28
1 Kvruex raungwawc dvyx, Yuda hokhvmx Zedekia hokhvmx yaungc yaq wawc bvlic rac yapix lex bv-ngac nuex, Gibeon ghaq wawc Azur saz shvmmax Hanania rueq Shomc Yuimx mungx maq ngaz muex jungx phuex. Piq rueq ngaz kuex shomc waz bix nuiyc mungx miqsaz htumc nuexRef 28:1 2Hokh 24:18-20; 2Tvts 36:11-13
2 Tvphaungc Tvsuip Yehowa, Israel Tishox rueq jungx tueq lvmx vkhoc jungx tueq: “Ngaz rueq Babelon hokhvmx waz luimc vkawc kuex tvbunx gay tauk.
3 Hokhvmx Nebukhadnezar rueq Babelon mungx nuex lvmz wvnc tueq Shomc Yuimx wawc tsak vnyvmx htenc lotlaz kuex ngaz rueq wawc nueyc lvmvnx vyuq lvmz wvnc yek shaungx.
4 Ngaz rueq Babelon nuex lvp thuq wvnc tueq Yuda miqsaz lotlaz rulc vdvmz Jehoiakim saz Yuda hokhvmx Jehoiachin muinz tvyez shvlx wvnc yek shaungx. Rvtueq, ngaz rueq Babelon hokhvmx waz luimc vkawc kuex tv-ngawk kuq gay shaungx. Ngaz, Yehowa rueq jungx vshaungx.”
5 Kvruex yimaq Shomc Yuimx mungx nuex jvp yaq shomc waz bix nuiyc mungx miqsaz lotlaz khaungkac nuex, ngaz rueq Hanania muex,
6 “Vwangc juing nyix! Yehowa rueq kvruex mruez shueq ngaz rueq tvluimc vshaungx! Shomc Yuimx tsak vnyvmx lotlaz nuiyc vthuq wvnc rvhumc jix mungx miqsaz lotlaz kuex Babelon mungx wawc vpiq rueq tvyez shvlx wvnc yek shuex lvmx jungx jix vpiq shvmmax kvjaz kuex vpiq rueq tvhungx kuq shuex, ngaz rueq vsuing tvluimc vshaungx.
7 Yuq muinz mnoz nuiyc mungx miqsaz htenc ngaz rueq jungx phaungx kuex tay wuez shuinz.
8 Mnoz nuiyc ngvy vkhing max shauk, mvnnuex wawc shvmmax bix rueq miqphvnx paunghvlc muex nuiyc luimc vkawc yunghvlc mungtan htenc, ralx rvlungc, khvmx vrvmc nuiyc vmac vtsac thuimkux dung tuex lvmz jungx wvnc tueq.
9 Yuq muinz nomic httax tuex ngoz tueq tvluz nuex jungc jix shvmmax kuex piq kvjaz vsuing yaungx wvnc tueq kuex khiz vtueq jix piq kuex Yehowa rueq vtvkaz shvmmax rvkhauk laz doc rvtueq lvmz dvyx lvp wvnc shuex,” ngoz tueq jungx tauk.
10 Kvruex yimaq Hanania rueq ngvy duingx wawc kantaung kuex lvmz gay ruiux, kvruex tvhtaq tvruk tv-ngawk gay vtueq,
11 miq lotlaz khaungkac nuex, “Vruex kuex miqphvnx lotlaz duingx nuex Hokhvmx Nebukhadnezar rueq vtvdaungc taq kantaung kuex vpiq rueq vkhoc tv-ngawk gay shuex; vpiq rueq kvruex yauk shuimc kuex wawc nueyc lvmvnx nuex tvlot gay shuex ngoz tueq Yehowa rueq jungx tueq kvjaz kuex jungx tueq,” ngoz tueq jungx tueq. Kvruex yimaq ngaz dung kaz tauk.
12 Vshauk puq httaz yix maq Yehowa rueq ngaz muex jungx phuex
13 Hanania kox nuex kaz vtueq vkhoc jungx kaz kuiuz: “Mnoz rueq pulx kantaung kuex tv-ngawk gay toq, yuq muinz kvruex yuq yanx kantaung kuex httungx htawc gay shuex, ngoz tueq Yehowa rueq jungx tueq.
14 Tvphaungc Tvsuip Yehowa Israel Tishox rueq, kvruex miqphvnx lotlaz htauk nuex yanx kantaung kuex tvdaungc shec shuex, tsuingshiq rueq Babelon Hokhvmx Nebukhadnezar muex shuimx kuq shuex ngoz tueq jungx tueq. Vpiq rueq yaruix wawc ngvmx saz htenc rueq doc muinz Nebukhadnezar muex shuimx kuq wuez shuex ngoz tueq Yehowa rueq jungx tueq,” ngoz tueq.
15 Kvruex yimaq ngaz rueq Hanania muex vruex lvmz kuex tvhttoarc jungx tauk, “Hanania lex, tay shuiuz! Yehowa rueq mnoz tvkaz kv-phux rvmuq, mnoz rueq miq htenc muex rot kaq vtueq tvkvmx luimx vshuiux.
16 Kvkhoc rvtueq mnoz rueq Yehowa kuex laulawc tvkoc miq htenc muex jungx toq ningkhvnc nuex vpiq rueq mnoz kuex khawx gay kv-phux. Majuiuc raungwawc max htumx nuex dvyx mnoz thueyc tuiux ngoz tueq Yehowa vpiq pumz maq jungx tueq,” ngoz tauk.
17 Hanania kuex kvruex raungwawc lex mvshix yac nuex thueyc kaz tueq.