SALM 129
Israel Mi Ral Hna Teinak Ca Thlacamnak
Kainak Hla
1 Israel, na no lio tein na ral nih
zeitluk in dah
an rak in hrem kha, chim tuah!
2 I thawh law,
“Ka no lio tein ka ral nih fak piin
an ka hrem zungzal,
sihmanhsehlaw an ka tei lo.
3 Ka keng cu leithuan in an thuan,
leikuang rinkuar sau pipi in
an tuah bantuk khin an tuah.
4 Sihmanhsehlaw a dingmi
Bawipa nih saltannak chung cun
a ka luatter,” tiah chim tuah.
5 Zion a huatu vialte hna cu
sung hna seh law
kir dih hna seh!
6 Inncung ah a khomi ram,
hleh cut hlan i a carmi bantuk khi
si hna seh.
7 Cu bantuk ram cu ahohmanh nih
pumh awkah an sak hna lo i
a tom in i phorh awkah
an rel hna lo.
8 Cucaah an pawng i a kalmi
ahohmanh nih,
“ Bawipa nih thluachuah
in pe hna seh,
Bawipa min in thluachuah
kan in pek hna,” an ti hna lai lo.