3
Daihnak Thawinak
1 Mi pakhatkhat nih a pekchanhmi cu daihnak thawinak pekchanhnak a si ahcun, cawrun chungin saòil pakhatkhat, a pa siseh, a nu siseh a pekchanh ahcun, Bawipa hmaiah dotla a pek awk a si lai.
2 Cun a pekchanhmi lu cungah a kut a chuan lai i tonnak thlam innka ah a thah lai i Aaron fapa hna, tlangbawi hna nih khan, a thi cun biakòheng kha a velchum in an theh lai.
3 Cun daihnak thawinak pekchanhnak chungin, Bawipa sinah mei in thawinak caah, a chungril khuhtu thau le, a kiar vialte le,
4 a kal pahnih le an cung i a tai zawn ah a ummi thau le, kal hna he a lak chihmi a thin tuamtu cu a pek hna lai.
5 Cun Aaron fapa hna nih biakòheng cungah mei cung i thing cung i khangh thawinak sa cungah cun an khangh lai; mei in thawinak, Bawipa caah rimthaw a si.
6 A pekchanhmi cu, Bawipa sin i daihnak thawinak pekchanhnak caah, tuurun chungin saòil pakhat a pa siseh a nu siseh a si ahcun, dotla a si lai.
7 A pekchanhmi cu tuufa a si ahcun Bawipa hmaiah a pek lai.
8 A laksawng lu cungah cun a kut a chuan lai i tonnak thlam hmaiah a thah lai; cun Aaron fapa hna nih a thi cu biakòheng a velchum ah khan an theh lai.
9 Cun daihnak thawinak pekchanhnak chung cun, Bawipa sin i mei in thawinak caah, a thau kha le, a thaumi a mei cu a thluan in, a kengruh tiangin a hun khoihmi le, a chungril a khuhtu thau le a kiar vialte le,
10 a kal pahnih a tai zawn i a ummi thau he, cun a thin tuamtu a kal hna he a lak chihmi cu a pek lai.
11 Cun tlangbawi nih biakòheng cungah cun Bawipa sinah mei in pekmi rawl ah a khangh lai.
12 A pekchanhmi cu meheh a si ahcun, Bawipa hmaiah a pek lai.
13 A lu cungah a kut a chuan lai i tonnak thlam hmaiah a thah lai; cun Aaron fapa hna nih a thi cu biakòheng a velchum ah khan an theh lai.
14 Cun mah chung cun, Bawipa sinah mei in thawinak caah amah laksawng ah, a chungril a khuhtu thau le, a kiar vialte le
15 a kal pahnih a tai zawn i a ummi thau he, cun a thin tuamtu a kal hna he a lak chihmi cu a thawi lai.
16 Cun tlangbawi nih biakòheng cungah rimthaw ca i mei in thawimi rawl ah a khangh hna lai. Thau vialte cu Bawipa ta a si.
17 Thau siseh thi siseh nan ei lai lo, mah hihi nan chan chung vialte, nan umnak hmun kip ah, zungzal nawlbia a si lai.