2Tvts 36:11-12; Yer 52:13a)
18 Zedekia kuex piq rullungx wawc 21 nuex Yuda hokhvmx yaungx vtueq, Yerusalem ghaq nuex wawc 11 guimz lawc tueq. Vnyuiuz kuex Libna ghaqyungx jix Yeremia saz Hamutal rvtueq.Ref 24:18 Yer 27:1-22; 28:1-17
19 Hokhvmx Zedekia kuex Hokhvmx Jehoiakim rueq shuimx wvnc tueq rulc rv-ngvlc Yehowa muex mvrax yaq tueq.
20 Yehowa kuex Yerusalem ghaq jix muex nuiyc Yuda mungx jix muex khaq vtueq tsuingshiq kuex vpiq khaungkac wawc yurc gay tueq.Ref 24:20 Ezk 17:15