10
Ammon Mi Le Siria Mi Kha A Tei Hna
(1Cha 19.1-19)
1 Cun mah hnuah cun Ammon mi hna siangpahrang cu a thi i a fapa Hanun nih amah hmun ah khan bawi a cang.
2 Cun David nih a thawh i, “Nahash fapa Hanun hi a pa nih ka cungah zumhawktlak tein a rak um bantuk khan a cungah zumhawktlak tein ka um ve lai,” tiah a ti. Cucaah David nih a pa kong ah khan amah cu va hnemh awkah a sinum a hei thlah hna.
Cun David sinum hna cu Ammon mi hna ram chungah khan an va phan.
3 Sihmanhsehlaw Ammon mi an bawi hna nih khan an bawipa Hanun cu, “David nih nangmah sinah hnemtu a hun thlah hna caah hin na pa kha a upat tiin maw na ruah? David nih hin khua chung hi kawl awk le ngiatthlai awk le tei awkah a sinum hna hi a hun thlah hna, a si lo maw?” tiah an ti.
4 Cucaah Hanun nih David sinum hna cu a lak hna i an khahmul a hnarcheu cio a meh hna i an khelbo zawn ah an puan cu a laifang in a tan hna i a kalter hna.
5 Mah cucu David kha an chimh tikah anmah don awkah mi a hei thlah hna; zeitintiah an ning a zak ngaingai ko. Cun siangpahrang nih cun, “Nan khahmul a corh òhan hlan tiang Jeriko khua ah cam ko u, cun nan ra kir òhan te lai,” tiah a ti hna.
6 Ammon mi hna nih annih cu David huat kan phor cang ti kha an theih tikah, Ammon mi hna nih cun mi an hei thlah hna i Beth-rehob i Siria mi hna le Zobah i Siria mi hna, ke ralkap 20-000 le Maakah ram siangpahrang le a mi 1-000, cun Tobram mi 12-000 kha an i ruaih hna.
7 Mah cucu David nih a theih tikah Joab le a òhawngmi ralkapbu vialte kha a thlah hna.
8 Cun Ammon mi hna cu an ra chuak i hauka luhnak ah khan raldoh awkah an i tiang; cun Zobah le Rehob i Siria mi hna le Tob le Maakah mi hna cu anmah tein ramlak ah cun an um ve ko.
9 Joab nih hmailei he hnulei he an ka tuk lai ti kha a hmuh tikah, Israel mi chungin thim khunmi a cheu kha a thim hna i Siria mi dohtu dingah khan a ningcang tein òan hmun a khuarter hna;
10 cun a tang rihmi a mi hna cu a unau Abishai kut tangah a chiah hna i Ammon mi hna dohtu dingah khan a ningcang tein òan hmun a khuarter hna.
11 Cun anih nih, “Siria mi hi ka caah an òhawn tuk ahcun na ka bawmh lai; sihmanhsehlaw Ammon mi hna kha na caah an òhawn tuk ahcun, ka ra lai i kan bawmh lai.
12 Ralòha ngaiin um tuah, cun kan mi hna le kan Pathian khua hna caah hin pasal si u sih; cun Bawipa nih a òha a tining paoh in tuah ko seh,” tiah a ti.
13 Cucaah Joab le a sin i a ummi hna nih cun i tuk awkah Siria mi cu an hei fuh hna i an hmaiah cun an zam.
14 Cun Ammon mi hna nih Siria mi an zam ti an hmuh tikah annih zong, cu bantukin Abishai hmai khan an zam ve i khua chungah khan an lut. Cun Joab cu Ammon mi he i tuknak khan a kir i Jerusalem ah a tlung.
15 Sihmanhsehlaw Siria mi hna nih Israel mi nih an kan tei ti kha an hmuh tikah, hmunkhat ah an i pum òhan.
16 Cun Hadadezer nih mi a hei thlah hna i Zufrates tiva ral i a ummi Siria mi hna kha an ratpi hna; Hadadezar ralkap phu ralbawi Shobak nih khan a hrui hna i Helam an ra phan.
17 Mah cucu David kha an chimh tikah Israel mi vialte kha hmun khat ah a pumh hna i Jordan tiva kha an tan i Helam kha an phan. Cun Siria mi nih khan David doh awkah cun a ningcang tein òan hmun an rak khuar i amah he cun an i tu.
18 Cun Siria mi cu Israel mi hna hmai in an zaam i David nih mi chungin rangleng 700 aa citmi hna le rangcung ralkap 40-000 kha a thah hna i an ralkapbu ralbawi Shobak kha a hliam i cucaah cun khika ah a thi.
19 Cun Hadadezer sal a simi siangpahrang vialte nih khan Israel mi nih an kan tei ti kha an hmuh tikah, Israel mi he cun remnak an ser i an kut tangmi ah an cang. Cucaah Siria mi nih Ammon mi hna bawmh kha an ngamh ti lo.