13
Barnaba nuiyc Sholu Httauk tvkaz
1 Antiok wawc phungc nuex shvmmax bix nuiyc tvluingc waz hez wvyvmc lomx naungx tueq: kvruex hez kuex Barnaba, (Vnyauk ngoz yaq) Simon, Kirene miqsaz Lukiu, (Herod mungx walaungx waz muex nosaz jauz wawc kungjix) Manaen nuiyc Sholu rvtueq.
2 Tsuinghez kuex Taungjix yauk shuimc shuimx kaz ruiux, dungc svy mamc vtueq httax yaq nuex Vsawc Siyac rueq tsuingshiq muex, “Sholu nuiyc Barnaba kuex ngvy yauk shuimc tvkoc pungx httauk taq shuinz,” ngoz tueq.
3 Kvkaq tsuingshiq rueq dungc svy mamc ruiux Sholu nuiyc Barnaba htauk nuex yauk tvdaungc vjux thoz kuq tueq, kvruex yix maq tsuingnueyc kuex phungc yauk shuimc tvkoc nvr tvkaz tueq.
Kupru nuex Yauk Shuimx tueq
4 Barnaba nuiyc Sholu kuex Vsawc Siyac rueq tvkaz tueq rulc rv-ngvlc Selukia nuex httuiuc kaz tueq, kvruex ghaq maq hulawx Kupru julc mungx ghaq nuex lix maq kaz wvnc tueq.
5 Tsuingnueyc kuex Salami ghaq nuex httuiuc kaz vtueq, vjux thoz yuimx htenc nuex Tishox bomjungc tvluing kuq tueq. Yohan Marku muinz tsuingnueyc rulc yauk shuimc romc kuq naungx tueq.
6 Tsuinghez rueq julc kvruex yanz laq vtueq Papho nuex khuemx kaz tueq, kvruex ghaq kvyuq vrot vkaq shvmmax washiz vmuingc Bar-yesu ngoz yaq waz Yuda miqsaz rvtueq mantan thenc hvlc waz muinz ruez, vrot shvmmax muinz ruez waz kuex humc tueq.
7 Kvruex waz kuex mungx walaungx waz Sergiu Paulu kungjix waz rvtueq. Kvruex mungx walaungx waz kuex Tishox bomjungc tay roc vtueq, Barnaba nuiyc Sholu kuex tvgvl tueq.
8 Yuq muinz (Greek kvjaz maq Elima muingc yaq) mantan thenc jix waz kuex phungc lvmx nuex mungx walaungx waz kvmluimx muq tvkoc tsuingnueyc kuex tuingshaung tueq.
9 Kvkaq Polu ngoz yaq Sholu kuex Vsawc Siyac vmvrx maq piq kuex tvtsuingc lawc vtueq,
10 “Htaungc waz saz lex! Mnoz kuex vhvlx phvnx ruip saz muex ralx waz rvtoq. Mnoz nuex thuinz vkoarx vrot vkaq lvmx lotlaz mvrc yaq, mnoz rueq mkaq muinz Taungjix tsuingrux lvmx kuex rot muq muex tvyaungc vshuiux.
11 Majuiuc dvyx Taungjix yauk kuex mhtauk nuex httuiuc wvnc vtueq mmuik mawz wvnc ruiux baunglaung shiz raungnuiyq vwuic kuex khiz lvp shuiux rvmuq,” ngoz kuq tueq.
Kvkaq dvyx mantan thenc jix waz kuex vmuik mawrawz wvnc vtueq, vmuik nuex raungnyauk ikhoc yaungc kay ningkhvnc nuex yauk maq het shvlc jix miq thuiyx tueq.
12 Mungx walaungx waz rueq kvkhoc yaungx wvnc tueq lvmz kuex khiz vtueq kvmluimx wvnc tueq, piq rueq Taungjix lvmz tvluingc kuy bomc kuex tay vtueq vwangc rvtueq.
Pisidia Mungx Antiok nuex
13 Polu nuiyc piq kungjix htenc kuex Papho ghaq maq lix nuex ngaungc vtueq, Pamphilia mungx wawc Perga ghaqyungx nuex httuiuc waung tueq, Yohan Marku kuex tsuingnueyc rulc rv-phvlc vtueq Yerusalem nuex yek waung tueq.
14 Tsuinghez kuex Perga maq kvtenc kaz wvnc vtueq Pisidia mungx Antiok nuex httuiuc waung tueq, Vguilc Raungnuiyq vjux thoz yuimx nuex nyuip waung vtueq ngaungc tueq.
15 Kvruex yimaq Moshe Tvrac luik nuiyc shvmmax bix luik kuex wvllawc lot vtueq vjux thoz yuimx nuex yauk shuimc jix walaungx bix rueq miq tvkaz vtueq: “Phunox bix lex, nuk miqsaz muex bomjungc kuy juing vhttax shuex vguez lac vhttax yuq lec jungx kuq shuinz,” ngoz tueq.
16 Polu kvtenc jvp vtueq yauk tvkhic yaq lvmx maq vkhoc jungx tueq:
“Nuimshiq Israel miqsaz htenc nuiyc Tishox muex nawk palx jix Pungnuk miqsaz htenc lotlaz rueq tay wuez shuinz!
17 Israel miqsaz htenc muex Tishox rueq naungshiq jix vwaz htenc Ejip mungx nuex wuinz waz ikhoc httax tueq nuex tsuingshiq kuex thvl vtueq, miqphvnx yunghvlc muex tvyaungc kuq tueq, luimc vkawc yunghvlc maq kvruex mungx kvwawc tvdung shvlx wvnc vtueq,Ref 13:17 Dw 1:7; 12:51
18 kumtsvy tvnx nuex wawc rok bvlic nuex httuiuc laz tsuingshiq layx kuex nanx kuq wvnc tueq.Ref 13:18 Wkh 14:34; Tvrac 1:31; Tvts 95:9
19 Kvruex yimaq Kanaan mungx wawc miqphvnx phvnx mvshix kuex tvbac gay ruiux, kvruex mungx kuex vpiq miqsaz muex phvlx kuq ruiux tvguimz lawc tueq.Ref 13:19 Tvrac 7:1; Yosh 14:1
20 Vkhoc yaungx wvnc tueq nuex httuiuc laz raungwawc 450 httvmx wvnc tueq.
“Kvruex yimaq shvmmax Samuel dung tueq nuex httuiuc laz phoc waz bix taq tueq.Ref 13:20 Phoc 2:16; 1Sam 3:20
21 Kvruex yimaq tsuingshiq rueq hokhvmx washiz tvy kuy tvkoc thoz ningkhvnc nuex Tishox rueq Benjamin waruiuz wawc Kish saz Sholu kuex wawc rok bvlic hokhvmx tvyaungc kuq tueq.Ref 13:21 1Sam 8:5; 10:21
22 Kvruex yimaq Tishox rueq Sholu kuex tvdux gay ruiux, Dawid kuex tsuingshiq hokhvmx muex tvyaungc tueq. Kvruex waz nuex seng vtueq Tishox rueq jungx tueq kuex: ‘Jese saz Dawid kuex ngvy thuinz rulc rvhumc jix waz, ngaz rueq shuimx roc shaungx phvnx htenc kuex shuimc jix waz rvtueq ngaz rueq khiz tauk,’ ngoz tueq.Ref 13:22 1Sam 13:14; 16:12; Tvts 89:20
23 Tishox kuex vpiq bomkhvmc rulc rv-ngvlc Israel miqsaz htenc tvkoc palc daungc jix waz Yesu kuex Dawid suiuz vsaz wawc tvdung kuq tueq.
24 Yesu rueq yauk max shuimx phaungc nuex Yohan rueq Israel miqsaz lotlaz muex thuinz layc vtueq, yuix luip lvmz wvnc shuinz ngoz tueq jungphvnx kuq tueq.Ref 13:24 Mak 1:4; Luk 3:3
25 Yohan kuex piq rueq shuimc juing yauk shuimc vlot wvnc nanac nuex piq rueq nuk miqsaz htenc muex, ‘Ngaz kuex ukhaq ngoz tueq lac ngoz vshuinx? Ngaz kuex nuimshiq rueq thuinz tvluimc vshuinx waz kuex rvmuq. Yuq muinz tay shuinz! Vpiq kuex ngvy yix nuex dung tuex; ngaz kuex vpiq yapaungc doc muinz dawc kuy aungx muq,’ ngoz tueq.Ref 13:25 Mat 3:11; Mak 1:7; Luk 3:16; Yoh 1:20,27
26 “Abraham suiuz vsaz phvnx iphuz inox Israel miqsaz htenc nuiyc Tishox muex nawk palx jix vganc Pungnuk miqsaz htenc lotlaz lex, vruex palc daungc wvnc lvmx nuex seng yaq bomjungc kuex naungshiq kox nuex httuiuc waung ruex rvtueq.
27 Yvmx khoc lac ngoz ruiux lec Yerusalem nuex httaz jix htenc nuiyc tsuingshiq lvmx shvlc jix htenc rueq vpiq kuex palc daungc Taungjix ngoz tueq tuiuz muq, Vguilc Raungnuiyq wvl ruiux yaq shvmmax luik muinz tsuingshiq rueq vlvmx tuiuz muq, yuq muinz tsuingshiq kuex shvmmax bix rueq jungx wvnc tueq kvjaz tvhungx tvkoc Yesu muex vthueyc murx tvgurc tueq.
28 Kvkhoc vthueyc juing mvrax yvmx muinz khiz muq, yuq muinz vpiq kuex vthvy gay tvkoc Pilat yauk wawc thoz tueq.Ref 13:28 Mat 27:22-23; Mak 15:13-14; Luk 23:21-23; Yoh 19:6,15
29 Tsuingshiq rueq vpiq nuex seng vtueq Rumvrc luik nuex httax yaq htenc kuex shuimc tvhungx lot yix, vmaungx kuex yauk juinc bulx wawc tvdvy lvmz vtueq luip ruiuz khux nuex luip gay tueq.Ref 13:29 Mat 27:57-61; Mak 15:42-47; Luk 23:50-56; Yoh 19:38-42
30 Yuq muinz Tishox rueq vpiq kuex vthueyc wawc tvyuing tvtenc wvnc tueq,
31 kvmaq kungkhux nuex vpiq rulc vroc nuex Galile mungx maq Yerusalem nuex phvnc wvnc naungc jix htenc muex raungnuiyq loayc hvlc shvmx kvkhic shec tueq. Tsuingshiq rueq majuiuc Israel miqsaz muex vpiq lvmz hakhix khvmc kuq yaq.Ref 13:31 Kamx 1:3,11; 5:32; Mat 28:16; 1Kor 15:5-7
32-33 Tvtsvmc shic pvlyungx vnueyc nuex,
‘Mnoz kuex Isaz rvtoq;
majuiuc raungnuiyq maq ngaz kuex m-waz muex yaungx wvnc vtaungx,’
ngoz tueq httax yaq rulc rv-ngvlc Tishox rueq Yesu kuex vthueyc wawc tvyuing tvtenc wvnc ningkhvnc nuex naungshiq jix vwaz muex vtaq shec bomkhvmc kuex tsuingshiq suiuz vsaz phvnx rvtiq naungshiq tvkoc tvhungx wvnc tueq. Nuiyshiq rueq vruex Thuix Thaungx Vhvlx kuex nuimshiq muex jungphvnc kuy tvkoc vyuq httuiuc kaz rix rvtueq.Ref 13:33 Tvts 2:7; Heb 1:5; 5:5
34 Kvmaq vpiq luip ruiuz khux wawc nvmx kaz muq maq vthueyc wawc yuing kvtenc wvnc tueq lvmz nuex seng vtueq Tishox rueq jungx tueq kuex:
‘Dawid muex ruimruimc kuy tvkoc
bomkhvmc taq shec tueq rulc rv-ngvlc ngaz rueq nuimshiq muex
kejux kuex kuq shaungx,’ ngoz tueq.Ref 13:34 Esa 55:3
35 Tvtsvmc luik pvl vbez nuex muinz,
‘Vpiq rueq miqmac muex tvmtuing
nvrc waz kuex luip ruiuz khux nuex tvnvmx gay shuex rvmuq,’
ngoz tueq httax yaq.Ref 13:35 Tvts 16:10
36 Dawid kuex piq rullungx vtvraungx baunglaung Tishox kvmungx httax yaq rulc rv-ngvlc phvnc lot yix thueyc wvnc vtueq, jix vwaz tamx luip ruiuz khux nuex luip gay rvhumc tueq, piq shauk vgvnz muinz luip ruiuz khux nuex nvmx wvnc tueq.
37 Yuq muinz vthueyc wawc Tishox rueq tvyuing tvtenc wvnc tueq waz vpiq pumz kuex kvkhoc nvmx bac wvnc muq doc rvtueq.
38-39 Kvkhoc rvtueq phunox bix Israel miqsaz lex, Yesu khac maq mvrax dawc lot juing bomjungc lvmz kuex nuimshiq muex ngaz rueq jungx kuq vphaungx kvmuinz, vpiq muex kvmluimx jix htenc kuex Moshe Tvrac rueq dawc kuq lot muq phvnx mvrax lotlaz kuex dawc kuq lot yaq lvmz kvmuinz, nuimshiq muex nuiyshiq rueq tvtuiuz vphix.
40 Kvkhoc rvtueq shvmmax bix luik nuex jungx shec tueq kvjaz htenc nuimshiq htauk nuex hungx woz muq tvkoc honc lvmz wuez shuinz.
41 ‘Lawc shuinz, miq shummarc jix nuk lex! Kawc yawc vtueq
thueyc wvnc kuinz!
Majuiuc raungnuiyq ngaz rueq shuimc juing yauk shuimc kuex
miq washiz rueq jungx kuq ruiux muinz nuimshiq kvmx tuinx rvmuq!’” ngoz tueq httax yaq.Ref 13:41 Hab 1:5
42 Polu nuiyc Barnaba kuex vjux thoz yuimx wawc kvtenc kaz wvnc tueq nuex, miq htenc rueq tsuinghez muex yix wawc Vguilc Raungnuiyq muinz vruex lvmz htenc kuex lauk shiz jungx kuy yek tvkoc thoz tueq.
43 Vjux thoz yuimx maq dung wvnc tueq nuex Yuda miqsaz htenc nuiyc Yuda phungc nuex kvwek wvnc jix htenc rueq Polu nuiyc Barnaba yix nuex phvnx wvnc wuez tueq. Kamx waz hez rueq tsuingshiq kuex Tishox kejux lvmx nuex tvhttoarc vtueq rullungx tvraungx wvnc tvkoc jungphvnx kuq tueq.
44 Yix wawc Vguilc Raungnuiyq nuex Tishox bomjungc tay kay ngoz tueq wvghaq pumz ngoc juing tanc khvnc miq htenc kuex rvtuimx kaz tueq.
45 Yuda miqsaz htenc kuex nuk miqsaz paunghvlc khiz vtueq, khunnyerc svy thuinz maq Polu rueq tvluing wvnc tueq bomjungc kuex khawx lvlx ngoz ngax wuez tueq.
46 Polu nuiyc Barnaba rueq khvmc thuinz maq jungx tueq kuex, “Nuiyshiq rueq Tishox bomjungc kuex nuimshiq muex kungkhux tvluing kuq vphix, yuq muinz nuimshiq rueq kvruex tvrac kuex tuip gay ruiux, miqmac shauk vgvnz kv-ngoc pattup rullungx rulc hungx htaungx muq jix ngoz tueq kv-ngoc vtuinx ningkhvnc nuex nuiyshiq kuex nuimshiq kox wawc dung wvnc vtueq, Pungnuk miqsaz kox nuex kaz wvnc vtix.
47 Yvmx khoc lac ngoz ruiux lec nuiyshiq muex Taungjix rueq:
‘Palc daungc wvnc lvmx kuex mungkawx lotlaz rueq lvp wvnc
tvkoc nuimshiq kuex Pungnuk miqsaz muex raungwuic
yaungc tvkoc ngaz rueq thvl taq vphaungx,’” ngoz tueq.Ref 13:47 Esa 42:6; 49:6; Luk 2:32
48 Pungnuk miqsaz htenc rueq kvruex kvjaz kuex tay vtueq kokez thuinz maq Taungjix bomjungc kuex tvtsvmc kvmc jungx tueq, kvmaq pattup rullungx lvp tvkoc vthvl taq htenc kuex kvmluimx wvnc tueq.
49 Kvkhoc rvtueq Taungjix bomjungc kuex wvmungx tuimx nuex nyvmc wvnc tueq.
50 Yuq muinz Yuda miqsaz htenc rueq Tishox muex nawk palx jix muingc jungc vhttax Pungnuk miqsaz yalxjuik rulx nuiyc kez walaungx bix htenc muex htuiuz shuiuz vtueq Polu nuiyc Barnaba kuex mulx tsvlx tvyurc gay tueq.Ref 13:50 2Tim 3:11
51 Kamx waz nueyc kuex tsuingshiq rueq ruez tueq lvmx kuex khawc lvlc ikhoc muex miqmac yaz wawc bokkhuyx kuex nuiuc gay shec ruiux Ikonium nuex kaz wvnc tueq.Ref 13:51 Mat 10:14; Mak 6:11; Luk 9:5; 10:11
52 Antiok nuex httaz jix kvmluimx miqsaz kuex vkoz vkez maq Vsawc Siyac mvrc wvnc wuez tueq.