6
Yesu rueq Miq Hingc Bv-ngac muex Tv-phauk Saq
(Mat 14:13-21; Mak 6:30-44; Luk 9:10-17)
1 Kvruex yimaq Yesu kuex Tiberia ngoz yaq Galile jumx kuex yanz wvnc tueq.
2 Vthuiuz vsac jix htenc nuex vpiq rueq shuimx tueq vwangc juing htenc kuex tsuingshiq rueq khiz vtueq miq vkung vdaungx rueq vpiq yix nuex phvnx naungx tueq.
3 Yesu kuex ghaqluimx vshiz nuex duiz woz vtueq vpiq sangac hez rulc vdvmz nuex ngaungc naungx tueq.
4 Yuda miqsaz moalx rvtueq Tvlvy Wvnc Moalx httuiuc wvnc nanac shex rvtueq.
5 Yesu rueq lawc koq tueq nuk miqsaz vkung vdaungx htenc vpiq kox nuex kaz yaq kuex khiz vtueq Philip muex, “Vruex hez vraq phuiuz svy juing kuex yvmx wawc rez kay juing lac?” ngoz tueq wiz tueq.
6 (Vpiq rueq wiz tueq kuex Philip httoarc helc tvkoc rvtueq: vsuing yvmx khoc ruec juing lac kuex vpiq rueq tuiuz yaq rvtueq.)
7 Philip rueq, “Miq vjuc vmac kuex kuimphox 200 maq ruiyx ruiux doc muinz hungx tuex rvmuq,” ngoz tueq tvralc tueq.
8 Kvruex kaq vpiq sangac hez phungc wawc Simon Peter nox Andru rueq jungx tueq kuex,
9 “Nosaz washiz kox nuex wanx bv-ngac rac ngaq vnueyc httax yaq. Yuq muinz miq vjuc phungc vmac kuex hungx tuex rvmuq,” ngoz tueq.
10 Yesu rueq, “Miq htenc kuex tv-ngaungc wuez shuinz,” ngoz tueq. (Kvruex baung kvyuq renhttuingx ruix rvtueq.) Tsuingshiq lotlaz ngaungc wuez tueq; miqwaz rulx dvyx 5,000 tanc rvtueq.
11 Kvkaq Yesu rueq wanx kuex lvmz vtueq Tishox muex kejux vyungx ngoz kuq ruiux, ngaungc yaq jix htenc kvmac phvlx kuq tueq, ngaq kvmuinz kvrulc rv-ngvlc phvlx kuq tueq. Miq htenc rueq muinz phoay laz phauk saq tueq.
12 Tsuingshiq lotlaz rueq phoay laz phuiuz svy lot yix, vpiq rueq vpiq sangac hez muex ngoc, “Phuiuz bung svy bung htenc kuex wawz kaz muq tvkoc vhvlx waq tvjomx tsenz shuinz,” ngoz tueq.
13 Kvkhoc rvtueq tsuingshiq rueq tvjomx tsenz koq tueq wanx phux bv-ngac rac ngaq vnueyc wawc svy bung kuex boarx 12 mvrc laz rvtueq.
14 Kvkhoc vpiq rueq tvkhic tueq vwangc juing romzyac kuex khic jix htenc rueq, “Vruex waz kuex mungkawx nuex httuiuc kaz tuex ngoz yaq shvmmax waz rvtueq!” ngoz tueq.
15 Yesu kuex tsuingshiq rueq laungc maq shvlx wvnc vtueq hokhvmx muex tvyaungc shuex lvmz kuex helc vtueq, vpiq lauklauk dvyx ghaqluimx nuex kvhttuiyq yuz kaz tueq.
Yesu Yuix Htauk nuex Khuemx tueq
(Mat 14:22-23; Mak 16:45-52)
16 Raungyac wvnc koq tueq Yesu sangac bix kuex Galile jumx nuex svt kaz wuez tueq.
17 Lix htauk nuex ngaungc vtueq kvkox ral Kapernaum ghaq nuex rvp wvnc wuez tueq. Raungnyauk wvnc koq muinz Yesu kuex tsuingshiq kox nuex max httuiuc waung dvyx doc rvtueq.
18 Kvruex kaq raunghtiq raungguil wvnc vtueq yuix daungx htenc dauk tueq.
19 Sangac bix kuex kilometer 6 tanc rvp wvnc tueq nuex Yesu kuex yuix htauk maq khuemx wvnc vtueq, lix hep nuex httuiuc wvnc yaq kuex tsuinghez rueq khiz vtueq hiyaz kawc yawc wuez tueq.
20 Yesu rueq tsuinghez muex, “Nauk hiz kaz, ngaz rvtauk!” ngoz tueq.
21 Kvkaq jix tsuinghez rueq vshuenc vruenc maq vpiq kuex lix nuex tv-ngaungc wvnc tueq, lix muinz kvkaq dvyx tsuinghez httuiuc juing baung nuex httuiuc waung tueq.
Miq htenc rueq Yesu Thuiyx tueq
22 Raungnvp kvyix yuix jumx kvkox ral nuex httax wuez yaq nuk miqsaz htenc rueq kvruex yuq lix vshiz dvyx httax yaq kuex rvwvl lvp wuez tueq. Kvruex lix kvyuq Yesu ngaungc wvnc naungx muq vpiq sangac hez dvyx woz wvnc tueq kuex tuiuz wuez tueq.
23 Yuq muinz Tiberia wawc vkaz lix htenc kuex Taungjix rueq kejux vyungx ngoz ruiux, nuk miqsaz htenc muex wanx tv-phauk saq tueq baung kvyuq httuiuc kaz wuez tueq.
24 Nuk miqsaz htenc rueq kvruex baung kvyuq Yesu muinz, vpiq sangac hez muinz vguez shex kuex tuiuz vtueq, tsuinghez muinz lix htenc nuex ngaungc ruiux vpiq kuex thuiyc kay Kapernaum ghaq nuex kaz wvnc tueq.
Yesu kuex Rullungx Wanx
25 Yuix jumx kvkox ral nuex Yesu kuex humc kaz vtueq, tsuinghez rueq, “Tvluingc waz lex, mnoz kuex vyuq mkaq lac httuiuc kaz tonx?” ngoz tueq wiz tueq.
26 Yesu rueq, “Ngaz rueq nuimshiq muex vsuing jungx kuq ix, nuimshiq rueq ngaz thuiyx vphuinx lvmx kuex ngaz rueq tvkhic phaungx romzyac vlvmz kuex tuiuz vtueq thuiyx vphuinx rvmuq, wanx phauk saq vtueq phoay kv-phuinx tueq jix thuiyx vphuinx, ngoz tueq tvralc tueq.
27 Vbac vnvmx kay juing phvnx phuiuz vsvy tvkoc nauk hunglaungx kaz, kvruex tvraung, pattup rullungx tvlvp wvnc yaq bac muq nvmx muq phuiuz vsvy tvkoc hunglaungx wuez kuinz. Kvruex kuex Miq Saz rueq nuimshiq muex kuy juing phuiuz svy rvtueq, yvmx khoc lac ngoz ruiux lec Vwaz Tishox rueq vpiq muex ngauz vngax tvduic kuy wuez rvtueq,” ngoz tueq tvralc tueq.Ref 6:27 Yoh 1:33; Mat 3:17; Luk 3:22; Kamx 2:22; Eph 1:13; 4:30; 2Pet 1:17
28 Kvkhoc rvtueq tsuinghez rueq, “Tishox rueq nuiyshiq tvshuimc roc yaq lvmz kuex shuimc tvkoc nuiyshiq rueq yvmx khoc shuimc juing lac?” ngoz tueq vpiq muex wiz tueq.
29 Yesu rueq, “Tishox thuinroc lvmx ngoz yaq kuex vpiq rueq vtvkaz waz muex kvmluimx juing ngoc rvtueq,” ngoz tueq tvralc tueq.
30 Tsuingshiq rueq, “Mnoz muex nuiyshiq kvmluimx wvnc tvkoc vwangc juing romzyac yvmx lac tvkhic kuq phux? Mnoz rueq yvmx yauk lac shuimx shuiux?
31 Rumvrc luik nuex, ‘Tsuingshiq rueq phuiuz svy tvkoc raungmungx wawc wanx kuex tvdvy kuq shuiuz,’ ngoz tueq wuiyq shec tueq rulc rv-ngvlc, naungshiq jix vwaz tamx rueq muinz kumtsvy tvnx maq Manna wanx phauk saq tueq,” ngoz tueq.Ref 6:31 Dw 16:4,15; Tvts 78:24-25
32 Yesu rueq, “Ngaz rueq nuimshiq muex vsuing jungx kuq ix, nuimshiq muex raungmungx maq wanx tvdvy kuy jix waz kuex Moshe rvmuq, Iwaz rueq juez raungmungx wawc wanx muik shauk nuimshiq muex kuq kv-phuinx.
33 Yvmx khoc lac ngoz ruiux lec Tishox rueq kuq yaq wanx ngoz yaq kuex raungmungx maq svt kaz vtueq, mungkawx miqsaz muex rullungx kuy kay jix waz ngoc rvtueq,” ngoz tueq jungx tueq.
34 Tsuingshiq rueq vpiq muex, “Taungjix lex, wanx kvruex nuiyshiq muex mkaq muinz kuq hvt rvkoq,” ngoz tueq thoz tueq.
35 Yesu rueq, “Ngaz kuex rullungx wanx rvtauk, ngvy kox nuex kay jix waz kuex mkaq muinz rvmc svy rvhumc tuex rvmuq; ngaz muex kvmluimx jix waz kuex mkaq muinz khvmx svy rvhumc tuex rvmuq.
36 Yuq muinz nuimshiq rueq ngaz khiz vphuinx rvhvt maq ngaz muex kvmluimx muit, ngoz tueq ngaz rueq nuimshiq muex jungx vphaungx.
37 Iwaz rueq ngaz muex kuq phuex lotlaz kuex ngvy kox nuex kaz wuez ruex. Ngvy kox nuex kay jix waz kuex ngaz rueq yurc gay shaungx rvmuq.
38 Yvmx khoc lac ngoz ruiux lec raungmungx maq ngaz kaz tauk kuex ngvy thuinroc shuimc kay tvkoc kaz tauk rvmuq, ngvy tvkay jix waz vpiq thuinroc shuimc tvkoc vkaz rvtauk.
39 Ngvy tvkay jix waz thuinroc lvmx kuex vpiq rueq ngaz muex lekuq shec phuex lotlaz kuex vshiz muinz moz maq kaz muq maq, vtvsuip raungnuiyq nuex yuing kvtenc wvnc juing lvmx rvtueq.
40 Yvmx khoc lac ngoz ruiux lec Iwaz thuinroc lvmx kuex, Vsaz kuex khiz vtueq kvmluimx wvnc jix lotlaz muex pattup rullungx lvp wvnc tvkoc lvmx rvtueq. Ngaz rueq muinz vtvsuip raungnuiyq nuex tsuingshiq kuex tvyuing tvtenc wvnc shaungx,” ngoz tueq jungx kuq tueq.
41 Yesu rueq, “Ngaz kuex raungmungx wawc vsvt kaz wanx rvtauk,” ngoz tueq ngoc ningkhvnc nuex miq htenc kuex thuirthux wuez tueq.
42 Kvkhoc rvtueq tsuingshiq rueq, “Vruex waz kuex Yosep saz Yesu rvmuq haz? Vnyuiuz vwaz kuex naungshiq rueq tuiuz yaq. Kvkhoc rvyruiux, majuiuc vpiq rueq ngaz kuex raungmungx maq vsvt kaz ngoz tueq ngoz yaq nguinx?” ngoz tueq.
43 Yesu rueq, “Nuimshiq vdvmz dvmz nauk thuirthux kaz.
44 Ngvy tvkay jix waz Iwaz rueq piq kuex ngvy kox nuex ruip rux kuq muq ngoz ruiux kuex ukhaq muinz ngvy kox nuex kaz lot muq; httuiuc kay jix waz kuex vtvsuip raungnuiyq ngaz rueq tvyuing tvtenc wvnc shaungx.
45 Shvmmax bix luik htenc nuex, ‘Miq ruip rawx kuex Tishox rueq tvluingc kuy lvp wvnc wuez shuex,’ ngoz tueq wuiyq shec tueq. Kvkhoc rvtueq Iwaz rueq vjungx kvjaz kuex tay vtueq, vpiq kox wawc tvluingc lvy rvhumc jix htenc kuex ngvy kox nuex kaz wuez yaq.Ref 6:45 Esa 54:13
46 Vkhoc ngaz rueq jungx vphaungx kuex Vwaz khic jix miq washiz shiz vhttax ngoz tueq ngoc rvmuq, Tishox kox wawc httuiuc kay jix waz vpiq washiz rueq dvyx Vwaz kuex khiz tueq.
47 Nuimshiq muex ngaz rueq vsuing jungx kuq ix, kvmluimx jix waz kuex pattup rullungx lvp wvnc shuex.
48 Ngaz kuex rullungx wanx rvtauk.
49 Nuimshiq jix vwaz rueq kumtsvy tvnx maq Manna wanx phauk saq wvnc wuez tueq, yuq muinz vthueyc kay wuez shex.
50 Yuq muinz vruex wanx kuex raungmungx wawc vsvt kaz wanx rvtueq, kvruex phuiuz svy jix kuex thueyc tuex rvmuq.
51 Ngaz kuex raungmungx wawc vsvt kaz vtvraungx wanx rvtauk. Kvruex wanx kuex phuiuz svy jix ukhaq yuq muinz pattup tvraungx httax tuex. Ngaz rueq kuy juing wanx kuex mungkawx miqsaz rullungx tvraungx tvkoc kuq shaungx ngvy ngvmx rvtueq,” ngoz tueq jungx kuq tueq.
52 Kvkaq tsuingshiq rueq, “Vruex waz vraq yvmx khoc maq lac vpiq ngvmx kuex naungshiq muex kuq phauk phvnx?” ngoz tueq vdvmz dvmz rvkhawc lvlc, rvwiz soz wuez tueq.
53 Yesu rueq, “Ngaz rueq nuimshiq muex vsuing jungx kuq ix, Miq Saz vruex ngvmx nuiyc vpiq tvguiy nuingx muit ngoz ruiux kuex nuimshiq htauk nuex rullungx thuiuzthuic vguez.
54 Ngvy ngvmx phuiuz jix waz nuiyc ngvy tvguiy nuingc jix waz kuex pattup rullungx lvp shuex. Ngaz rueq muinz piq kuex vtvsuip raungnuiyq nuex tvyuing tvtenc wvnc shaungx.
55 Yvmx khoc lac ngoz ruiux lec ngvy ngvmx kuex vphuiuz vsvy juing muik shauk rvtueq, kvmaq ngvy tvguiy muinz vnuingc juing muik shauk rvtueq.
56 Ngvy ngvmx phauk vtueq ngvy tvguiy nuingc jix waz kuex ngaz rulc httax yaq, ngaz muinz piq rulc httax vtaungx.
57 Vtvraungx httaz yaq Vwaz rueq ngaz tvkaz phuex, ngaz muinz Vwaz ningkhvnc nuex rullungx tvraungx vtaungx rulc rv-ngvlc, ngvy ngvmx phuiuz jix waz muinz ngvy ningkhvnc nuex rullungx tvraungx wvnc tuex.
58 Vruex kuex raungmungx wawc vsvt kaz wanx rvtueq, nuimshiq jix vwaz rueq phauk saq wvnc tueq wanx ikhoc rvmuq. Vruex wanx phuiuz svy jix waz kuex pattup rullungx tvraungx httax tuex,” ngoz tueq jungx kuq tueq.
59 Yesu rueq Kapernaum ghaq wawc vjux thoz yuimx nuex tvluing tueq nuex vjungx kuq kvjaz rvtueq.
Pattup Rullungx Bomc htenc
60 Vpiq yix phvnc jix miq paunghvlc rueq kvruex kvjaz kuex tay vtueq, “Vruex tvluing kuq yaq kvjaz kuex gvrc hvlc rvtueq. Uraq lac phvnx lot shvnx?” ngoz wuez tueq.
61 Kvkhoc kungjix bix kvbot nyvnx yaq kvjaz kuex Yesu rueq tuiuz ningkhvnc nuex, “Vruex kvjaz vmac nuimshiq thuinz haz bac yaq nguinx?
62 Mkhoc shoc maq Miq Saz vruex vpiq httaz juing nuex duiz wvnc tuex kuex khiz ruiux yuq, nuimshiq rueq yvmx khoc lac tvmaung shuinx?
63 Rullungx tvraungx yaq kuex Tishox Siyac rueq rvtueq; Ngaz rueq nuimshiq muex jungx kuq vphaungx kvjaz htenc kuex rullungx tvraungx lot yaq Siyac nuex seng yaq.
64 Yuq muinz nuimshiq phungc wawc wvyvmc kuex kvmluimx muit,” ngoz tueq. (Mruex jix lac kvmluimx muq rvtvnx kvmuinz, vpiq kuex ralx yauk nuex tvshuk kuy gay jix waz kvmuinz Yesu rueq kungkhux nuex phuex tuiuz yaq.)
65 Kvkhoc rvtueq vpiq rueq, “Vkhoc ningkhvnc nuex Vwaz rueq vkhangx kuq muq ngoz ruiux kuex, ukhaq muinz ngvy kox nuex kaz lot muit ngoz tueq nuimshiq muex ngaz rueq vjungc kuy wuez shex,” ngoz tueq.
66 Kvruex lvmz ningkhvnc nuex vyix phvnc jix miq paunghvlc yek waung wuez vtueq, vpiq kox nuex mkaq muinz yek kaz muq shuex.
67 Kvkhoc rvtueq Yesu rueq sangac waz rokshiz rac wanueyc muex, “Nuimhez muinz vyek wvnc roc haz?” ngoz tueq wiz tueq.
68 Simon Peter rueq, “Taungjix lex, nuiyshiq kuex ukhaq kox nuex lac waung tix? Mnoz rueq pattup rullungx kuq yaq bomjungc lvp vshuiux.Ref 6:68-69 Mat 16:16; Mak 8:29; Luk 9:20
69 Mnoz kuex Tishox kox maq vhttuiuc kaz Vsawc Washiz rvtoq kuex nuiyshiq kvmluimx wvnc vtueq tuiuz wvnc tiq shex,” ngoz tueq.
70 Yesu rueq, “Nuimhez waz rokshiz rac vnueyc kuex ngaz rueq thvl taq shec phaungx rvmuq haz? Yuq muinz nuimshiq phungc wawc washiz kuex htaungc rvtueq,” ngoz tueq jungx kuq tueq.
71 Vpiq rueq kvkhoc jungx tueq kuex, Simon Iskarut saz Yuda nuex tvhungx vtueq vjungx rvtueq. Yvmx khoc lac ngoz ruiux lec kvruex waz kuex sangac waz rokshiz rac wanueyc phungc wawc washiz rvtueq, yuq muinz vpiq kuex tvshuk kuy gay kvmungx jix waz rvtueq.