5
Filistin Mi Ram Ah Kuang Kha A Tang
1 Filistin mi nih Pathian kuang kha an tlaih tikah, Eben-ezer in Ashdod ah an kalpi;
2 cun Filistin mi nih cun Pathian kuang cu an lak i Dagon inn chungah an luhpi i Dagon pawngah cun an chiah.
3 Cun a thaizing ah, Ashdod khuami hna cu zingkate in an thawh tikah, zohhmanh, Dagon cu a bawktakhup in vawlei ah Pathian kuang hmaiah cun a rak tlu. Cucaah Dagon cu an lak i a umnak kel ah khan an chiah òhan.
4 Sihmanhsehlaw a thaizing zingkate i an thawh tikah khan, zohhmanh, Dagon cu a boktakhup in vawlei ah Pathian kuang hmaiah a rak tlu ko i Dagon lu bul le a kut bul hna cu innkaba ah an rak ril ko; Dagon cu a pum thlur lawng kha a taang.
5 Dagon tlangbawi hna le Dagon inn chungah a lutmi vialte nih nihin tiangin, Ashdod i a ummi Dagon inn innka an lamh lonak cu, mah hi caah hin a si.
6 Ashdod khuami hna cungah Bawipa kut cu a rit i Ashdod khuami hna le a pawngkam i a ummi hna cu an thin a phanter hna i tak bonak in a hrem hna.
7 Cun Ashdod khuami nih zeitin thil umtuning a si kha an hmuh tikah, annih nih, “Israel Pathian i a kuang cu kan sinah a um awk a si lai lo, zeicahtiah a kut cu kan cung le kan khuazing Dagon cungah a rit ai,” tiah an ti.
8 Cucaah Filistin bawi vialte kha an cah an pumh hna i, “Israel Pathian i a kuang hi zeitindah kan tuah lai?” tiah an ti. Annih nih, “Israel Pathian i a kuang cu Gath hrawngah ratpi si tuah seh,” tiah an leh hna. Cucaah Israel Pathian i a kuang cu cuka ah cun an kalpi.
9 Sihmanhsehlaw an ratpi hnuah, Bawipa kut nih cu khua cu a ralchanh i launak nganpi a chuahter i cu khuami hna cu a tar a no in a hrem hna i an cungah tak bonak kha a chuak.
10 Cucaah Pathian kuang cu Ekron ah an kuat. Sihmanhsehlaw Pathian kuang cu Ekron ah a phak tikah, Ekron khuami hna nih cun, “Kanmah le kan mi hna kha thah awkah Israel Pathian i a kuang cu kan sinah an ratpi,” tiah an au.
11 Cucaah Filistin bawi vialte kha an cah an pumh hna i, “Israel Pathian i a kuang cu kalter ko u, kanmah le kan mi hna kha a kan thah nakhnga lo, amah umnak hmun ah kirter òhan ko u,” tiah an ti. Zeitintiah khua chungah khan òih a nung ngaingaimi launak a um dih. Pathian kut cu khika ah a rit ngaingai ko.
12 A thi lomi cu an bo dih i khua chung aunak thawng cu van tiang a kai.