7
Akhan Sualnak
1 Sihmanhsehlaw pekchanhmi thil kongah cun Israel mi cu zumhawktlak loin an um ai; zeitintiah Judah phun chungmi Zerah fapa Zabdi fapa Karmi fapa Akhan nih pekchanhmi thil cu tlawmpal a lak i Bawipa thinhunnak cu Israel mi cungah a alh.
2 Joshua nih Jeriko in Bethel nichuahlei i a ummi Beth-aven pawng i a ummi Ai khua ah mi a hei thlah hna i, “Hung kal u law, ram cu hung thlingthla tuah u,” tiah a ti hna. Cun mi cu an hung kal i Ai cu an hung ngiatthlai.
3 Cun Joshua sinah an rung kir i a sinah, “Mi vialte cu kalter hna hlah, sihmanhsehlaw thong hnih thong thum tluk hung kal hna seh law, Ai cu hung chim hna seh; mi zapi cu an ning piin khika ah an re hung theihter awk a si lo, zeicahtiah tlawmte lawng an si ko,” tiah an ti.
4 Cucaah mi zapi chungin 3-000 tluk an hung kal i Ai khuami hna hmaiah an zam len ai,
5 cun Ai khuami nih 36 tluk an rak thah hna i kutka hmailei ah Shebarim tiangin an dawi hna i zuanchuknak ah khan an thah hna. Cun mi zapi cu an thin a phang i ti bantuk an si.
6 Khi tikah Joshua nih a puan kha a thleh hna i Bawipa kuang hmaiah cun zanlei tiang vawlei ah a bawk, amah le Israel upa hna cu an bawk; cun an lu ah leidip an i phulh.
7 Cun Joshua nih, “Aize, maw Bawipa Pathian, kannih cu hrawh awk men i Amor mi kut chung i pek awkah zeicahdah hi mi hna cu Jordan tiva ral ah na kalpi hna? Jordan tiva ral i khua rak sak kha kan lung rak tling ko seh law mu!
8 Maw Bawipa, hi bantukin an ral hna hmaiah Israel mi an zaam tikah hin zeidah ka chim khawh hnga!
9 Zeitintiah Kanaan mi hna le hi ram chung i a ummi vialte nih an theih lai i an kan kulh lai i vawlei cung hin kan min an hloh lai; na min lianngan cu zeidah na tuahpiak lai?” tiah a ti.
10 Bawipa nih Joshua cu a chawnh i, “Tho tuah, zeicahdah na bawh ko?
11 Israel cu a sual cang; nawl ka pekmi hna ka biakamnak cu an buar cang; pekchanhmi thil cu tlawmpal an i lak; an fir i lih an chim i an thil sinah an chiah hna.
12 Cucaah Israel mi nih an ral hna hmaiah an dir kho lo; annih cu hrawh awk thil ah khan an i can caah an ral hna hmaiah an zaam. Nan lak in pekchanhmi thil kha nan hrawh lo ahcun nan sinah ka um ti lai lo.
13 Tho law, mi zapi kha thianter hna, ‘Thaizing ah i thianh u, zeicahtiah Bawipa, Israel Pathian nih, “Maw Israel, nannih lakah pekchanhmi thil an um, nannih lak in cu pekchanhmi thil cu nan hlonh hna hlantiang nan ral hna hmaiah nan dir kho lai lo,” tiah hi bangin a ti,” tiah chim hna.
14 Cucaah zinglei ah nan phun nan phun in a naih ah ratpi nan si lai; cun Bawipa nih a lakmi phun cu nan chung nan chung in a naih ah nan ra lai; cun Bawipa nih a lakmi innchungkhar cu a mi a mi in a naih ah nan ra lai.
15 Bawipa biakamnak cu a buar i Israel mi lakah ningzah awk a simi thil a tuah caah, pekchanhmi thil a rak lami cu, amah he a ngeihmi vialte he, mei in khangh a si lai,” tiah a ti.
16 Cucaah Joshua cu zingka tein a tho i Israel cu an phun an phun cio in a naih ah a ratpi hna i Judah phun cu lak a si;
17 cun Judah innchungkhar hna cu a naih ah a ratpi hna i Zerah innchungkhar cu lak a si; cun Zerah innchungkhar cu a mi a mi in a naih ah a ratpi hna i Zabdi cu lak a si;
18 cun amah nih amah innchungkhar cu a mi a mi in a naih ah a ratpi hna i Judah phun Zerah fapa Zabdi fapa Karmi fapa Akhan cu lak a si.
19 Khi tikah Joshua nih Akhan sinah cun, “Ka fapa, Bawipa Israel Pathian sinah sunparnak pe law, amah cu thangòhat tuah; na tuahmi kha ka chim tuah; ka sinin thup hlah,” tiah a ti.
20 Cun Akhan nih Joshua cu a leh i, “Biangai tein Bawipa Israel Pathian cungah ka sual cang i mah hihi ka tuahmi cu a si:
21 hranchaw lakah khan Shinar puan aa dawh ngaimi le ngun shekel 200 le sui tlang khat, shekel 50 a ritmi ka hmuh hna tikah ka mit an thi i ka lak hna; cun zohhmanh, ka thlam chung vawlei chungah ka thuh hna, ngun cu a tang bik ah,” tiah a ti.
22 Cucaah Joshua nih lamkal a hei thlah hna i thlam ah cun an va tli i zohhmanh, thlam chungah cun a rak thuh taktak ko, a tang bik ah ngun.
23 Cun thlam chung cun an lak hna i Joshua le Israel mi vialte sinah an ratpi; cun Bawipa hmaiah an chiah hna.
24 Cun Joshua le Israel mi vialte nih Zerah fapa Akhan cu le ngun cu le puan cu le sui tlang cu le a fapa hna le a fanu hna le, a cawtum hna le a laa hna le a tuu hna le a thlam le a ngeihmi vialte cu an lak hna i Akhora Akhor, cucu Harnak Nelrawn ah an hun kalpi hna.
25 Cun Joshua nih, “Zeicahdah kan cungah harnak na tlunter? Nihin ah Bawipa nih na cungah harnak a tlunter ve,” tiah a ti. Cun Israel mi vialte nih lung in an cheh; mei in an khangh hna i lung in an cheh hna.
26 Cun nihin tiangin a ummi lungpumh nganpi pakhat a cungah cun an pumh; cun Bawipa cu a kangh in a kangmi a thinhunnak cun aa mer. Cucaah cun nihin tiangin cu ka hmun cu Akhor Nelrawn tiah ti a si.