14
Tvwanc rvtueq Vkhoarc Vnyerc Htungx
1 “Nuimshiq kuex Yehowa nuimshiq Tishox miqsaz htenc rvtuit. Kvkhoc rvtueq vthueyc kay jix waz tvkoc khoarnyerx wuez tuinx nuex vganc jix miq htenc ikhoc miqmac shauk vgvnz kuex nauk tvmac tsac kaz, khaungkuimx wawc khumul muinz nauk sulc kaz. Ref 14:1 Lew 19:28; 21:5
2 Yehowa rueq ghaq htauk nuex httax yaq miqphvnx htenc wawc nuimshiq kuex vpiq miqsaz muex thvl wvnc tueq ningkhvnc nuex nuimshiq kuex Yehowa nuimshiq Tishox rueq guimz yaq.Ref 14:2 Dw 19:5-6; Tvrac 4:20; 7:6; 26:18; Tit 2:14; 1Pet 2:9
Vsawc nuiyc Sawc Muq Ngvmx saz
(Lew 11:1-47)
3 “Yehowa rueq sawc muq phvnx ngoz tueq htvp htaz taq yaq ngvmx saz phvnx htenc ngvmx kuex phuiuz mvy muq.
4 Nuimshiq rueq phuiuz mvy yaq ngvmx saz kuex: manx, khelbuenx, khelkhix,
5 khiyix, yaruix khelbuenx, nyaqsez rvmuq ngoz ruiux jaw ngic,
6 yaz httuinc khoz vtueq vsvy tvyez yaq ngvmx saz htenc rvtueq.
7 Yuq muinz vyaz httuinc muinz khoz muq vsvy muinz tvyez muq ngvmx saz htenc kuex phuiuz mvy muq. Nuimshiq rueq phuiuz mvy muq phvnx kuex: kamel, rabit, waukpot htenc rvtueq. Kvruex kuex vsvy tvyez ruiux muinz vyaz httuinc khoz muq ningkhvnc nuex sawc muq ngvmx saz phvnx ngoz tueq htvp htaz tvy rax.
8 Wauk ngvmx kuex phuiuz mvy muq. Wauk kuex vyaz httuinc khoz ruiux muinz vsvy tvyez muq ningkhvnc nuex sawc muq ngvmx saz ngoz tueq htvp htaz tvy rax. Tvwanc tvy vruez ngvmx saz vruex kuex phuiuz mvy muq, vthueyc vruez kaz vmaungx doc muinz htuinc kay mvy muq.
9 “Nuimshiq rueq vshuiuq vhttax phvnx nuiyc vsuik vhttax phvnx ngaq kuex svy mvy yaq,
10 yuq muinz yuix nuex httax yaq vshuiuq vguez phvnx nuiyc vsuik vguez phvnx ngvmx kuex phuiuz mvy muq; kvruex kuex sawc muq ngoz tueq htvp htaz tvy shec rax.
11 “Nuimshiq rueq vsawc wushawx htenc kuex phuiuz mvy yaq.
12-18 Nuimshiq rueq phuiuz mvy muq phvnx wushawx kuex: lawx butux, wuzkhuiuq, lawx saz, wushuirx shoz, wuzkhax, lawtawx, wuzokhung, lawtawx wukvmx, jumsaz wukvmx, lawx wukvmx, wutuiux guip, lawx kerux, phauk suiyq htenc rvtueq.
19 “Vraungx httax yaq yungsuiuz yawxsaz lotlaz kuex sawc muq ningkhvnc nuex phuiuz mvy muq.
20 Vsawc phvnx yungsuiuz yawxsaz kuex nuimshiq rueq phuiuz mvy yaq.
21 “Piq thueyc thueyc vthueyc kaz ngvmx kuex phuiuz mvy muq. Nuimshiq rulc ghaqshiz nuex httaz jix pungnuk miqsaz rueq kvruex ngvmx kuex phauk lvp shuex, rvmuq ngoz ruiux vngvmx kuex pungnuk miqsaz muex shaungc kuy mvy yaq. Nuimshiq kvruex kuex Yehowa nuimshiq Tishox rueq guimz yaq; nuimshiq kuex vpiq miqsaz rvtuit.Ref 14:21 Dw 23:19; 34:26
“Khelbuenx saz rvmuq ngoz ruiux khelkhix saz kuex vkuiux puix tix maq shunglumc mvy muq.
Mvnz Rokshiz wawc Mvnshiz kuy Tvrac
22 “Wawc tek nuimshiq wuik vnax htenc wawc dung yaq vthuey vngoz mvnz rokshiz wawc mvnshiz kuex pungbaung nuex lvmc tvy shec rax.Ref 14:22-29 Lew 27:30-33; Wkh 18:21
23 Kvruex yimaq Yehowa nuimshiq Tishox rueq vthvl taq shec nawk palx juing baung nuex kaz vtueq vpiq httax yaq baung kvmaq nuimshiq rueq mvnz rokshiz wawc mvnshiz lvmz taq shec tuit tuiz vtsvmz, svpiq tix, olip puiz, manx nuiyc khelbuenx nyuiuz phaungc sahez kuex phuiuz svy wuez rax. Ekvkhoc maq raz tueq Yehowa nuimshiq Tishox muex mkaq muinz tvtsanc nganc kuy juing lvmz kuex nuimshiq rueq tuiuz wvnc wuez shuinx.
24 Yehowa rueq nuimshiq muex ruimruimc kuy ningkhvnc nuex nuimshiq rueq lvp taq shuinx hup vsvmx kvwawc mvnz rokshiz wawc mvnshiz kuex nawk palx juing baung nuex lvmc lvy tvkoc yalc hvlc ngoz ruiux yuq,
25 hup vsvmx kvruex shaung vtueq lvp shuinx kuimphox kuex nawk palx juing baungshiz dvyx kvyuq lvmc lvy rax.
26 Kvruex kuimphox kvmaq nuimshiq rueq vroc phvnx manx ngvmx, khelbuenx ngvmx, svpiq tix, joal htenc ruiyx vtueq Yehowa nuimshiq Tishox httax yaq baung kvmaq nuimshiq nuiyc nuimshiq yuimx wuinz htenc rueq vshuenc vruenc maq phauk saq wuez shuinz.
27 “Nuimshiq ghaq nuex httax yaq Lewi phvnx miqsaz nuex miqmac hup svmx ngoz tueq vguez ningkhvnc nuex tsuingshiq muex shuimc kuy juing kuex nauk tvkhvlc kaz.
28 Wawc thuimx htumx wvnc nuex laukshiz nuimshiq rueq lvp shuinx vthuey vngoz htenc kvwawc mvnz rokshiz wawc mvnshiz kuex nuimshiq ghaq kvyuq tvjomx tvy rax.
29 Kvruex phuiuz vsvy juing htenc kuex miqmac hup svmx ngoz tueq vguez Lewi miqsaz htenc, nuimshiq ghaq nuex httax yaq pungnuk miqsaz htenc, nojix sahez, mvntix nyuiuz tamx kvruex hez tvkoc rvtueq. Tsuingshiq rueq kvruex phuiuz vsvy kuex rax yaq tanc khvnc lvmc phuiuz svy mvy yaq. Ekvkhoc shuimx kaz ruiux yuq kuex Yehowa nuimshiq Tishox rueq nuimshiq rueq shuimx shuinx ruip rawx kvyuq ruimruimx kuq kv-phuinx.