4
1 Yehowa rueq, “Israel miqsaz htenc lex, mkhoc shoc maq nuimshiq kuex ngaz kox nuex yek waungc roc ruiux yek woz luit. Mnoz ngaz muex tvmtuing httax vtuiux ngoz ruiux kuex ngaz rueq shuiuc vshaungx yac yuimx htenc kuex tvhttot lvmz gay ruiux,
2 ngvy muingc ruingc vtueq kvtuemc vtuinx kuex nuimshiq tvkoc tsuingrux yauk shuimc muex yaungx tuex. Kvmaq miqphvnx ruip rawx rueq tsuingshiq muex ruimruimc kuy tvkoc ngvy kox wawc thoz wuez shuex, tsuingshiq rueq ngaz muex tvtsvmc kvmc wuez phuex,” ngoz tueq jungx tueq.
3 Yuda miqsaz nuiyc Yerusalem jix muex Yehowa rueq jungx tueq kuex, “Max shuimx max htuz shauk nuimshiq wuik vnax htenc kuex shuimx shuinz; nuimshiq rueq khic yuingc juing vlix htenc kuex shuiuq jungx htenc hvl nuex nauk wuinc kaz.Ref 4:3 Hos 10:12
4 Nuimshiq Yehowa ngoz vshuinx ngaz rulc nuimshiq rueq vtaq bomkhvrc kuex phvnx shuinz, Yuda miqsaz nuiyc Yerusalem jix lex, nuimshiq shauk pumz kuex ngaz muex lekuq kuit. Kvkhoc rvmuit ngoz ruiux kuex nuimshiq rueq vbac shuimx wvnc tuit ningkhvnc nuex ngvy thuinkhvy kuex wvr ikhoc luic tuex. Kvruex tvthuik gay jix vshiz muinz httax tuex rvmuq,” ngoz tueq.
5 Mungtan wvtaungx nuex bolic tuimz shuinz!
Selc suil vyungx maq ramc shuinz!
Yuda miqsaz nuiyc Yerusalem jix
lex lung palx ruk vhttax ghaqyungx htenc nuex yuz wuez kuinz.
6 Zion ghaq nuex tvtac wuez shuinz!
Kvwungx tvkoc yuz kuinz! Nauk kenc kaz!
Yehowa rueq bac wvnc juing yunghvlc
thuimkux kuex ghaqkhux kox maq lvmz laq shuex.
7 Piq kvhttuiyq juing baung wawc dung kaz yaq hangsic ikhoc,
miqphvnx ruip rawx tvbac gay jix waz kuex dung kaz yaq.
Piq kuex Yuda mungx tvbac gay muex kaz yaq.
Yuda ghaqyungx htenc kuex bac wvnc vtueq,
miq vshiz muinz httax tuex rvmuq shex.
8 Kvkhoc rvtueq ruiyhec khvy svmx
ruiux, khoar nyerx wuez kuinz,
yvmx khoc lac ngoz ruiux lec Yehowa thuinkhvy bac hvlc
kuex Yuda mungx wawc lvmz gay tueq rvmuq.
9 Yehowa rueq, “Kvruex raungnuiyq hokhvmx bix nuiyc vyungx vlaungx bix htenc tsuingthuinz bac wvnc tuex; shomc waz bix kuex kawc yawc kaz ruiux shvmmax bix kuex vwangc rvwuez tuex,” ngoz tueq jungx tueq.
10 Kvruex yimaq ngaz rueq, “Johvlc Yehowa lex, mnoz rueq Yerusalem ghaq wuinz kuex tvsawc ric laulawc gay toq! Kvruex yuq nomic lvp shuinx ngoz tueq mnoz rueq jungx toq, yuq muinz yaung kuex tsuingshiq duingx nuex httax yaq,” ngoz tueq jungx tauk.
11 Kumtsvy tvnx wawc raungguil kalc kuex guil wvnc yaq lvmx Yerusalem ghaq wuinz muex tvtay kuy vkhing httuiuc wvnc yaq shex. Kvruex raungguil kuex tsvmz khuix tvpvnc lot yaq raungguil ikhoc dvyx rvmuq,
12 Yehowa vpiq rueq nvr vtueq guil yaq raungguil kuex yunghvlc maq guil tuex! Vpiq miqsaz htenc htauk nuex phoc kuy jix kuex Yehowa vpiq pumz maq rvtueq.
13 Lawc shuinz, ralx htenc kuex phuemx ikhoc kaz yaq. Tsuingshiq nolaungx renc htenc kuex raungguil tul ikhoc, tsuingshiq mvre htenc kuex lawx saz htauk nuex muinz vphaq lanc yuz yaq. Naungshiq sumx tiq shex! Naungshiq kuex vphoc rvhumc tix!
14 Yerusalem lex, mnoz palc wvnc rvhumc tvkoc mthuinz mungx wawc layx bac kuex hoal gay shuiuz. Mnoz kuex mtanc nuex httuiuc laz lac vbac kvmungx hvt rvtuiux?
15 Kamx waz bix rueq Dan ghaqyungx wawc nuiyc Ephraim kanx htenc wawc vbac thuix thaungx kuex tvtay yaq.
16 Tsuingshiq rueq miqphvnx ruip rawx muex honc tvsvmz kuy tvkoc muinz, lvmx luz mungx wawc httuiuc kaz yaq ralx lvmz kuex Yerusalem muex tvtay jungc kuy muex httuiuc kaz tuex. Kvruex ralx htenc Yuda ghaqyungx htenc yix kox maq ramc wuez shuex,
17 tsuingshiq kuex nax bvmc jix waz hez ikhoc Yerusalem ghaq kuex tvroz tuimx wvnc shuex, yvmx khoc lac ngoz ruiux lec vpiq miq htenc rueq Yehowa muex khawc lvlc ningkhvnc nuex rvtueq. Yehowa rueq jungx yaq.
18 Yuda lex, mnoz httaz vngaungc nuiyc shuimc vkay htenc ningkhvnc nuex mnoz vkhoc yaungx wvnc tueq. Mthuinz vmungx nuex yaung maq vshuiuq gay ikhoc; mmvrax ningkhvnc nuex vkhoc kuilc daz vtuiux.
19 Thuinz nuex thuiuz yaq! Nanx lot
mauk juing thuinz nuex thuiuz yaq!
Ngvy thuinz vmungx lex! Ngvy
thuinz vmungx nuex kvkhuirc yaq!
Ngaz kuiyqshuik httax lot mauk;
bolic thuic nuiyc
ralx lungc nuex guyc muinz ngaz rueq tay tauk.
20 Thuimkux kuex phvnshiz maq phvnshiz httuiuc wvnc yaq;
wvmungx tuimx bac wvnc tueq.
Naungshiq tap htenc kuex huingc rvhek maq bac wvnc tueq;
kvruex tuk juing htenc kuex kvjuirc kaz wuez tueq.
21 Ngaz rueq ralx rvlungc yaq kuex mtanc khvnc nuex httuiuc laz lac khiz shaungx?
bolic thuic kuex mtanc khvnc nuex httuiuc lac tay shaungx?
22 Yehowa rueq jungx tueq, “Ngvy miqsaz kuex tharc guez;
tsuingshiq rueq ngaz kuex tuiuz muq.
Tsuingshiq kuex miqyaq nosaz rulx ikhoc yaungx yaq;
tsuingshiq kuex vtuiuz vtay vguez.
Tsuingshiq rueq layx bac yauk shuimc thenc hvlc,
yuq muinz vhvlx kuex shuimx lvmz thenc muq,” ngoz tueq.
Yeremia rueq Max kox wawc Thuimkux kuex Romzyac Tvkhic
23 Ngaz rueq mungkawx lawc koq
tueq, shvmx vrvmx muinz vguez; raungx kuex lawc koq muinz, vwuic vguez.
24 Ngaz rueq kanx htenc kuex lawc koq tueq, kvkhuirc dvndvnz,
ghaqluimx htenc kuex kvkhuirc dvndvnz.
25 Ngaz rueq miq vshiz muinz khiz mauk;
wushawx htenc doc muinz yuz wvnc wuez tueq.
26 Ghaq vbur kuex kumtsvy tvnx muex yaungx wvnc tueq;
ghaqyungx htenc muinz bac kaz tsic
Yehowa vpiq thuinkhvy ningkhvnc nuex rvtueq.
(
27 Ghaq lotlaz kuex yaruix rumz muex yaungx wvnc tuex, yuq muinz dup sauk bac wvnc tuex rvmuq lvmz Yehowa rueq jungx shec tueq.)
28 Ghaq kuex vyonz yex vtueq;
raungx kuex vnyauk rvwvnc tuex.
Yehowa rueq jungx tueq kvjaz
kuex vpiq thuinz nuex layc gay shuex rvmuq.
Vpiq thuinz maq htvp htaz yauk shuimc kuex shuimx tueq,
yix nuex rv-nyuik tuex rvmuq.
29 Mvre nuex ngaungc jix hez nuiyc laq shvrvyx bix tvruingc tay vtueq
miq lotlaz yuz wvnc wuez tuex.
Wvyvmc kuex luingx vlak nuex yuz wvnc tuex;
vganc kuex lung rauk htenc nuex duiz wvnc tuex.
Miq ghaq htenc kuex ghaq httuiz kvjungx vtueq,
miq vshiz muinz httax tuex rvmuq shex.
30 Yerusalem lex, mnoz kuex vphoc rvhumc tuiux!
Mnoz rueq yvmx ngoz tueq lac vshawx kuex svmx vshuiux?
Yvmx ngoz tueq lac lungsex htenc maq kvmarc ruiux mmuik kuex nyvt vshuiux?
Mnoz rueq mshauk pumz kuex yvmx muinz vguez nuex kvsvp rax vtuiux!
Mnoz rueq lungwawx vshuiux jix rueq mnoz tvdux gay ruiux
mnoz kuex thvy gay roc yaq.
31 Nox wuic khic thuiuz rvhumc yaq yalxjuik nyuiuz huinc,
pekhux saz jawx tueq yalxjuik nyuiuz guyc tvruingc ikhoc ngaz rueq vkhoarc tay tauk.
Kvruex kuex nyec hvlc vyauk kvkhuirc yaq,
Yerusalem ghaq tvruingc rvtueq,
piq rueq, “Ngaz kuex vphoc rvhumc tauk!
Tsuingshiq kuex ngvy thvy muex kaz yaq!” ngoz tueq jungx tueq.