3
Israel Mi Nih Jordan Tiva An Tan
1 Zingka tein Joshua cu a tho i Shittim in Israel mi vialte he an i thawh; cun Jordan kha an phan i an tan hlanah khika ah an riak.
2 Ni thum hnuah riahhmun chungah cun bawi hna kha an i chawk i
3 mi kha, “ Bawipa nan Pathian biakamnak kuang kha Levi tlangbawi pawl nih an put kha nan hmuh tikah, nan umnak cio khan nan i thawh lai i nan zulh lai,
4 zeitintiah hi leiah cu hlan cu nan kal bal lo caah nan kalnak ding lam cu an hmuhsak hna a hau lai. Asinain nanmah le a karlak cu dong 2-000 tluk in aa hlat lai; nan naih lai lo,” tiah nawl an pek hna.
5 Cun Joshua nih mi zapi hna cu, “ Bawipa nih thaizing ah nan lakah khuaruahhar a tuah lai caah i thianh tuah u,” tiah a ti hna.
6 Cun Joshua nih tlangbawi hna cu, “Biakamnak kuang kha i lak u law, mi zapi hmaiah lan tuah u,” tiah a ti hna. Cun biakamnak kuang cu an i lak i mi zapi hmaiah cun an kal.
7 Cun Bawipa nih Joshua cu a chawnh i, “Nihin ah hin nangmah cu Israel mi vialte mithmuh ah hlorh hram kan thawk lai, zeitintiah annih nih, Moses sinah ka rak um bang khan, nangmah sinah ka um ve lai, ti kha an hngalh nakhnga.
8 Cun biakamnak kuang a putu tlangbawi hna cu, ‘Jordan tikam nan phak tikah Jordan tiva chungah cun nan dir peng lai,’ tiin nawl na pek hna lai,” tiah a ti.
9 Cun Joshua nih Israel mi hna cu, “Hika ah hin ra u law, Bawipa nan Pathian bia kha thei tuah u,” tiah a ti hna.
10 Cun Joshua nih, “Mah hi hin Pathian nung cu nan lakah a um i, amah nih pel lo tein nan hmai in Kanaan mi hna le Hit mi hna le Hiv mi hna le Periz mi hna le Girgash mi hna le Amor mi hna le Jebus mi hna cu a dawi hna lai, ti kha hngal ko u.
11 Zohhmanh u, vawleicung dihlak Bawipa i biakamnak kuang nih nannih hmaiah Jordan tiva a tan lai.
12 Cucaah Israel miphun hna chungin mi hleihnih, phun khat chungin mi pakhat cio, nan lak hna lai.
13 Cun Bawipa, vawlei cung dihlak i Bawipa a simi, a kuang putu tlangbawi hna keza nih Jordan ti a lamh tikah, Jordan ti cu a cat lai i cunglei in a rungmi ti cu bu khat ah an dir lai,” tiah a ti.
14 Cucaah, mi hmai i biakamnak kuang a putu tlangbawi hna he Jordan tiva tan awkah mi nih an thlam in an i thawh tikah le
15 kuang a putu hna nih Jordan tiva kha an phak i kuang a putu tlangbawi hna ke cu ti chungah aa hnei tikah (rawl òuan caan chung cu Jordan tiva hi a kuang a liam ko),
16 cunglei in a rungmi ti kha an dir i lam hlatpi ah Zarethan ram pawng i a ummi khua Adam ah cun a bu in an dir i, Arabah rili, Cite Rili lei i a vung luangmi cu an cat dih; cun Jeriko khua zawn cun mi nih cun an tan.
17 Cun Israel mi vialte nih leiro cungin an tan lioah, Jordan tiva chungah cun, Bawipa biakamnak kuang a zawntu tlangbawi hna kha, an phun ning piin Jordan tiva cu an tan dih hlantiang, leiro cungah cun an dir.