40
Yosep rueq Khoktep Miqsaz Maung htenc Jalc Jungx kuq tueq
1 Vkhing vshauk puq httvmx yix maq Ejip hokhvmx waz muex svpiq tix tvhungx kuy jix waz nuiyc wanx tvhungx kuy jix waz kuex hokhvmx waz muex shuimc kuy tvyaq tueq.
2 Piq miq wanueyc muex vthuinz khaq vtueq,
3 Yosep shauk gay tueq vyungx vlaungx waz yuimx wawc khoktep kvyuq tsuingnueyc kuex shauk gay tueq.
4 Tsuinghez kuex vluz shex khoktep nuex shuiuz gay rvhumc tueq, vyungx vlaungx waz rueq kvruex hez kuex lawc mawc tvkoc nvrc waz muex Yosep kuex tvyaungc tueq.
5 Raungwvrx shiz khoktep mungx maq svpiq tix tvhungx kuy jix waz nuiyc wanx tvhungx kuy jix waz rueq vlvmz rv-ngvlc muq maung kuex khiz wuez tueq.
6 Raungnvp nuex Yosep kuex tsuinghez kox nuex kaz koq tueq, htvlx phawc tvyuiuq rauk kuex khiz kaz tueq.
7 Yosep rueq, “Nuimhez majuiuc raungnuiyq yvmx ngoz tueq lac htvlx phawc tvyuiuq laq wuez shuinx?” ngoz tueq tsuinghez muex wiz tueq.
8 Tsuinghez rueq, “Nuiyhez miqmac mac rueq maung kuex maung wuez tiq, yuq muinz maung kuex jalc jungc kuy jix vguez,” ngoz tueq jungx tueq.
Yosep rueq, “Maung kvruex vlvmz jalc jungc kuy lot juing kuex Tishox rueq dvyx kuq yaq. Nuimmaung kuex ngaz muex jungx kuq wuez kuit,” ngoz tueq.
9 Kvkhoc rvtueq svpiq tix tvhungx kuy jix waz rueq, “Ngvy maung maq, ngvy khaungkac nuex svpiq ruiuz httax yaq,
10 kvruex ruiuz kvyuq vphak vthuimx httax yaq. Vphak htenc kvmaq vyauk htenc dung wvnc tueq rulc vdvmz vpuic htenc puic vtueq, vthuey htenc muinx wvnc tueq.
11 Ngaz rueq hokhvmx waz kok kuex shuimx ruiux svpiq thuey kuex lvmz vtueq kok kvyuq vtix kuex sur htawc ruiux hokhvmx waz muex kuq tauk,” ngoz tueq jungx tueq.
12 Yosep rueq, “Vruex vlvmz kuex vkhoc rvtueq: vphak vthuimx kuex raungnuiyq thuimx rvtueq.
13 Raungnuiyq thuimx hvlwvl vyuq hokhvmx waz rueq mnoz kuex tvdung ruiux, ngauz kuex tvduiz kuq yek kv-phux. Mnoz rueq kungkhux nuex svpiq tix kok kuex tvhungx kuq toq kvkhoc, majuiuc muinz tvhungx kuq yek shuiux.
14 Yuq muinz mnoz rueq lvp luz wvnc yek shuiux kvkaq ngaz muex nauk lauk kuq vkueq, hokhvmx waz mvnz nuex ngvy lvmz vruex jungx kuq vtueq khoktep vwawc dungc tvkoc romc kuq koq.
15 Rvkhauk laz ngaz kuex Hebre mungtan wawc lvp vtueq shvlc wvnc rvhumc tauk, vruex mungx vyuq muinz ngaz kuex khoktep nuex shuiuz rvhumc laz juing yvmx muinz yaq gay mauk doc,” ngoz tueq jungx tueq.
16 Wanx tvhungx kuy jix waz rueq svpiq tix tvhungx kuy jix waz maung vlvmz vhvlx rvtueq lvmx kuex tuiuz vtueq, Yosep muex ngoc, “Ngaz rueq muinz vkhoc maung tauk: ngaz rueq wanx phec vthuimx kuex ngvy khux nuex tvdaungc laq tauk.
17 Raungkox tvsuip wawc phec kvyuq hokhvmx waz muex kuy tvkoc wanx phvnx ruip saz httax yaq, wushawx htenc rueq kvruex phec kvwawc wanx htenc kuex saq wuez tueq,” ngoz tueq jungx tueq.
18 Yosep rueq, “Vruex maung kuex vkhoc rvtueq: phec vthuimx kuex raungnuiyq thuimx rvtueq.
19 Raungnuiyq thuimx hvlwvl vyuq hokhvmx waz rueq mkhux poz kuex jumz gay kv-phux! Kvruex yimaq mshauk pumz kuex htung nuex tsomz gay ruiux, wushawx htenc rueq mngvmx kuex phauk wuez shuex,” ngoz tueq jungx tueq.
20 Kvruex yimaq raungnuiyq thuimx vngoz nuex hokhvmx waz jawx tueq raungwuic httuiuc koq tueq, phuiuz vsvy moalx tvhungx vtueq piq rungx wawc yauk shuimc jix hez kuex gvl tueq; hokhvmx waz rueq wanx tvhungx kuy jix waz nuiyc svpiq tix tvhungx kuy jix waz kuex khoktep wawc tvdung vtueq, miq htenc kvruex khaungkac nuex shvlx wvnc tueq.
21 Piq rueq svpiq tix tvhungx kuy jix waz kuex kungkhux nuex ikhoc tvshuimc yek ruiux,
22 wanx tvhungx kuy jix waz kuex vthvy rvgay tueq. Yosep rueq vlvmz jalc jungx kuq tueq rulc rv-ngvlc yaungx wvnc tueq.
23 Yuq muinz svpiq tix tvhungx kuy jix waz rueq Yosep kuex lauk tvlanc lauk gay tueq.