17
Elijah Nih Khuakhen A Chimchung
1 Gilead ram chung Tishbe khua Tishbe mi Elijah nih Ahab cu a thawh i, “ Bawipa, Israel Pathian, a hmaika i ka dir tawnmi a nun bangin, dap siseh, ruah siseh, ka bia in dah ti lo ahcun, hi kum hna chungah hin a um lai lo,” tiah a ti. Ref 17.1: Jei 5.17
2 Cun Bawipa bia cu a sinah a ra i,
3 “Hika hin kal law nichuahlei ah i mer tuah, cun Jordan nichuahlei i a ummi Kherith tivate ah vaa thup.
4 Tivate ti cu na din lai i keimah nih langak hna cu khika ah nangmah kha rawl pek awkah nawl ka pek cang hna,” tiah a ti.
5 Cucaah a kal i Bawipa bia ning cun a tuah; Jordan nichuahlei i a ummi Kherith tivate ah cun a va kal i a va um.
6 Cun langak nih zinglei ah rawl le sa, zanlei ah rawl le sa an chanh lengmang i tivate ti cu a din.
7 Cun tlawmpal hnuah khin, ram chungah ruah a um lo caah, tivate ti cu a reu dih.
Elijah le Zarefath Nuhmeinu Kong
8 Cun Bawipa bia cu amah sinah a ra i,
9 “Tho law, Sidon ram khua a simi Zarefath ah va kal law, khika ah va um. Zohhmanh, khika ah khin nangmah cu cawm awkah nuhmeinu pakhat nawl ka pek cang,” a ti. Ref 17.9: Luk 4.25-26
10 Cucaah a tho i Zarefath ah cun a kal; cun khua hauka kha a phak tikah, zohhmanh, nuhmei pakhat cu thinghreu a rak khawm len ko; cun anih nih amah cu a hei auh i, “Thawl in din awk ti tlawm tein rak ka put tuah,” tiah a ti.
11 Cun a rak put hnik lioah khin a hei auh i, “Na kut in changreu tlang khat in rak ka put,” a ti.
12 Cun anih nih a thawh i, “ Bawipa, na Pathian a nun bangin, rawh ciami zeihmanh ka ngei lo, um chungah changvut pei khat lawng ka ngei i thawl chungah chiti tlawmte lawng ka ngei; cun atu hi ka tlun in mah cucu keimah le ka fapa ca i chuannak ding caah thinghreu pahnih thumte ka khawm hna; kan ei dih cun kan thi ko lai,” tiah a ti.
13 Cun Elijah nih amah cu a thawh i, “Òih hlah, va kal law na chim bang cun va tuah ko; sihmanhsehlaw a hmasa bik ah keimah cu hlum hmete in va ka serpiak law, rak ka put, cun a hnuah nangmah ca le na fapa caah cun va ser.
14 Zeitintiah Bawipa, Israel Pathian nih, ‘ Bawipa nih ruah vawlei ah a surter hlantiang changvut um cu a lawng lai lo i chiti thawl cu a reu lai lo,’ a ti,” tiah a ti.
15 Cun a kal i Elijah nih a chim bantuk khan a tuah; cun amah le Elijah le a innchungkhar nih khan ni tampi an ei.
16 Bawipa nih Elijah in a chimmi a bia ningte khan, changvut um cu a lawng lo i chiti thawl cu a reu lo.
17 Cun cu hnuah cun, inn ngeitu nu fapa cu a zaw i a zawtnak cu a zual tuk caah a chungah thaw a tang ti lo.
18 Cun anih nih Elijah cu a thawh i, “Maw Pathian mipa, ka cungah lung si lonak zeidah na ngeih? Ka sualnak kha hngalhter òhan awk le ka fapa kha thihter awkah pei na rat ko hi!” tiah a ti.
19 Cun amah cu a thawh i, “Na fapa cu ka pe tuah,” tiah a ti. Cun amah òangchung cun a lak i amah a riahnak cungdot dal chungah khan a kaipi i amah i ihkhun ah khan a ihter.
20 Cun Bawipa kha a auh i, “Maw Bawipa, ka Pathian, ka tlunmi nuhmeinu cung hmanh ah hin, a fapa na thahnak in, harnak na tlunter ko maw?” tiah a ti.
21 Cun ngakchia cungah cun voi thum a bawk i Bawipa cu, “Maw Bawipa, ka Pathian, hi ngakchia nunnak hi a chungah lut òhan ko seh,” tiah a auh. Ref 17.21: 2Sia 4.34-35
22 Cun Bawipa nih Elijah aw kha a theihpiak i ngakchia cu a chungah khan a nunnak cu a lut òhan i a nung òhan.
23 Cun Elijah nih ngakchia cu a lak i cungdot cun inn chungah a runpi i a nu kha a pek; cun Elijah nih a thawh i, “Zohhmanh, na fapa a nung hih,” tiah a ti.
24 Cun minu nih Elijah cu a thawh i, “Atu cu nangmah cu Pathian mi na si ti kha ka hngalh i na kaa chung i a ummi Bawipa bia cu biatak a si,” tiah a ti.