26
(Mar 14:1-2; Luk 22:1-2; Jhn 11:45-53)
1 Cu bia vialte a chim dih cun Jesuh nih a hnuzul hna cu,
2 “Ni hnih hnuah Lanhtak Puai a si lai ti nan hngalh; cun Mi Fapa cu vailam tah awkah chanh a si lai,” tiah a ti hna.
3 Cu lioah cun tlangbawi zik Kaiafas an timi bawi inn ah tlangbawi upa hna le khua upa hna cu an i pum i,
4 ngaihthlem in Jesuh kha tlaih i thah awkah khua an khang.
5 Sihmanhsehlaw, “Puai chungah cun si hlah seh, zeitintiah mi zapi chungah hnahnawhnak a chuak sual lai,” an ti.
(Mar 14:3-9; Jhn 12:1-8)
6 Bethani khua mi thinghmui Simon inn i Jesuh a um lioah, man fak ngaingai mi,
7 Alabasta zihmui thawl khat put in minu a ra i a rawl ei lioah a lu ah a toih.
8 A hnuzul hna nih an hmuh tikah an thin a hung i, “Zeicahdah hitihin a pamhhmaih?
9 Hi zihmui hi man tampi ah zuarh in misifak pek deuh awk a si,” an ti.
10 Jesuh nih cucu a theih tikah, “Zeicahdah minu cu hna nan hnawh, ka cung i a tuahmi hi thil dawh a si;
11 zeitintiah misifak hna cu nan sinah an um thluangthluan ko lai, kei tu cu nan sin i a um zungzal ding ka si lo.
12 Hi zihmui, ka takpum i a ka toihmi hi keimah vui awkin a ka timhtuah a si.
13 Biangaite kan chimh hna, vawlei cung hmunkip i hi thawngòha an chimnak paoh ah mah nu tuahmi kong hi amah philh lonak ah an run chim te lai,” a ti hna.
(Mar 14:10-11; Luk 22:3-6)
14 Cu hnu cun hleihnih lak i pakhat, Judas Iskariot an timi cu tlangbawi upa hna sinah a kal i,
15 “Jesuh cu nan kut i kan chanh hna ahcun zeidah nan ka pek lai?” a va ti hna. Annih nih ngun tangka sawm thum an pek.
16 Cu caan thawk cun Jesuh rawinak caan rem kha a kawl.
(Mar 14:12-21; Luk 22:7-14, 21-23; Jhn 13:21-30)
17 Thilnu Phulh Lo Changreu puai a ni hmasa bik ah khan a hnuzul hna kha Jesuh sinah an ra i, “Khuazei ah dah Lanhtak Puai rawl ei ding cu in timhpiak u sih law na duh?” tiah an hal.
18 Jesuh nih, “Khuapi i mi pakhat sinah va kal u law Cawnpiaktu nih ‘Ka caan a nai cang, ka hnuzul hna he na inn ah Lanhtak Puai hman ka duh a ti,’ va ti u,” a ti hna.
19 A hnuzul hna nih Jesuh chim bantuk cun an tuah i Lanhtak Puai cu an va timh.
20 Zanlei a hung si i a hnuzul hleihnih hna he rawl an dum òi i an ei lioah khan,
21 “Fiang tein ka chim lai, nanmah lak i pakhat nih hin nan ka rawi lai,” a ti hna.
22 An ngaih a chia ngaingai i pakhat hnu pakhat in, “Bawipa, kei cu ka si lo, a si lo mei?” tiah an hal.
23 A thawh hna i, “Keimah he rawl a purmi nih hin a ka rawi lai.
24 Mi Fapa cu amah kongah òial a rak sining khan a si ko lai, sihmanhsehlaw Mi Fapa a rawitu cu chiat ko seh; cu pa cu hrin rak si hlah seh law a caah a òha deuh hnga,” tiah a ti.
25 Amah a rawitu Judas nih, “Kei cu ka si lo tih, Bawipa?” a ti, “Nangmah nih pei na chim ko cu,” tiah a leh.
(Mar 14:22-26; Luk 22:14-20; 1 Kor 11:20-25)
26 An ei lioah khan Jesuh nih changreu a lak i thla a cam i a cheu hnuah a hnuzul kha a pek hna, “I lak u law ei u, hihi ka pum a si,” a ti:
27 Hrai zong kha a lak i thla a cam hnuah a pek hna, “Nan dihlakin ding u,
28 hihi biahrennak ka thisen, mi tampi sual ngaihthiamnak ca i thletmi a si.
29 Hihi kan chimh hna, ka Pa pennak ah a thar in nanmah he ka din òhan hlan cu mitsurhang hi ka ding ti lai lo,” a ti hna.
30 Hla an sak dih hnuin Oliv tlang lei kal awkah an chuak.
(Mar 14:27-31; Luk 22:31-34; Jhn 13:36-38)
31 Jesuh nih a thawh hna i, “Cathiang nih, ‘Tuukhal kha ka thah lai i, tuurun cu an i òhek dih lai,’ a ti bantuk khan tuzan ah nan dihlakin nan ka hlawt dih lai.
32 Sihmanhsehlaw thawhter ka si hnuah Galilee ah nan hmaiah ka rak kal chung lai,” a ti.
33 Peter nih Jesuh cu a thawh i, “An dihlakin an in hlawt hmanh ah kei cu kan hlaw bal lai lo,” a ti.
34 Jesuh nih, “Biatak tein ka chim, ar voi khat khuan hlanah voi thum tiang na ka hlawt lai,” a ti.
35 Peter nih, “Na sin i ka thih hmanh ah kan hlaw lai lo,” a ti òhan. A hnuzul dang vialte zong nih cuticun an ti cio.
(Mar 14:32-42; Luk 22:39-46)
36 Cun Jesuh cu a hnuzul hna he Gethsemane dum an timi hmun pakhat ah an kal i, “Hika ah hin rak òhu u, pinlei ah khin thlacam ah ka va kal lai,” a ti.
37 Peter le Zebedi fapa le pahnih hna kha aa kalpi hna i lungrethei le awlokchong in a um.
38 An sinah cun, “Thihpi awk tlak in ka lung re a thei, hika ah hin rak um ko u law rak ka hngahpi u,” a ti hna.
39 Hmailei ah a va kal deuh i bawh buin thla a cam. “Ka Pa, a si khawh ahcun hi hrai nih hin rak ka liamtak ko seh; sihmanhsehlaw keimah duhning cun si hlah seh, nangmah duhning tu in si ko seh,” a ti.
40 A hnuzul hna sinah cun a kir i an rak i hngilh kha a hmuh hna. Peter sinah, “Suimilam pakhat chung te hmanh nan ka hngahpi kho lo mu?
41 Tukforhnak ah nan luh nakhnga lo hriphrio tein thla cam tuah u; thlarau nih cun a duh taktak ko, asinain taksa tu cu a derthawm,” a ti.
42 A voi hnihnak a kal òhan i “Ka Pa, hihi keimah din loin a liam khawh lo ahcun nangmah duhning si ko seh,” tiah thla a cam òhan.
43 A ra kir i an ih ko kha a hmuh òhan hna; an mitkuh an celh lo.
44 A voi thumnak a kal òhan i a chim bon òhiamòhiam chim in thla a cam òhan.
45 Cun a hnuzul hna sinah cun a ra kir òhan i, “Nan it i maw nan i dinh ko rih? Zohhmanh u, a caan a nai cang. Mi Fapa cu misual hna kut ah rawi i chanh a si cang.
46 Tho u, kal u sih; zohhmanh u, a ka rawitu cu a phan cang,” a ti hna.
(Mar 14:43-50; Luk 22:47-53; Jhn 18:3-12)
47 A chim cuahmah lioah cun hleihnih lak i pakhat, Judas kha a ra i a sinah mi tampi tlangbawi upa hna le phung cawnpiaktu le khua upa hna nih an thlahmi hna kha nam le tanbo he an ra phan.
48 Rawitu nih chingchiahnak a rak pek cia hna i, “Ka hnamhmi cu a si lai i tlai te u,” a ti hna.
49 Cuticun Jesuh cu a hei fuh colh i, “Cawnpiaktu, na cungah daihnak um ko seh,” a ti i a hnamh.
50 Jesuh nih a thawh i, “Ka kawi, na tuah hngami cu tuah ko,” a ti. Cun Jesuh cu an ra fuh i an tlaih i an khih colh.
51 Jesuh sin i a ummi pakhat nih khan a nam aa zuh i tlangbawi sal pakhat a hnakhaw pet koin a sah.
52 Jesuh nih, “Na nam cu a kawng ah sawh òhan, zeitintiah nam a lami cu nam in a thi lai,
53 vanmibu bu hleihnih renglo thlah dingin ka Pa sinah a hal kho lo tiah maw na ka ruah?
54 Hei halning law hi bantuk thil a hung um te lainak Cathiang chimmi kha zeitindah a tlin khawh kun hnga?” a ti.
55 Cu caan ahcun Jesuh nih mi zapi cu a thawh hna i, “Mifir sining law cu bang, keimah tlaih awkah nam le tanbo he maw nan rat? Biakinn ah ni khat hnu ni khat cawnpiak in ka òhu ko nain nan ka tlai lo.
56 Sihmanhsehlaw hi thil hna hi Cathiang ah profet hna chimchungmi a tlin nakhnga caah a si,” tiah a ti. Cun a hnuzul vialte nih cun an kaltak i an tli.
(Mar 14:53-65; Luk 22:54-55, 63-71; Jhn 18:13-14, 19-24)
57 A tlaitu hna nih cun Jesuh cu tlangbawi zik Kaiafas sinah phung cawnpiaktu le khua upa hna umnak ah cun an kalpi.
58 Peter nih lamhla nawn khin tlangbawi zik inntual tiang a hei zulh; a donghnak thil hmuh duh ah inntual kulh chungah cun a va lut i ralveng hna sinah a òhu ve.
59 Tlangbawi upa hna le khawngsil upa hna an dihlak nih Jesuh thah khawhnak dingin lihbia an kawl.
60 Biatheitu deu zong tampi an chuak ko nain bialam an hmu kho lo. A donghnak ah mi pahnih an ra chuak i,
61 “Hi pa nih hin, ‘Pathian biakinn hi ka òheh lai i ni thum ah ka sak khawh lai,’ a ti,” an ti.
62 Tlangbawi zik a hung dir i, “Bia leh awk zeihmanh na ngei lo maw? Mah hna nih sual an in phawtmi hi zeitindah a si?” tiah a hal.
63 Asinain Jesuh cu a dai ko. Tlangbawi zik nih cun, “A nungmi Pathian min chalh in kan hal, Pathian Fapa Khrih cu na si maw?” a ti.
64 Jesuh nih a leh i, “Nangmah nih pei na chim ko cu, sihmanhsehlaw biatak tein ka chim, atu thawk hin Mi Fapa cu lianhngannak orhlei ah a òhu lai i vanrang cungin a rat kha nan hmuh lai,” tiah a ti.
65 Cun tlangbawi zik nih a angki fualpi a thleh i, “Pathian min a chiat. Zeicahdah biatheitu kan herh ti? Pathian min a chiat cu nan theih ko cu ta.
66 Nan bia chahnak zeidah a si?” a ti hna.
67 Annih nih, “Thih awkah a tlak,” an ti.
68 Cuticun a hmai ah cil an chak i an thongh. A cheu nih an bengh, “Khrih cu pei na si fam cu, ahodah an thong, chim tuah?” an ti.
(Mar 14:66-72; Luk 22:56-62; Jhn 18:15-18, 25-27)
69 Peter cu a leng inntual ah a òhu. Ngaknu pakhat a sinah a ra i, “Nang zong hi Galilee mi, Jesuh sin i a um tawnmi na si,” a ra ti.
70 Sihmanhsehlaw an dihlak hmaiah cun aa pheh, “Na chim duhmi zei a si ka hngal lo,” a ti.
71 Tual lengah a va chuak i ngaknu dang pakhat nih a rak hmuh òhan i cuka i a dir komi hna sinah cun, “Hi pa hi Nazareth mi Jesuh he a um tawnmi a si ko,” a ti hna.
72 “Hi mi hi ka hngalhmi a si lo,” tiah chiatserh in aa pheh òhan.
73 Caan tlawmpal hnuah cuka i a dir komi hna nih cun Peter sinah cun an va kal i, “Nang zong hi mah hna he a ummi na si ko; na awcawi in kan hngalh,” an ti òhan.
74 Cun amah le amah chiatserh in, “Hi pa hi ka hngalhmi a si lo,” a ti.
75 A rauh hlanah ar a khuang colh. “Ar a khuan hlanah voi thum na ka hlawt lai,” tiah Jesuh nih a timi kha Peter lung ah a hung pem. Leng ah a chuak i ik thluahmah in a òap.