6
Nazir Mi Ca Phung
1 Cun Bawipa nih Moses cu a chawnh i hi bangin a ti,
2 “Israel mi cu va chim tuah hna, pa nih siseh, nu nih siseh a si khunmi biakamnak, Nazir biakamnak, Bawipa sin i i thleidan awkah a tuah tikah,
3 zu le zureu din awk kha a hrial lai; zu in siseh, zureu in siseh, sermi a thormi zong kha a ding lai lo, cun mitsur hang zong a ding lai lo, mitsur thei zong a ei lai lo, a hring in siseh, a car in siseh. Ref 6.3: Luk 1.15
4 Aa thleidan chung vialte cu mitsur ruang in a chuakmi thil zeihmanh a ei lai lo, a ci le a hawng hmanh a ei hna lai lo.
5 “I thleidan awk i bia aa kam chung vialte cu a lu cu namte zeihmanh nih a tawng lai lo; Bawipa ca i aa thleidannak a caan a tlin hlantiang cu a thiang lai; a sam kha aa zuah lai.
6 “ Bawipa sinah aa thleidan chung vialte cu miruak pawngah a kal lai lo.
7 A pa siseh a nu siseh, a unau siseh a far siseh, cu hna an thih hmanh ahcun, aa thurter lai lo; zeicahtiah Pathian sin i aa thleidannak cu a lu cungah a um.
8 Aa thleidan chung vialte Bawipa caah a thiang.
9 “Cun mi pakhatkhat cu a pawngah duak tiah a thih sual i a thiantermi a lu kha a buar ahcun, aa thianh ni ah a lu kha aa meh lai; ni sarihnak ni ah aa meh lai.
10 Ni riat ni ah òhuro pahnih maw, laileng no pahnih dik, tonnak thlam innka ah, tlangbawi sinah a rak put lai.
11 Cun tlangbawi nih pakhat cu sual thawinak caah a thawi lai i pakhat cu khangh thawinak caah a thawi lai, cun remnak a serpiak lai, zeitintiah miruak thawngin a sual cang. Cun cu ni theng ah cun a lu kha a thianter lai i
12 aa thleidan caan kha Bawipa sinah aa thleidang òhan lai; cun tuufa a pa pakhat, kum khat a timi phungbuar thawinak caah a rak put lai; sihmanhsehlaw a caan hmasa deuh kha cu pakpalawng a si lai, zeicahtiah aa thleidannak kha a buar.
13 “Cun mah hihi Nazir caah phungbia a si, aa thleidannak caan kha a dih tikah: amah cu tonnak thlam innka ah khan ratpi a si lai i Ref 6.13-21: Lam 21.23-24
14 a laksawng cu Bawipa sinah a pekchanh lai, khangh thawinak caah tuufa pakhat a pa kum khat a ti i do a tlami, cun sual thawinak caah tuufa pakhat a nu kum khat a ti i do a tlami, cun daihnak thawinak caah do a tlami tuutum pakhat,
15 cun thilnu telh lo changreu bawm khat, chiti he cawhmi changvut dip in sermi changreu hlum hna le changreu a per tete chiti thuhmi le an changvut thawinak hna le an thlet thawinak hna an si lai.
16 Cun tlangbawi nih Bawipa hmaiah a chuahpi hna lai i a sual thawinak le a khangh thawinak cu a thawi hna lai,
17 tuukawng cu Bawipa sin i daihnak pekchanh thawinak caah a thawi lai, thilnu telh lo changreu bawm khat he khan; tlangbawi nih a changvut thawinak le a thlet thawinak zong kha a thawi hna lai.
18 Cun Nazir mi nih a thiantermi a lu cu tonnak thlam innka ah aa meh lai i thiantermi a lu cun sam cu a lak lai i daihnak pekchanh thawinak tang i a ummi mei ah khan a paih lai.
19 Cun tlangbawi nih chumh hnuah tuukawng a liang cu le bawm chungin thilnu telh lo changreu pakhat le changreu pante thilnu telh lomi pakhat cu a lak hna lai i Nazir mi kut chungah khan a chiah hna lai, aa thianhnak a sam aa meh dih hnuah khan,
20 cun tlangbawi nih Bawipa hmai i hninh thawinak ah a hninh hna lai; annih cu tlangbawi ca i a thiangmi covo an si, a ii hninhmi le a phei thawimi he khan; cu hnuah cun Nazir mi nih cun mitsur hang a din khawh lai.
21 “Mah hihi biakamnak a tuahmi Nazir caah phungbia a si. Nazir a si ca i biakamnak a tuahning khan Bawipa sin i a pekchanhnak cu a si lai, zei dang a ti khawhmi hleiah; biakamnak a tuahmi ning khan, cu bantukin Nazir mi a si ca i aa thleidannak phungbia ning khan a tuah lai,” tiah a ti.
Tlangbawi Thluachuah Peknak
22 Bawipa nih Moses cu a chawnh i,
23 “Aaron le a fapa hna cu, ‘Hi bangin Israel mi cu thluachuah nan pek hna lai, nannih nih annih sinah,
24 Bawipa nih thluachuahnak in pe hna in, in zohkhenh ko hna seh;
25 Bawipa nih nan cungah a hmai tlanter seh law, vel in ngeih ko hna seh;
26 Bawipa nih mithmai òha in pe hna seh law, daihnak in pe ko hna seh, tiah nan chim lai,’ tiah chim hna.
27 “Cu bangin ka min cu Israel mi hna cungah an chiah lai i thluachuahnak ka pek hna lai,” tiah a ti.