21
Esak Jawx tueq
1 Yehowa bomkhvmc httax yaq rulc rv-ngvlc Sara muex ruimruimx kuq koq tueq,
2 wvgvnz yaungx vtueq vsaz miqwaz saz jawx tueq, kvkaq Abraham kuex nyuiuz waz shex rvtueq. Tishox rueq htvp htaz kuq tueq tanc jauz nuex vsaz miqwaz saz jawx tueq.Ref 21:2 Heb 11:11
3 Abraham rueq Esak ngoz tueq muingc tueq,
4 Tishox rueq jungx tueq rulc rv-ngvlc Esak kuex raungx tvjvt shex rvkoq tueq vhttoar gvnz kuq tueq.Ref 21:4 V.V 17:12; Kamx 7:8
5 Esak jawx tueq kvkaq, Abraham kuex rullungx wawc shashiz shex rvtueq.
6 Sara rueq, “Tishox rueq ngaz kuex tvkokez tvnueyxRef 21:6 tvnueyx: Esak ngoz tueq muingc kuex Hebre maq “piq nueyx yaq” (17:17-19 nuex lawc shuinz). phuex. Vruex tay jix miq ukhaq yuq muinz ngaz rulc vdvmz nuex nueyx naungx phuex,” ngoz tueq.
7 Kvruex yimaq Sara rueq, “Sara kuex vsaz muex puix tvnuingc shuex ngoz tueq uraq lac Abraham muex jungx shvnx? Majuiuc piq rullungx nyuiuz waz nuex shex ngaz rueq piq tvkoc vsaz miqwaz saz jawx kuq tauk,” ngoz tueq jungx tueq.
8 Nox kvruex kuex peluz wvnc vtueq vnyuiuz puix nuingc httvr tueq raungnuiyq, Abraham rueq phuiuz svy moalx yungx tvhungx tueq.
Hagar nuiyc Eshmael Yurc Gay tueq
9 Raungnuiyq shiz Ejip shvlx Hagar rulc vlvp Abraham saz Eshmael kuex Sara saz Esak rulc vdvmz nuex luemz wuez tueq.
10 Sara rueq tsuingnueyc kuex khiz vtueq Abraham muex ngoc, “Vruex dax nyuiuz nasaz kuex yurc gay shuiuz. Isaz Esak rueq lvp juing tsak jungx wawc raungluingx muinz vruex dax nyuiuz saz rueq lvp naungc mvy muq,” ngoz tueq jungx tueq.Ref 21:10 Gal 4:29, 30
11 Abraham rueq kvruex tay vtueq vthuinz hvlx muq yaungx tueq, yvmx khoc lac ngoz ruiux lec Eshmael muinz vsaz jvnc rvtueq.
12 Yuq muinz Tishox rueq Abraham muex ngoc, “Nox kvruex nuiyc mdax nyuiuz Hagar tvkoc nauk tvmaung kaz. Ngaz rueq bomkhvmc taq tauk rulc rv-ngvlc Esak maq msuiuz msaz httax wvnc tuex ningkhvnc nuex, Sara rueq jungx yaq kuex phvnx shuiuz.Ref 21:12 Rom 9:7; Heb 11:18
13 Ngaz rueq dax nyuiuz saz muex muinz suiuz vsaz paunghvlc kuq shaungx, piq muinz msaz vshiz rvtueq ningkhvnc nuex tsuingshiq kuex miqphvnx vshiz yaungx wvnc tuex,” ngoz tueq jungx tueq.
14 Nvp yix raungnuiyq raungnvp samaq Abraham rueq Hagar muex phuiuz vsvy nuiyc tsongbumx nuex yuix vmvrx kuq tueq. Nox kvruex muinz piq ruiykhuix nuex tvboq kuq ruiux, yuimx maq tvkaz gay tueq. Hagar muinz kaz wvnc vtueq Bersheba ngoz yaq yaruix tvnx nuex httuiuc kaz tueq.
15 Yuix tsongbumx wawc yuix htumx kaz koq tueq, nox kuex rumz ruix khung nuex taq shec ruiux,
16 paq phearc shiz tanc nuex kaz vtueq ngaungc kaz tueq. Piq rueq, “Nox khvmx svy thuiuz muex thueyc wvnc kuex ngaz rueq lawc lot mauk,” ngoz tueq piq kvbot tueq. Piq kuex vngaungc lvmx maq khoar tueq.
17 Tishox rueq nox khoarc tay tueq, Tishox raungkamx waz rueq raungx maq Hagar muex ngoc, “Hagar lex, yvmx ngoz tueq lac rvwvl tvmaung laq shuiux? Nauk hiz kaz. Tishox rueq nox khoarc kuex tay tueq.
18 Kvtenc kuiuz, kaz vtueq nox kuex tenz pvmx kaz kuiuz. Ngaz rueq piq kuex miqphvnx yunghvlc muex tvyaungc shaungx,” ngoz tueq jungx tueq.
19 Kvruex yimaq Tishox rueq piq muik tvkalc kuq koq tueq yuix jumx vshiz piq rueq khiz tueq. Piq rueq tsongbumx kvyuq yuix mvrc laq htawc vtueq vsaz muex yuix tvnuingc tueq.
20 Nox peluz wvnc tueq rulc rv-ngvlc Tishox kuex nox rulc vdvmz httax tueq; piq kuex Paran ngoz yaq yaruix tvnx nuex httaz ningkhvnc nuex shvrvyx yungx washiz muex yaungx wvnc tueq.
21 Vnyuiuz rueq piq muex Ejip shvlx nyuiuz shiz lvmz kuq tueq.
Abraham nuiyc Abimelek Rungx raz lvmz
22 Kvtanc jauz Abimelek kuex piq nolaungx wayungx Phikol rulc vdvmz Abraham kox nuex kaz vtueq, “Mnoz rueq shuimx kaz vshuiux htenc nuex Tishox lomx yaq.Ref 21:22 V.V 26:26
23 Kvkhoc rvtueq mnoz rueq ngaz muex muinz isaz hez muex muinz guirguenz mauk ngoz tueq, Tishox khaungkac nuex kvtuemc kuiuz. Ngaz rueq mnoz muex tvmtuing taq vphaungx kvkhoc mnoz rueq ngaz nuiyc mnoz httax vtuiux mungx vruex htauk nuex tvmtuing httax taungx ngoz tueq bomkhvmc shuiuz,” ngoz tueq jungx tueq.
24 Abraham rueq muinz, “Ngaz rueq bomkhvmc taq vshaungx,” ngoz tueq jungx tueq.
25 Abraham rueq Abimelek nvrc waz hez rueq yauk laungc maq nyvlc wvnc tueq yuix tumz lvmz kuex Abimelek muex tvtay jungx tueq.
26 Kvkaq Abimelek rueq, “Ngaz rueq tuiuz mauk, uraq lac kvkhoc rvtvnx. Mnoz rueq vphaungc nuex jungphvnx muq ningkhvnc nuex ngaz rueq majuiuc jix tay vshaungx,” ngoz tueq.
27 Kvruex yimaq Abraham rueq Abimelek muex khelbuenx nuiyc manx kuq vtueq tsuingnueyc rungx raz tueq.
28 Abraham rueq piq khelbuenx phungc wawc khelbuenx sahez mvshix kuex tv-phvlc koq tueq,
29 Abimelek rueq, “Mnoz rueq yvmx khoc lac kvkhoc ruez vshuiux?” ngoz tueq wiz tueq.
30 Abraham rueq, “Vruex khelbuenx sahez mvshix vruex lvmz taq shuiuz. Vkhoc shuimc ningkhvnc nuex vruex yuix tumz kuex ngaz rueq vhtuz rvtueq lvmz mnoz kvjungc lot tuiux,” ngoz tueq jungx tueq.
31 Kvruex baung kvyuq tsuingnueyc kvtuemc wuez tueq ningkhvnc nuex, kvruex baung kv-ngoc BershebaRef 21:31 Bersheba: Vruex muingc kuex Hebre maq “Kvtuemc Yuix Tumz” rvmuq ngoz ruiux “Yuix Tumz Mvshix” (26:33 nuex lawc shuinz). ngoz tueq.
32 Bersheba maq tsuinghez rungx raz lot yix, Abimelek nuiyc Phikol kuex Philistin mungx nuex yek waung tueq.
33 Kvruex yimaq Abraham rueq Bersheba nuex dumx wauk jungx kuex khic vtueq, Yehowa Pattup Pat-sac Tishox muex nawk palx kuq tueq.
34 Abraham kuex Philistin mungx nuex loayc hvlc httax tueq.