33
Israel Phvnx muex Moshe rueq Ruimruimx Kuq tueq
1 Tishox miq Moshe kuex max thueyc kaz nuex Israel miqsaz muex vkhoc ruimruimx kuq shec tueq.
2 Yehowa kuex Sinai Kanx maq kaz tueq;
vpiq kuex Edom mungx htauk nuex httax yaq shalx ikhoc dung kaz tueq.
Paran Kankhux maq vpiq miqsaz htauk nuex phelez kaz tueq.
Raungkamx bix htenc munshiz kuex vpiq rulc httax yaq,
vpiq yaukkeq kox nuex tsuinghez tvkoc wvrluic dung yaq.
3 Yehowa rueq vpiq miq kuex lungwawx yaq,
vpiq muex seng yaq jix htenc kuex tvkhup wungx kuq yaq.
Kvkhoc rvtueq naungshiq kuex vpiq yaz phaungx nuex bumx vtueq
vpiq rueq nvr yaq kuex phvnx wuez vshix.
4 Naungshiq kuex Moshe rueq vkuq Tvrac kuex phvnx vshix,
kvruex kuex naungshiq phvnx muex raungc hvlc tsak jungx rvtueq.
5 Tsuingshiq phvnx htenc nuiyc
walaungx bix htenc rvtuimx yaq nuex Yehowa kuex Israel
miqsaz hokhvmx muex yaungx kaz tueq.
6 Moshe rueq Ruben phvnx muex jungx tueq kuex:
“Ruben phvnx kuex miq vthvp yuq muinz,
mkaq muinz thueyc muq, htumx muq mruez kueq.”
7 Yuda phvnx nuex seng vtueq vkhoc jungx tueq:
“Yehowa lex, Yuda rueq romc lawc kuy tvkoc thoz yaq kuex tay kuq shuiuz;
Vganc phvnx htenc rulc tvrvromc yek shuiuz.
Yehowa lex, tsuingshiq tvkoc khvt kuq shuiuz,
Tsuingshiq ralx htenc tvgap gawx yaq kvyuq romc kuq shuiuz.
8 Vpiq rueq Lewi phvnx nuex seng vtueq vkhoc jungx tueq:Ref 33:8 Dw 28:30; 17:7; Wkh 20:13
“Yehowa lex, mnoz rueq Urim nuiyc ThummimRef 33:8 Urim nuiyc Thummim: Tishox thuinroc lvmx tuiuz lot tvkoc shomc waz bix rueq shuimc juing phvnnueyc, yvmx khoc wuez shuimx yaq nguinx kuex rvkhauk laz tuiuz miq. shuimx vtueq mnoz rueq vroc lvmx tvkhic kuq shuiuz;
Mnoz muex tvmtuing httax yaq mnvrc waz hez Lewi phvnx maq raz tueq,
Mnoz rueq Masa maq tsuingshiq kuex taruiyx lawc toq,
Meriba yuix kawx maq tsuingshiq muex hakhix vlvmz kuex tvkhic toq.
9 Tsuingshiq rueq miqmac nyuiuz vwaz, phuz vnox, suiuz vsaz htenc htauk nuex vjvnc,
Mnoz muex tvmtuing httax yaq kuex tvkhic wuez yaq.
Tsuingshiq kuex mnoz rueq nvr shuiux kvjaz kuex phvnx vtueq,
Mbomkhvrc nuex tvmtuing httax wuez yaq.
10 Tsuingshiq rueq mnoz Tvrac kuex phvnc tvkoc miq htenc muex tvluing kuq wuez shuex;
Tsuingshiq rueq mshomrawx htauk nuex shomc nawk kuy shomc kuq wuez shuex.
11 Yehowa lex, tsuingshiq phvnx kuex tvyungx tvluz shuiuz;
Tsuingshiq rueq shuimx kaz yaq htenc kuex raungc raq wvnc shuiuz.
Tsuingshiq ralx htenc kuex laukshiz kvtenc lot muq laz juing tvbunx gay shuiuz.
12 Benjamin phvnx nuex seng vtueq vkhoc jungx tueq:
“Benjamin kuex Yehowa rueq lungwawx vtueq tvkhup wungx kuq yaq;
Vpiq rueq tsuingshiq kuex nuiyq tuimc tvwungx kuq yaq,
Vpiq kuex tsuingshiq phungc mungx nuex httax yaq.
13 Piq rueq Yosep phvnx nuex seng vtueq vkhoc jungx tueq:
“Yehowa rueq tsuingshiq ghaq vraungx nuex raungx tvyunc tvkoc muinz,
Ghaq mungx wawc yuix tvdungc tvkoc muinz ruimc mruimx kuq shueq.
14 Shalx kawc rueq muinx yaq pulx thuey waqthuimx maq muinz,
Vraungx ghaq tv-phvnc vhvlx
pinhtumc vthuey vngoz maq muinz tsuingshiq ghaq vraungx
nuex ruimruimc kuy mrvhumc kueq.
15 Mvnnuex tsuingshiq rueq guimz
wvnc tueq kanx htenc kvyuq vhtawz vhttax pulx thuey htenc mmvrc kueq.
16 Tsuingshiq ghaq vraungx nuex vhvlx rungx vwanx lvmz htenc mmvrc kueq;
Wvr luic yaq rumz mungx maq kvjak yaq waz
Yehowa vhvlx ningkhvnc nuex ruimrix kejux mlvp wvnc shueq.
Yosep kuex phuz vnox hez muex shunshvlc jix ningkhvnc nuex
Piq phvnx rueq ruimrix kejux kuex mlvp wuez shueq.
17 Manx pung hungc muinz,
Ngac lawx rungx muinz Yosep nuex mhttax kueq,
Piq rungx htenc kuex Manase tvkoc vhingc hingc rvtueq,
Ephraim tvkoc vmunc munc rvtueq.
Kvruex maq miqphvnx htenc kuex tvhiz vtueq,
Ghaq tvsuip nuex httuiuc laz thuq gay shuex.”
18 Zebulun nuiyc Issakar phvnx nuex seng vtueq vkhoc jungx tueq:
“Zebulun kuex yuix lvmx maq pvkac pvylvyc vtueq mlvp luz shueq,
Issachar tsak vnyvmx piq yuimx nuex mpaung wvnc kueq.
19 Tsuingshiq rueq pungnuk miqsaz kuex kanx nuex gvl vtueq
Kvruex yuq shomc nawk kuy shomc kuq shuex.
Tsuingshiq rueq svmuktvrax wawc muinz
Taungkawx kumtsvy htenc wawc muinz tsak vnyvmx htenc lvp wuez yaq.
20 Gad phvnx nuex seng vtueq vkhoc jungx tueq:
“Gad ghaqphux kuex tvyungc kuy jix Tishox muex tvtsvmc wuez shuinz.
Gad kuex hangsic ikhoc bvmc vtueq vyauk dvyx muinz rvmuq
Khux rawz doc muinz puinz kauk gay shuex.
21 Tsuingshiq tvkoc vhvlx pinhtumc mungtan kuex thvl wvnc wuez tueq;
Walaungx mvnjuz tsuingshiq muex phvlx kuq tueq.
Israel walaungx bix rvtuimx kaz yaq nuex,
Tsuingshiq rueq Yehowa tvrac nuiyc vpiq rueq nvr yaq htenc kuex phvnx wuez yaq.”
22 Dan phvnx nuex seng vtueq vkhoc jungx tueq:
“Dan kuex hangsic vroalc ningkhvnc nuex;
Bashan mungx maq dawk vtueq kaz yaq.”
23 Naphtali phvnx nuex seng vtueq vkhoc jungx tueq:
“Naphtali kuex Yehowa rueq tvtsvmc kvmc kuy htvlx phawc ningkhvnc nuex
Phoay vrungx kejux lvp luz yaq;
Tsuingshiq mungtan kuex Galile Jumx maq ghaqyaz kox nuex httuiuc laz yungx yaq.”
24 Asher phvnx nuex seng vtueq vkhoc jungx tueq:
“Asher kuex vganc phvnx htenc htauk nuex muinz ruimrix kejux vjvnc lvp yaq.
Piq kuex vphuz vnox hez htauk nuex muinz htvlx phawc vshalc pinhtumc rvtueq,
Piq ghaq vraungx nuex olip jungx htenc maq mrungx wanx kueq.
25 Piq ghaqyungx htenc kuex yanx kaluix maq mtvwungx shueq,
Piq kuex mkaq muinz kvkhup wungx vtueq mhttax kueq.”
26 Israel miqsaz lex, nuimshiq Tishox rulc tv-ngvlc juing tishox vganc vguez,
Vpiq kuex ngauz vngax maq phuemx htauk nuex jauz vtueq,
raungx kuex lvy laq vtueq nuimshiq muex romc kuy tvkoc httuiuc kaz tuex.
27 Tishox rueq nuimshiq kuex pattup pat-sac tvkhup wungx kuq yaq;
Vpiq rueq pattup yauk phumz maq nuimshiq muex romc kuq yaq.
Vpiq rueq nuimshiq khuemc juing lvmx wawc ralx htenc kuex yurc gay tueq,
ralx htenc kvruex tvbac gay tvkoc nuimshiq muex nvr yaq.
28 Kvkhoc rvtueq raungwawc buing dvy vtueq nuiyc,
ghaq wawc yuix dung vtueq
tuiz vtsvmz nuiyc svpiq tix kvjumx yaq mungx nuex
Yaku suiuz vsaz htenc kuex nomic maq httax lvp wuez tuex.
29 Israel lex, nuimshiq nuex thuinhvlx yaq!
Yehowa rueq nuimshiq kuex palc wvnc ningkhvnc nuex nuimshiq kuex vganc phvnx rulc rv-ngvlc muit.
Yehowa vpiq rueq nuimshiq kuex tvkhup wungx vtueq,
lot laungc wvnc juing kuq yaq nuimshiq kvwungx juing lak nuiyc yaung rvtueq.
Nuimshiq ralx htenc kuex menjenc kuy tvkoc thoz ruiux yuq,
kvkaq nuimshiq rueq tsuingshiq kuex tvrul nyet nuiuz gay shuinx.