22
Lauk Thuimx Rvjungc Rv-phvnc
(22:1—27:23)
Eliphaza
1-2 Tuiuz thenc hvlc yaungx ruiux doc muinz
ukhaq lac Tishox tvkoc vjux httax jix miq vshiz shiz httax yaq haz?Ref 22:2-3 Yob 35:6-8
3 Mnoz rueq vlvmz shuimx vshuiux yauk shuimc kuex Tishox muex vjux kuq yaq haz?
Mnoz hvlx rix vtuiux rueq vpiq muex romc kuq vshuiux haz?
4 Mnoz kuex Tishox muex hiyaz tvtsanc nganc httaz ning-khvnc nuex
vpiq rueq mnoz muex tvhonc tvtharc vtueq,
khac phoc juing baung nuex haz shvlx laq shvnx?
5 Rvmuq, mnoz rueq vshuimc tvyaq toq mvrax yunghvlc ningkhvnc nuex rvtueq;
mnoz rueq vshuimx layx vbac lotlaz ningkhvnc nuex rvtueq.
6 Mnoz rueq mphuz mnox waz kox wawc lvp juing htawhtuimc laung,
mnoz rueq piq svmhung put wvnc ningkhvnc nuex sawx kumx taq shec toq.
7 Mnoz rueq vhunc vnyec jix muex vnuingc juing yuix kuq muq,
khvmx vrvmc sac yaq jix muex phuiuz vsvy kuq muq.
8 Mnoz kuex mluimc vkawc nuiyc muingc jungc kuex shuimx vtueq
ghaq vraungx wvtaungx guimz wvnc toq.
9 Mnoz rueq mvntix nyuiuz tamx muex romc kuy tvkoc khawx vtueq,
nojix sahez kox wawc nyvlc vtueq guirguenz wvnc toq.
10 Kvkhoc rvtueq majuiuc kuex mtvroz tuimz nuex bix htenc httaz yaq,
kvkhoc ningkhvnc nuex vhuingc rvhek laz maq hiz ruiux tuiux.
11 Raungnyauk hvlc nyauk wvnc vtueq mnoz rueq yvmx muinz khiz lot muq,
yuix pukpuingc rueq mnoz kuex luimz wvnc kv-phux.
12 Tishox kuex raungmungx joz hvlc nuex httax vtueq joz hvlc nuex httax yaq
ruiysuiyq htenc doc muinz vpiq rueq bumx vtueq lawc yaq rvmuq haz?
13 Kvkhoc rvhvt maq mnoz rueq, “Tishox rueq yvmx lac tuiuz yaq nguinx?
Vpiq kuex phuemx rueq tuing yaq ningkhvnc nuex,
naungshiq kuex yvmx khoc lac phox lot phvnx?” ngoz tueq wiz toq.
14 Htvy hvlc phuemx ningkhvnc nuex raungx wuirwanc htauk nuex
vpiq khuemx yaq kuex khiz lot muq, ngoz tueq mnoz rueq tvmaung vshuiux.
15 Layx bac miqsaz htenc rueq mkaq muinz phvnx yaq lvmx nuex
mnoz khuemc kay tvkoc haz dvnc vshuiux?
16 Tsuingshiq vkhing max httuiuc nuex dvyx,
yuix puk puingc rueq thuq hoalc gay rvhumc tueq.
17 Kvruex hez kuex Tishox tvdux gay jix miqsaz htenc rvtueq,
vpiq rueq tsuingshiq tvkoc yvmx muinz ruez kuq muq ngoz tueq kvmx jix hez rvtueq.
18 Kvkhoc ngoz ruiux muinz Tishox rueq tsuingshiq muex tvrungx wanx kuy ningkhvnc nuex,
layx bac jix rueq tvmaung yaq lvmz kuex ngaz rueq tuiuz lot mauk.
19 Layx bac jix htenc murx tvgurc rvhumc yaq kuex tsuingshiq rueq khiz tueq nuex,
miq hvlx jix kuex kokez wuez ruiux mvrax vguez miqsaz rueq vnuey kuic rvwuez yaq.
20 Layx bac jix rueq guimz yaq taungx vwawx lotlaz bac kaz shex,
yvmx muinz tvjungx muq wvr rueq khamc gay tueq.
21 Majuiuc kuex, Yoba lex, Tishox rulc nomic rvyaungc kuiuz,
ralx waz ikhoc vpiq kuex nauk tvyaungc kaz;
kvkhoc ngoz ruiux jix, vpiq rueq mnoz muex ruimrix kuq kv-phux.
22 Vpiq rueq tvluing kuq yaq kuex lvp wvnc vtueq;
Vpiq kvjaz htenc kuex mthuinz mmungx nuex tvtsuingc taq shuiuz.
23 Rvtueq, mthuinz tvyomxRef 22:23 Mvnnuex vlayc shec vshiz nuex mthuinz tvyomx; Hebre nuex tvjvp guirx shuiuz. vtueq Tishox kox nuex yek kuiuz,
m-yuimx nuex shuimx gay toq
layx vbac yauk shuimc lotlaz kuex tvsuip gay shuiuz.
24 Mkuimshawx kuex tuip gay shuiuz;
mkuimshawx muik shauk htenc kuex httuiz rawk yaq
yuix warc nuex phungc taq shuiuz.
25 Tvphaungc Tvsuip Tishox kuex mkuimshawx muex m-yaungx kueq,
vpiq kuex mkuimphox phungc muex tvyaungc shuiuz.
26 Kvruex yimaq mnoz kuex Tishox muex pattup kvmluimx vtueq,
vpiq kuex mnoz kokez juing vjungx rvtueq kuex humc wvnc shuiux.
27 Mnoz rueq vjux thoz ruiux yuq, vpiq rueq tvralc kv-phux,
mnoz rueq bomkhvrc taq toq rulc rv-ngvlc mnoz rueq tvy rax.
28 Mnoz rueq shuimx shuiux lotlaz lotlaungc shuiux,
mnoz khuemx tuiux lvmx nuex raungwuic tvlez kuq kv-phux.
29 Tishox rueq ngamc yungx ngax yungx jix kuex tvyomx gay ruiux,
thuinz tvyomx yaq jix kuex palc wvnc tueq.
30 Mnoz kuex mvrax kop muq maq mnoz rueq shuimx vshuiux
yauk shuimc vlvmx ngoz ruiux yuq, vpiq rueq mnoz kuex palc wvnc kv-phux.Ref 22:30 Pvl ruinx 30 kuex Hebre nuex vlvmz dung thenc muq.