49
Yaku rueq Bomc Tvsuip
1 Yaku rueq vsaz hez htenc kuex gvl vtueq, “Ngvy tvroz vyuq rvtuimx wuez kuinz, nuimshiq yix vmax maq yvmx khoc wuez yaungx wvnc tuinx lvmz kuex jungx kuq ix:
2 “Yaku sahez lex, ngvy hep vyuq rvtuimx waung luit.
Nuimshiq waz Israel kvjaz kuex tay shuinz.
3 “Ruben lex, mnoz kuex isaz pekhux waz, ngvy hungc vlaungc rvtoq
Ngaz yalxrox jauz wawc vphaungc shauk saz rvtoq,
Isaz hez lotlaz htauk wawc muingc
jungc vyungx pinhtumc nuiyc hungc vlaungc httaz hvlc rvtoq.
4 Mnoz kuex yuix puingc nuex kaz yaq yuix kuk ikhoc rvtoq,
Yuq muinz mnoz kuex m-waz juik nyuiuz ruinx rulc woalc naungx vtueq,
M-waz woalchuing tvshuy shac toq
ningkhvnc nuex mnoz kuex vyungx vlaungx phvnx muex yaungx lot muq.
5 “Simeon nuiyc Lewi kuex saqphuz saqnox rvtueq.
Tsuingnueyc rueq yauk laungc yalawx tvyaungc tueq koz vlaq htenc kuex shuimx tueq.
6 Tsuingnueyc kuex thuinkhvy phuk vtueq miq htenc kuex thvt gay ruiux,
Manx pung huk htenc kuex tvmlvmc lvmc maq tv-ngawk tueq ningkhvnc nuex,
Ngaz kuex tsuingnueyc rueq vyumx maq kvmungx yaq nuex lomx mauk,
Tsuinghez rvtuimx yaq kvyuq muinz lomx mauk.
7 Tsuingshiq thuinkhaq yaq kuex bac hvlc,
Tsuingshiq thuinkhvy phuk ningkhvnc nuex, mvnhttonc mrvhumc kueq.
Ngaz rueq tsuingshiq kuex Yaku kox wawc tv-phvlc nyanc gay shaungx.
Miqmac phvnx nyuing wawc miq phungc tv-phvlc gay shaungx.
8 “Yuda lex, mphuz mnox rueq mnoz muex tvtsvmc kvmc kv-phux.
Mnoz rueq ralx buq maq nyet gay toq.
Mphuz mnox hez rueq mnoz muex nawk palx kv-phux.
9 Yuda kuex hangsic ikhoc rvtueq,
piq rueq ngvmx kuex kauk phauk kaz vtueq lungshaung nuex yek waung yaq,
Hangsic ikhoc kvshunc bumx vtuiux.
Piq kuex uraq muinz yurc lot muq.Ref 49:9 Wkh 24:9; Tvkh 5:5
10 Yuda rueq hokhvmx jowvyx kuex shuimx shuex,
Piq suiuz vsaz phvnx rueq rullungx wvlex guimz lawc shuex.
Miq phvnx ruip rawx rueq piq kox nuex yauk noalc htenc lvmz wvnc vtueq,
piq khaungkac nuex nawk vtueq piq yix phvnx wuez shuex.
11 Piq rueq piq loze kuiux saz kuex vhvlx pinhtumc svpiq jungx nuex khvrc taq tueq.
Piq rueq vkhoz vkhvy htenc kuex tvguiy shawx svpiq tix nuex huyx tueq.
12 Svpiq tix nuingx vtueq vmuik htenc kuex shawx dedez rvtueq,
Puix nuingx vtueq vwac htenc kuex luiz dawdawz hvlc rvtueq.
13 Zebulun kuex svmuktvrax kawx nuex httax tuex.
Piq tvrux htenc kuex lix jvp juing muex yaungx tuex.
Piq rueq guimz yaq hong kuex Sidon ghaq nuex httuiuc laz yungx tuex.
14 “Issakar kuex htoaylac htungc hvlwvl nuex bumx yaq
Loze tanc khvnc doc muinz vjux vguez.
15 Yuq muinz piq rueq vnyec tvkuiyq yaq baung kvruex vhvlx rvtueq lvmz muinz,
Mungtan vpiauc lvmz kvmuinz piq rueq khiz tueq.
Kvkhoc rvtueq piq rueq gurc gurc tvkoc vkhez tvkungc vtueq,
Dax vshiz ikhoc yauk shuimc hunglaungc rvhumc yaq.
16 “Dan kuex piq miqsaz htenc guimz lawc jix yaungx vtueq,
Tsuingshiq muinz vganc Israel miqsaz htenc ikhoc yaungx tuex.
17 Dan kuex lvmx yungx kawx nuex kvkuemz bumx yaq puiuc,
Lvmx phic nuex kvhttuiyq yaq vyangx httaz hvlc puiuc bac rvtueq,
Mvre kuiux yaz htuimx nuex httuiuc
koq tueq mvre nuex ngaungc jix waz kuex yix kox nuex kvlek dvy wvnc tuex.
18 “Yehowa lex, ngaz kuex Mnoz rueq palc daungc wvnc kejux kuex bvmc vshaungx.
19 “Gad kuex yauk laungc yalawx jix rueq nyvlc wvnc rvhumc tuex,
Yuq muinz piq khvt jix hez kuex piq rueq khvt gay yek shuex.
20 “Asher ghaq vraungx wawc phuiuz vsvy muex rungx vwanx dung tuex.
Piq kox wawc hokhvmx moalx nuex phuiuz svy juing phvnx kuex lvp shuex.
21 “Naphtali Ref 49:21 Naphtali...jawx tueq rvmuq ngoz ruiux Naphtali vsvp waq vnoz vphak htenc mvrc vtueq kvpalx nalx yaq pulx jungx. kuex rumz nuex yuz yvlx yaq khiyix ikhoc rvtueq,
Vroc svy juing khiyix sahez kuex jawx yaq.
22 “Yosep Ref 49:22 Yosep...rulc rv-ngvlc yaq; rvmuq ngoz ruiux Yosep kuex yuix ruilx kox nuex kemz vtueq vthuey thuey yaq pulx jungx rulc rv-ngvlc yaq. Vnoz vphak htenc kuex ghaq palx ruk shex luimz wvnc vshuex. kuex yuix saz ruilx hep nuex thuiyx phauk saq yaq loze vtsvy rvtueq,
Yoxphawc htauk nuex thuiyx phauk saq yaq loze vtsvy saz rulc rv-ngvlc yaq.
23 Piq ralx hez rueq piq kuex laq nuiyc laqsvnz maq tvkot tvrot yurc vtueq gap wuez yaq.
24 Yuq muinz Tvphaungc Tvsuip Tishox luimc kawc maq muinz,
Israel muex Tvkhup wungx kuy jix Khelbuenx remc jix waz ningkhvnc nuex muinz,
Piq laq kuex phaungx ngaungx vtueq,
Piq yauk phumz tvhungc kuq tueq.
25 M-waz Tishox rueq mnoz muex mromc lawc kuq kv-phux,
Tvphaungc Tvsuip Tishox rueq mnoz muex
Raungx maq yunx yaq raungyunc,
Ghaq maq dung yaq yuix kvmuinz,
Khelx vmanx htenc nuiyc suiuz vsaz htenc kvmuinz mkuq kv-phux,
26 Tuiz vtsvmz nuiyc vpuic vngawc kvmuinz mkuq kv-phux,
Phaungx ngaungx yaq kuz vkanx htenc kvwawc
Vroc svy juing ruimrix kejux htenc kuex mnoz muex mkuq kv-phux.
Vruex ruimrix htenc kuex vphuz vnox hez rueq lvp shuex htauk nuex janc vtueq,
Yosep khux htauk nuex mhttax wvnc kueq.
27 “Benjamin kuex vnyvlc phuiuz svy rvyaq shoalx rulc rv-ngvlc yaq.
Raungnvp nuiyc raungyac kox nuex ngvmx kuex kauk vtueq phauk yaq.”
28 Vruex hez kuex Israel phvnx rokshiz rac vnueyc rvtueq, vruex kuex vwaz rueq tsuinghez washiz maq washiz miqmac rueq lvp wvnc aungx yaq kejux kvjaz htenc kuex tsuinghez muex jungx kuq tueq.
Yaku Thueyc kaz koq tueq Luip tueq
29 Kvruex yimaq Yaku rueq vsaz hez muex ngoc, “Ngvy phvnx vmaq rvtuimx yaq nuex ngaz waung wvnc taungx, kvkhoc rvtueq Hitti miqsaz Ephron ghaqphux tvnx nuex ijix iwaz hez rulc vdvmz ngaz kuex luip kuit,
30 kvruex kuex Abraham rueq luip ruiuz khux tvyaungc tvkoc Kanaan mungx Mamre ghaq maq shaldungc kox Makpela tvnx nuex httax yaq, Hitti phvnx Ephron ghaqphux vruiyx taq shex rvtueq.Ref 49:30 V.V 23:3-20
31 Kvruex luip ruiuz khux kvyuq Abraham nuiyc vtaungx nyuiuz Sara maungx muinz luip tueq; Esak nuiyc vtaungx nyuiuz Rebeka maungx muinz luip tueq; ngaz rueq Lea muinz kvyuq luip tauk.Ref 49:31 V.V 25:9,10; V.V 35:29
32 Kvruex ghaqphux nuiyc luip ruiuz khux kuex Hitti miqsaz kox wawc vruiyx rvtueq. Ngaz muinz kvyuq luip kuit,” ngoz tueq jungx shec tueq.
33 Yaku rueq vsaz hez muex kvkhoc jungc kuy lot yix, woalc vtueq huiuz wvnc tueq.Ref 49:33 Kamx 7:15