18
Mikaiah Nih Ahab Ralrin A Pek
(1Sia 22.1-28)
1 Jehoshafat cu a rum ngaingai i upatnak a hmu; cun Ahab he Òhitumnak lei in i pehtlaihnak a ser.
2 Kum tlawmpal hnuah khin Ahab sinah Samaria ah a vung kal. Cun amah le amah sin i a kalmi hna cu Ahab nih tuu le cawtum tampi a rak thah hna i Ramoth-gilead hung doh awkah khan a sawm khawh.
3 Israel siangpahrang Ahab nih cun Judah siangpahrang Jehoshafat cu a thawh i, “Ramoth-gilead ah na hun ka kalpi hnga maw?” tiah a ti. “Kei le nang hi pakhat kan si ko, ka mi cu na mi an si ve ko. Raldohnak ah cun na sinah kan òang lai,” tiah amah cu a leh.
4 Cun Jehoshafat nih Israel siangpahrang cu, “ Bawipa bia cu dothlat hmasa rih tuah hen,” tiah a ti.
5 Cu tikah Israel siangpahrang nih profet kha hmunkhat ah a pumh hna, 400 an si, annih cu a thawh hna i, “Ramoth-gilead cu tuk awkah kan kal hnga maw, asiloah, kan i sum lai dah?” tiah a ti. Cun annih nih, “Hung kal ko, zeitintiah Bawipa nih siangpahrang kut chungah a pek,” an ti.
6 Sihmanhsehlaw Jehoshafat nih, “Hika ah hin kan hal khawh ding Bawipa profet a dang pakhat tal an um ti lo maw?” tiah a ti.
7 Cun Israel siangpahrang nih Jehoshafat cu a thawh i, “ Bawipa kan hal khawhnak ding mipa a dang pakhat a um rih, amah cu Imlah fapa Mikaiah a si; sihmanhsehlaw ka kong ah thil òha chim bal loin thil òhalo lawng kha a chim zungzal caah ka huat,” tiah a ti. Cun Jehoshafat nih cun, “Cuticun siangpahrang nih chim hlah seh,” tiah a ti.
8 Cun Israel siangpahrang nih bawi pakhat a auh i, “Imlah fapa Mikaiah kha khulrang in ratpi tuah,” tiah a ti.
9 Cun Israel siangpahrang le Judah siangpahrang Jehoshafat cu an bawi òhutdan cungah an òhu i an puan in an i thuam; Samaria hauka luhnak i phuhri ah khan an òhu; cun profet vialte hna cu an hmaiah an rak chim dulmal ko.
10 Cun Khenaanah fapa Zedekiah nih thir ki aa ser hna i, “Hi bangin Bawipa, nih, ‘Siria mi cu an rawk dih tiang mah hi hin na suk hna lai,’ a ti,” tiah a ti.
11 Cun cu bantuk òhiamòhiam in profet vialte nih cun an chim i, “Ramoth-gilead ah cun hung kal law hung tei ko; Bawipa nih siangpahrang na kut chungah an pek lai,” tiah an ti.
12 Cun Mikaiah kawh awk i an thlahmi lamkaltu nih khan amah sinah cun, “Zohhmanh, profet hna cu lungnge tein a òha lei in siangpahrang sinah an bia a si; nangmah na bia zong annih lak i pakhat i a bia bantuk si ve seh law an duhning lei in chim ve ko,” tiah a ti.
13 Sihmanhsehlaw Mikaiah nih, “ Bawipa a nun bangin, Bawipa nih ka sin i a chimmi cu, mah cucu ka chim ko lai,” tiah a ti.
14 Cun siangpahrang sinah a phak tikah, siangpahrang nih cun a rak thawh i, “Mikaiah, Ramoth-gilead cu hung tuk awkah kan kal lai maw, kan i sum lai dah?” tiah a ti. Cun anih nih a thawh i, “Hung kal u law hung tei hen u, annih cu nangmah kut chungah pek an si ko lai,” tiah a leh.
15 Sihmanhsehlaw siangpahrang nih a thawh i, “Biatak dah ti lo cu Bawipa min in ka sin i na chim lo awkah voi zeizat dah bia kan kamter lai?” tiah a ti.
16 Cun anih nih a thawh i, “Israel mi vialte cu khaltu a ngei lomi tuu bantukin tlang cung i an i òhek dih kha ka hmuh; cun Bawipa nih, ‘Hi hna hi bawi an ngei lo, anmah le an inn cio ah dai tein kir hna seh,’ a ti,” tiah a ti. Ref 18.16: Nam 27.17; Eze 34.5; Mat 9.36; Mar 6.34
17 Cun Israel siangpahrang nih Jehoshafat cu, “Keimah kong ah cun òhatnak si loin chiatnak a chim lai, tiah kan ti òheo lo mei?” tiah a ti.
18 Cun Mikaiah nih cun, “Cucaah Bawipa bia cu thei tuah: Bawipa cu a bawi òhutdan cungah a òhut i vancung ralkapbu vialte a orhlei le a kehlei ah an dir kha ka hmuh;
19 cun Bawipa nih a thawh i, ‘Israel siangpahrang Ahab cu Ramoth-gilead ah hung kal i khika ah a thih naklai ahodah a lem lai?’ tiah a ti. Cun pakhat nih thil pakhat a chim i a dang pakhat nih thil dang pakhat a chim ve.
20 Cun thlarau pakhat cu a hung chuak i Bawipa hmaiah cun a dir i, ‘Keimah nih ka lem lai,’ tiah a ti. Cun Bawipa nih, ‘Zei in dah na lem lai?’ tiah a ti.
21 Cun anih nih, ‘Ka va kal lai i a profet vialte hna kaa chungah nal thlarau ka va si lai,’ tiah a ti. Cun anih nih, ‘Na va lem hrimhrim lai i na va lem khawh taktak lai; va kal law cu bangin va tuah,’ tiah a ti.
22 Cucaah cun zohhmanh, Bawipa nih hi na profet hna kaa chungah hin nal thlarau a chiah cang; Bawipa nih nangmah kong ah òhat lonak a chim cang,” tiah a ti.
23 Khi tikah Khenaanah fapa Zedekiah kha a pawngah a ra i Mikaiah kha a biang ah a bengh i, “Zei lam in dah Bawipa thlarau cu nangmah sinah bia chim awkah ka sinin a chuah?” tiah a ti.
24 Cun Mikaiah nih a thawh i, “Zohhmanh, khi ni ah, innchung chungchin dal i i thuh awkah na kal tikah na hngalh te lai,” tiah a ti.
25 Cun Israel siangpahrang nih cun, “Mikaiah kha tlai u law khua uktu Amon le siangpahrang fapa Joash sinah khan va kalpi u;
26 cun siangpahrang nih hi bangin, ‘Hi pa hi thong ah rak thla u law rawl tlawmte le ti tlawmte lawng, daihnak in ka ra kir òhan hlantiang, rak pe u, a ti,’ tiah va chim hna u,” tiah a ti.
27 Cun Mikaiah nih a thawh i, “Daihnak in na kir òhan a si ahcun, Bawipa nih ka sinah bia kha a chim lo a si lai,” tiah a ti. Cun amah nih cun, “Nannih mi vialte hna, thei tuah u,” tiah a ti.
Ahab Thihnak
(1Sia 22.29-35)
28 Cucaah Israel siangpahrang le Judah siangpahrang Jehoshafat cu Ramoth-gilead ah khan an hung kal.
29 Cun Israel siangpahrang nih Jehoshafat cu a thawh i, “Ka mui kaa hleng lai i raldohnak chungah ka kal ve lai, sihmanhsehlaw nang cu na bawi puan kha i aih ko,” tiah a ti. Cun Israel siangpahrang cu a mui aa hleng i raldohnak chungah cun a kal.
30 Cun Siria siangpahrang nih cun a rangleng bawi hna cu, “Israel siangpahrang dah ti lo cu, ahohmanh a hme siseh, a ngan siseh, tu hna hlah u,” tiah nawl a pek hna.
31 Cun rangleng ralbawi hna nih khan Jehoshafat kha an hmuh tikah, “Amah hi Israel siangpahrang cu a si ko,” tiah an ti. Cucaah amah tuk awkah khan an i mer; cun Jehoshafat cu a au i Bawipa nih a bawmh.
32 Rangleng ralbawi hna nih khan amah cu Israel siangpahrang a si lo ti kha an hmuh tikah amah dawinak khan an i mer òhan caah Pathian nih a sinin kaa dang leiah a hnuh hna.
33 Sihmanhsehlaw pakhatpa nih tinh setsai loin a li cu a koih sawhsawh i Israel siangpahrang cu a thir ngaphaw angki le a òangphaw karlak ah a khen; cucaah a rangleng a mawngtu cu, “I mer law hi i tuknak chung hin ka chuahpi tuah, zeicahtiah an ka hliam ai,” tiah a ti.
34 Cun cu ni cu an i tuknak kha a fak ngaingai i Israel siangpahrang cu Siria mi hna lei hoih in a rangleng chungah khan zanlei tiang dohchom in a um; cun nitlak ah a thi.