38
Yehowa rueq Yoba muex Tvralc tueq
1 Kvruex yimaq Yehowa kuex Yoba muex raunghtiq raungguil maq rvbomc tueq.
Yehowa
2 Ngvy taksux tharc kuex mnoz tharc guez maq
khuec guez kvjaz htenc maq wiz jix waz mnoz kuex ukhaq lac rvtonx?
3 Majuiuc mnoz kuex lanx juit jvp vtueq
ngaz rueq wiz vphaungx kvjaz kuex tvralc shuiux.
4 Mungkawx kuex ngaz rueq tvdung tauk nuex kvyuq mnoz vhttax haz rvtonx?
Mnoz rueq tuiuz hvlc ngoz ruiux, kvruex yuq seng vtueq ngaz muex jungx kuq koq.
5 Mungkawx kuex mtanc khvnc yungc lac uraq lac htvp htaz tvnx?
Kvruex htauk nuex vhtaz juing ruiuz kuex uraq lac juinx tvnx?
Mnoz rueq lotlaz tuiuz tvralc lot shuiux haz?
6 Ghaq htuiz juing htung htenc kuex yvmx khoc lac tvjvp shec tvnx?
Mungkawx wawc vshuk lung kuex uraq lac tvwoalc shec tvnx?
7 Kvruex raungnuiyq raungnvp kox raungwuix wvnc tueq nuex
ruiysuiyq htenc vdvmz nuex shix ngoyx ruiux,
raungx sahezRef 38:7 raungx sahez: 1:6 nuex lawc shuinz. muinz kokez vtueq guyc sez wuez tueq.
8 Svmuktvrax kuex ghaq wawc phuk dung wvnc tueq nuex
uraq lac kaluix htenc kuex shauk taungRef 38:8 shauk taung: 26:12 nuex lawc shuinz. shec tvnx?Ref 38:8-11 Yer 5:22
9 Ngaz rueq svmuktvrax kuex phuemx maq puingc gay ruiux,
kvruex raungnyauk maq yop gay tauk.
10 Ngaz rueq svmuktvrax ghaqruiy taq shec ruiux,
kvruex kaluix daung juing htenc maq vyix kox nuex taung shec tauk.
11 Ngaz rueq svmuktvrax muex, “Vyuq dvyx httuiuc tuiux, kvruex maq lvy mvy muq!
Vyuq dvyx mnoz mhungc yungc hvlc httax yaq yuix daungx htenc kuex thauk rax,”
ngoz tueq ngoz tauk.
12 Yoba lex, mrullungx wvlex raung-wuic wvnc muex
mnoz rueq nvr wvnc toq haz?
13 Layx bac jix miqsaz tsuingshiq kv-httuiyq yaq baung htenc kvwawc
nuiuc tvdvy gay laz juing,
ghaq shuk vnoz nuex httuiuc laz raungx tvwuic muex mnoz rueq haz nvr tonx?
14 Raungnuiyq raungwuic rueq kuz vkanx htenc nuiyc warc htenc
kuex khoz vkhvy tvdvp taq shix ikhoc tvkhic yaq,
bokbiq htauk nuex vtok shec yac ikhoc raungshuex raung rvtueq.
15 Raungnuiyq raungwuic kuex layx bac jix tvkoc phelez hvlc rvtueq
tsuingshiq rueq yauk laungc yalawx shuimx yaq kuex tuingshaung kuq gay yaq.
16 Mnoz kuex thuiuz hvlc svmuktvrax yuix saz dungc jungx nuex nyuip kaz toq haz?
Mnoz kuex svmuktvrax phawx rawz htauk nuex khuemx kaz toq haz?
17 Mnoz muex uraq lac raungnyauk wulumx mungx kuex bvmc jix
kaluix puc htenc kuex tvkhic kuq kv-phux haz?
18 Mungkawx mtanc lac yungx yaq nguinx mnoz rueq tuiuz vshuiux haz?
Mnoz rueq tuiuz ruiux ngaz muex jungx kuq koq.
19 Raungwuic dungc juing baung,
rvmuq ngoz ruiux raungnyauk ruilx kuiuq kuex mnoz rueq tuiuz vshuiux haz?
20 Vwuic nuiyc vnyauk kuex mtanc nuex httuiuc laz lac kaz yaq nguinx nuiyc,
vyek rvyaq lvmz kuex mnoz rueq tvkhic lot shuiux haz?
21 Mungkawx tvdung sung tueq nuex jawx vtueq rullungx laungx hvlc shex ningkhvnc nuex
vruex yauk shuimc tuiuz vshuiux ngoz tueq ngaz vsuing kvmx vtaungx.
22 Mnoz kuex tsuik hek htenc nuiyc tv-nguirx htenc tvy juing
khok nuex khuemx kaz toq haz?
23 Ngaz rueq kvruex htenc kuex kuilc daz rvhumc tuex jauz tvkoc nuiyc,
ralx rv-khvt tuex raungnuiyq htenc tvkoc tvyoalc yoalx taq shec tauk.
24 Mnoz kuex shalx dung wvnc yaq baung rvmuq ngoz ruiux
shaldungc raungguil guil phaungc wvnc yaq baung kvyuq httuiuc toq haz?
25 Raungyunc yuix kay juing ghaq warc nuiyc
raungx rueq pheq kay juing lvmx kuex uraq lac tvpuc tvnx?
26 Miq httax muq baung nuex raungx kuex uraq lac tvyunc tvnx?
27 Httuingx jungx htenc tvkemc tvkoc
httuiz rawk yaq ghaq nuex uraq lac yuix kuq tvnx?
28 Raungyunc nuiyc buing muex vwaz vhttax haz?
29 Tv-nguirx nuiyc tsuik hek daungx muex vnyuiuz kuex ukhaq lac rvtvnx?
30 Yuix kuex lung ikhoc kvdaungx vtueq
svmuktvrax htvlx phawc kuex yvmx rvtueq lac htaung kaz tvnx?
31 Mnoz rueq ruiysuiyq wupic kung kuex romshauk vkhvrc nuiyc
Kantux Pawz vkhvrc kuex jalc lot shuiux haz?Ref 38:31 Yob 9:9; Amo 5:8
32 Mnoz rueq ruiysuiyq htenc kuex vyux vlawc tv-phvnc tvdung lot shuiux haz?
Ruiywuic Poz nuiyc Saqphuz Wathuimx ngac goalc muex
lvmx tvkhic kuq lot shuiux haz?
33 Raungwuilx wanc htenc kuex guimz lawc tvrac kuex mnoz rueq tuiuz vshuiux haz?
Kvruex htenc kuex ghaq nuex vjux tvyaungc lot shuiux haz?
34 Mnoz rueq phuemx htenc muex ramc nvr lot vtueq
kvruex htenc rueq raungyunc maq mnoz muex tvhemc lot shuiux haz?
35 Raunglep tvkoc mnoz rueq nvr ruiux yuq,
kvruex mnoz kox nuex kaz vtueq, “Nuiyhez mkvjaz tay kuy tvyoalc yoalx httax vtix,”
ngoz tueq ngoz shuex haz?
36 Nile ruilx puingx wvnc tuex vkhing kuex ibisRef 38:36 ibis: Mvnnuex Ejip mungx nuex httax wvnc tueq wushawx phvnx shiz rvtueq; Nile ruilx puingx wvnc tuex kuex tvluz nuex jungc jix wushawx ngoz tueq kvmx wuez yaq. wushawx muex uraq lac jungx tvnx?
Raungx yunx tuex ngoz ruiux wupung muex uraq lac jungx yaq nguinx?
37-38 Phuemx htenc kuex wvl lot laz juing bokkhuyx htenc kuex tvdaungx vtueq,
ghaq daungx htenc bunx wvnc ruiux kvruex htenc htauk kvyuq
raungyunc ruiuc kuq lot laz ukhaq taksux tharc lac httax yaq nguinx?
39-40 Hangsic htenc kuex tsuingshiq luix htenc nuex kvhttuiyq bumx vtueq
hangsic luix htenc nuex bumx wuez tuex nuex,
mnoz rueq kvruex hez phuiuz vsvy thuiyx humc kuq vtueq
vrvmc thuiuz yaq hangsic dawz htenc muex tv-phoay kuq lot shuiux haz?
41 Wuzkhax htenc vrvmc thuiuz muex kvhtvmx baz yaq nuex,
wuzkhax dawz sahez rueq phuiuz svy tvkoc
ngvy kox wawc guyc sez vtueq vtsvmz thoz ruiux yuq,
tsuingshiq muex uraq lac kuq phauk saq tvnx?