15
Yuda Hokhvmx Abija
(2Tvts 13:1 - 14:1)
1 Hokhvmx Jeroboam kuex Israel mungx nuex hokhvmx yaungc wawc 18 vngoz raungwawc, Abija kuex Yuda mungx nuex hokhvmx yaungx wvnc vtueq,
2 Yerusalem nuex wawc thuimx guimz lawc tueq. Vnyuiuz kuex Absalom saz Maaka rvtueq.
3 Piq muinz vwaz ikhoc mvrax htenc yaq wvnc ningkhvnc nuex Yehowa piq Tishox muex vjix Dawid ikhoc tvsawc ric tvmtuing httax yaq rvmuq.
4 Yuq muinz Dawid ningkhvnc nuex Yehowa piq Tishox rueq Abija yix nuex Yerusalem ghaq guimz lawc tvkoc nuiyc Yerusalem kuex tvkhup wungx bvmc lawc tvkoc piq muex vsaz washiz kuq tueq.Ref 15:4 1Hokh 11:36
5 Dawid kuex vpiq rueq raungc raq yaq yauk shuimc htenc shuimx ruiux, Hitti phvnx Uria khuec vlvmz maq lvy vtueq, vpiq rueq nvr tueq htenc kuex mkaq muinz tvlvlc muq maq phvnc ningkhvnc nuex Yehowa rueq vkhoc shuimx yaq rvtueq.Ref 15:5 2Sam 11:1-27
6 Rehoboam nuiyc Jeroboam hvlwvl nuex yaungx phaungc wvnc tueq rv-khvt rvlungc kuex Abija pat nuex muinz yaungx wvnc tueq.Ref 15:6 2Tvts 13:3-21
7 Abija rueq shuimx wvnc tueq phvnx ruip saz kuex Yuda Hokhvmx bix Mvnphvnc Luik nuex wuiyq tvtsuingc shec tueq.
8 Abija thueyc kaz koq tueq Dawid Ghaqyungx nuex luip tueq, piq saz Asa kuex piq httungx hokhvmx muex yaungx tueq.
Yuda Hokhvmx Asa
(2Tvts 15:16 - 16:6)
9 Israel Hokhvmx Jeroboam rueq guimz lawc tueq wawc rok nueyc nuex Asa kuex Yuda hokhvmx yaungx vtueq,
10 Yerusalem nuex wawc 41 guimz lawc tueq. Vwiz kuex Absalom saz Maaka rvtueq.
11 Asa kuex vjix Dawid rueq shuimx wvnc tueq ikhoc Yehowa rueq raungc raq yaq yauk shuimc kuex shuimx tueq.
12 Piq kuex kvmluimx muq miqsaz rueq nawk palx juing baung htenc nuex httax yaq mephex yauk shuimc jix miqwaz yalxjuik lotlaz kuex mungtan wawc yurc gay ruiux, piq max wawc phukhux walaungx bix rueq vtvhungx taq yac yuimx htenc lotlaz kuex yvy tuip gay tueq.
13 Vwiz Maaka rueq muinz miqsuirc vsac phvnx Asher tishox nyuiuz rueq vtvpux paung yac yuimx kuex tvhungx tvy ningkhvnc nuex, hokhvmx nyuiuz muingc jungc wawc tvdvy gay tueq. Kvkhoc Asa rueq yac yuimx kuex tvbunx soalc gay ruiux, Kidron warc nuex jauk gay tueq.
14 Kvmluimx muq miq rueq nawk palx juing baung htenc lotlaz kuex Asa rueq tvbac httak gay muq yuq muinz Yehowa nuex piq rullungx wvlex tvmtuing maq httax tueq.
15 Vwaz rueq Tishox muex vshomc kuq hup vsvmx htenc nuiyc piq yauk maq vshomc kuq kuimshawx, kuimphox hup svmx htenc kuex Shomc Yuimx mungx nuex piq rueq taq tueq.
16 Yuda Hokhvmx Asa nuiyc Israel Hokhvmx Basha tsuingnueyc hokhvmx yaungx wvnc tueq wawwawx vdvmz dvmz rv-khvt rvlungc hvt dvyx rvtueq.
17 Basha rueq Yuda mungx nuex nyuip khvt vtueq, Yuda mungx nuex vdung vsat khuemc yaq kuex tuing gay muex ngoz tueq, Rama ghaq maq palx ruk wvnc phaungc tueq.
18 Kvkhoc rvtueq Hokhvmx Asa rueq Shomc Yuimx nuiyc hoc yuimx mungx nuex kvjungx yaq kuimshawx, kuimphox htenc kuex lvmz vtueq Hezion suiuz Tabrimmon saz Damasku ghaq wawc Siria Hokhvmx Benhadad kox nuex taungx vwawc rulc vdvmz bomjungc tauk raz tueq piq vyungx vlaungx bix wvyvmc muex tvtaq kaz tueq:
19 “Naung waz hez ikhoc nomic rvyaungc wuez ix. Vruex kuimphox nuiyc kuimshawx kuex mnoz muex yauk noalc kuy rvtueq. Kvkhoc rvtueq mnoz rulc Israel Hokhvmx Basha rueq nomic rvyaungc bomc vkhvrc taq kuex majuiuc dvyx httvr gay shuiuz, ngoz ruiux ngvy mungx kox wawc piq nolaungx bix kuex tvyek wvnc shuex,” ngoz tueq tvjungc wvnc tueq.
20 Hokhvmx Benhadad rueq muinz Asa rueq tvtay jungx tueq kvjaz kuex rungx raz naungx vtueq, Israel ghaqyungx htenc kuex khvt tvkoc piq vyungx vlaungx bix nuiyc nolaungx bix htenc kuex tvkaz tueq. Tsuinghez rueq Ejon, Dan, Abel Bet Maaka, Galile Jumx hep htenc nuiyc Naphtali hong lotlaz kuex khvt taungx gay tueq.
21 Kvruex thaungc kuex Hokhvmx Basha rueq tay vtueq Rama ghaq palx ruk kuex httvr gay ruiux, Tirza ghaq nuex kaz wvnc tueq.
22 Kvruex yimaq Hokhvmx Asa rueq miq pumz tek vtueq kvguing lot muq laz, ghaqshungc tec nuex Baasha rueq vshuimx lung nuiyc pulx penc htenc kuex Rama ghaq wawc romc pic kuy tvkoc Yuda mungx lotlaz wawc nvr tueq. Asa rueq Mizpa nuiyc Benjamin hong wawc Geba ghaqyungx kuex tec taq tueq.
23 Hokhvmx Asa rueq shuimx lvmz wvnc tueq phvnx ruip saz ngoc juing piq rueq khvmc wvnc tueq yauk shuimc lvmz htenc nuiyc piq rueq tec wvnc tueq miqghaq htenc lotlaz kuex Yuda Hokhvmx bix Mvnphvnc Luik nuex wuiyq tvtsuingc shec tueq. Yuq muinz piq rullungx nyuiuz waz nuex shex vyaz thuiuz vsac rvhumc wvnc tueq.
24 Asa thueyc kaz koq tueq, Dawid Ghaqyungx wawc hokhvmx luip ruiuz khux nuex piq kuex luip tueq. Vsaz Jehoshaphat kuex piq httungx nuex hokhvmx tvyaungc tueq.
Israel Hokhvmx Nadab
25 Yuda Hokhvmx Asa rueq guimz lawc tueq wawc nueyc vngoz nuex, Hokhvmx Jeroboam saz Nadab kuex Israel mungx nuex hokhvmx yaungx vtueq wawc nueyc guimz lawc tueq.
26 Piq waz ikhoc piq max wawc Yehowa muex mvrax yaq gay ruiux, Israel miqsaz htenc kuex mvrax lvmx nuex shvlx laq tueq.
27 Issakar phvnx wawc Ahija saz Basha rueq Nadab kuex khawc lvlc muex kvmungx vtueq, Nadab nuiyc piq nolaungx bix rueq Philistin mungx wawc Gibethon ghaq kuex tuimx yaq nuex, Nadab kuex thvt gay tueq.
28 Yuda Hokhvmx Asa rueq guimz lawc wvnc tueq wawc thuimx vngoz nuex kvkhoc yaungx wvnc vtueq, Baasha kuex Israel hokhvmx Nadab httungx nuex hokhvmx yaungx tueq.
29 Kvkaq lvmx lvy dvyx Baasha rueq Jeroboam yuimx wuinz lotlaz kuex thvt phaungc wvnc tueq. Shilo ghaq wawc vpiq nvrc waz shvmmax Ahija muex Yehowa rueq tvjungx tueq rulc rv-ngvlc, Jeroboam yuimx wuinz lotlaz thvy gay rvhumc tueq; vshiz muinz tvjungx muq.Ref 15:29 1Hokh 14:10
30 Jeroboam piq yaq tueq mvrax htenc nuiyc piq rueq Israel muex mvrax tvshuimc ruiux, Yehowa Israel Tishox thuinz tvkhaq tueq ningkhvnc nuex kv-khoc yaungx wvnc tueq.
31 Nadab rueq shuimx lvmz wvnc tueq phvnx ruip saz kuex Israel Hokhvmx bix Mvnphvnc Luik nuex wuiyq tvtsuingc shec tueq.
32 Yuda Hokhvmx Asa nuiyc Israel Hokhvmx Baasha kuex tsuingnueyc hokhvmx yaungx tueq wawwawx tsuingnueyc vdvmz dvmz rv-khvt rvlungc hvt dvyx rvtueq.
Israel Hokhvmx Baasha
33 Yuda Hokhvmx Asa rueq guimz lawc tueq wawc thuimx vngoz nuex, Ahija saz Baasha kuex Israel mungx nuex hokhvmx yaungx tueq. Piq kuex Tirza ghaq nuex httax vtueq 24 guimz lawc tueq.
34 Piq max wawc Hokhvmx Jeroboam ikhoc piq max wawc Yehowa muex mvrax yaq gay ruiux, Israel miqsaz htenc kuex mvrax lvmx nuex shvlx laq tueq.