35
1-2 Yoba lex, mnoz kuex Tishox htumc nuex mvrax kop muq ngoz tueq
mnoz rueq jungx vshuiux kvjaz kuex vlvmx rvmuq,
3 rvmuq ngoz ruiux Tishox muex ngoc,
“Ngvy mvrax rueq mnoz muex yvmx lac rvyaq nguinx?
Mvrax yaq mauk ngoz ruiux ngaz rueq yvmx vjux lac lvp shaungx?”
ngoz tueq wiz vshuiux kuex aungx muq.
4 Ngaz rueq mnoz nuiyc mkungjix hez muex muinz tvralc phaungx.
5 Raungx kuex lawc shuiuz! Phuemx kuex mtanc joz nuex lac
httax yaq nguinx kuex lawc shuiuz!
6 Mnoz rueq mvrax yaq ruiux yuq, Tishox muex tvthuiuz sac shuex rvmuq.
Vkhing ruip rawx mnoz rueq vyaq yauk shuimx ruiux yuq,
kvruex kuex vpiq muex yvmx vjux lac tvhttax yaq nguinx?Ref 35:6-8 Yob 22:2-3
7 Mnoz kuex tsuingrux raz tueq Tishox muex romc kuq lot shuiux haz?
Tishox rueq mnoz kox wawc yvmx muinz raungc raq yaq rvmuq.
8 Vganc jix kuex mnoz rueq mvrax shuimc ningkhvnc nuex kuilc daz rvhumc wuez yaq,
mnoz rueq vhvlx shuimx shuiux yauk shuimc kuex tsuingshiq muex romc kuq yaq.
9 Miq htenc kuex vguirc vguenc rvhumc tuex nuex kvbot nyvnx rvyaq;
tsuingshiq kuex tsuingshiq palc wvnc tvkoc miq vshiz shiz muex ramc yaq.
10 Yuq muinz tsuingshiq kuex raung-nyauk suip rvtueq nuex tvluimc juing kuy jix
tsuingshiq Tvdungc Sungc jix Tishox kox nuex yek wuez tueq rvmuq.
11 Tsuingshiq kuex vganc ngvmx saz nyvmx saz nuiyc
wushawx htauk nuex jvnc vtueq taksux tharc httax laz,
naungshiq muex taksux tharc tvhttaz kuq yaq Tishox kox nuex yek wuez tueq rvmuq.
12 Tsuingshiq muex romc kuy tvkoc guyc sez wuez tueq,
yuq muinz Tishox rueq tvralc muq,
yvmx khoc lac ngoz ruiux lec tsuingshiq kuex ngamc ngax vtueq layx vbac rvtueq.
13 Kvkhoc guyc sez ruiux muinz tsuingshiq tvkoc khuec guez dvyx rvtueq;
Tvphaungc Tvsuip Tishox rueq tsuingshiq kuex khiz muq,
tsuingshiq tvruingc kuex tay muq.
14 Yoba lex, mnoz rueq Tishox kuex khiz lot muq ngoz vshuiux;
yuq muinz nanx vtueq bvmc shuiuz, mkhac kuex vpiq khaungkac nuex shex rvtueq.
15 Mnoz kuex Tishox rueq murx tvgurc muq,
vpiq rueq mvrax kuy tvkoc raung-luingx dvyx thuinz lomx yaq ngoz tueq tvmaung vshuiux.
16 Mnoz rueq jungx thvt vshuiux kuex khuec guez dvyx;
mnoz rueq jungx vshuiux kvjaz mnoz rueq tuiuz muq kuex raungshuex raung rvtueq.