10
Amor Mi Kha An Tei Hna
1 Jerusalem siangpahrang Adonizedek nih zeitindah Joshua nih Ai kha a lak i Ai khua le a siangpahrang cu Jeriko le a siangpahrang a tuah hna bantukin a hrawh cikcek i, zeitindah Gibeon khuami hna nih Israel mi he remnak an ser i an lakah an um kha a theih tikah a thin a phang ngaingai,
2 zeicahtiah Gibeon cu siangpahrang khua bantukin khua ngan a si ve i Ai khua nakin a ngan deuh i a chung ummi vialte hna cu miòhawng an si.
3 Cucaah Jerusalem siangpahrang Adonizedek nih Hebron siangpahrang Hoham le Jarmuth siangpahrang Piram le Lakhish siangpahrang Jafia le Eglon siangpahrang Debir cu a cah hna i,
4 “Ka sinah hung u law, ka bawm u, Gibeon cu tu u sih; Joshua le Israel mi hna he remnak a ser caah,” tiah a ti.
5 Khi tikah Amor mi siangpahrang panga, Jerusalem siangpahrang, Hebron siangpahrang, Jarmuth siangpahrang, Lakhish siangpahrang, le Eglon siangpahrang hna nih cun an ralkap kha an pumh hna i an ralkap dihlak he khan Gibeon khua cu a pawng in riahhnawh i hung hranh awkah an hung kal.
6 Cun Gibeon mi hna nih cun Joshua cu Gilgal riahhmun ah cun an hei cah i, “Na sal hna cungin na kut kha dorh hlah; khulrang in hung law, kan khamh law, kan bawm tuah; zeitintiah tlang cungah khua a sami Amor mi siangpahrang vialte kha kanmah doh awkah an i pum,” tiah an ti.
7 Cucaah Joshua cu Gilgal in ralkap vialte le miralòha miòhawng vialte he tiah a hung kal.
8 Cun Bawipa nih Joshua cu a chawnh i, “Òih hna hlah, zeitintiah annih cu na kut chungah kan pek cang hna; anmah lakah na hmaiah a dir khomi pakhat hmanh an um lai lo,” tiah a ti.
9 Cucaah Joshua nih zan khuadei te Gilgal in a hung kal i hlauhsaphak in a paoh hna.
10 Cun Bawipa nih Israel mi hna hmaiah cun a comcawroilo in a zamter hna i, Gibeon ah cun tampi an thah hna, Beth-horon i hung kainak lam ah cun an dawi hna i Azekah le Makkedah khua tiang an thah lengmang hna.
11 Cun Israel mi hmai i an zaam i Beth-horon i hung kainak in an va liam lioah khin Bawipa nih Azekah tiang vancung in lung ngan pipi a thlakhnawh hna i an thi; Israel mi nih nam in an thahmi hna nakin rial in a thimi cu an tam deuh.
12 Bawipa nih Amor mi hna cu Israel mi hna sinah a pek hna ni ah Joshua nih Bawipa kha a chawnh i Israel mi hna mithmuh ah,
“Ni, Gibeon ah dir peng tuah,
Cun Thlapa, nang,
Aijalon nelrawn ah,” tiah a ti.
13 Miphun nih khan an ral hna cu
phu an hlam hna hlantiang,
Ni cu a dir peng i thlapa cu a taang.
Mah hihi Jashar cauk ah aa òial lo mei? Ni cu van laifang ah khin a taang i ni khat pum tluk cu tlak tim loin a um. Ref 10.13: 2Sam 1.18
14 Cu bantuk ni, Bawipa nih minung aw a ngaih ni bantuk kha, cu hlanah siseh cu hnuah siseh a um bal lo; zeitintiah Bawipa nih Israel cu a dohpiak.
15 Cun Joshua le Israel mi vialte cu an riahhmun Gilgal ah cun an kir dih òhan.
16 Hi siangpahrang panga hna cu an zaam i Makkedah i lungkua ah an i thup.
17 Cun Joshua cu, “Siangpahrang panga hna kha an hmuh cang hna, Makkedah i lungkua ah an i thup ko,’ tiah an chimh.
18 Cun Joshua nih, “Lungkua kaa ah cun lung ngan pipi hril hna u, cun a pawngah anmah cawngtu ah mi chia hna u;
19 sihmanhsehlaw cuka ah cun nannih cu um hlah u, nan ral kha dawi hna u, an hnu dawn pawl kha tlak phuat hna u, an khua chungah khan luhter hrimhrim hna hlah u; zeitintiah Bawipa nan Pathian nih annih cu nan kut chungah an pek cang hna,” tiah a ti.
20 Joshua le Israel mi hna nih an ci a mih hlantiang an thah cikcek hna tik le a tangmi tete hna cu kulhmi khua chungah an luh tikah,
21 mi vialte cu him tein Joshua sinah Makkedah riahhmun ah cun an kir; Israel mi ralchanh in, pakhat hmanh nih bia an chim ngam lo.
22 Cun Joshua nih, “Lungkua kaa kha hung u law, lungkua chung khan siangpahrang panga hna kha ka sinah rak chuahpi tuah hna u,” tiah a ti.
23 Cu bangin an tuah i lungkua chung khan siangpahrang panga hna kha a sinah an chuahpi hna, Jerusalem siangpahrang, Hebron siangpahrang, Jarmuth siangpahrang, Lakhish siangpahrang le Eglon siangpahrang hna cu.
24 Cun cu siangpahrang hna cu Joshua sinah an chuahpi hna tikah, Joshua nih Israel mi vialte kha a kawh hna i amah sinah a kalmi ralkap hna bawi hna sinah khan, “Rak ka naih tuah u, hi siangpahrang hna hngawng hi lam tuah hna u,” tiah a ti.
25 Cun Joshua nih annih sinah, “Nan thin phang hlah u, nan lung zong dong hlah u; òhawng u law, ralòha ngaiin um tuah u; zeicahtiah Bawipa nih nan dohmi hna nan ral vialte cungah kha bang khan a tuah lai,” tiah a ti.
26 Cun a hnuah Joshua nih a tuk hna i a thah hna i thingkung panga cungah a thlai hna. Cun thingkung cungah cun zanlei tiang an i thlai;
27 sihmanhsehlaw ni a tlak cuahmah tikah, Joshua nih nawl a pek hna i thingkung cung khan an òhumh hna i, an i thuhnak lungkua chungah khan an hlonh hna i lungkua kaa cu lung ngan pipi in an khar, nihin ni tiang hrimhrim hin a um ko.
28 Cun khi ni ah Joshua nih Makkedah cu a lak i cu khua le a siangpahrang cu vainam in a sam dih hna; a chung i a ummi paohpaoh cu a thah dih hna, pakhat hmanh a zuah hna lo; cun Jeriko siangpahrang cungah a tuah bang khan Makkedah siangpahrang cungah cun a tuah.
29 Cun Joshua cu a sinah a ummi Israel mi vialte he Makkedah in Libnah ah an va lan i Libnah kha an doh;
30 cun Bawipa nih cu khua cu an siangpahrang he tiah Israel mi kut chungah a pek hna; cu khua cu a chung i a ummi vialte he vainam in a sam dih hna; pakhat hmanh a zuah hna lo; Jeriko siangpahrang cungah a tuah bang khan an siangpahrang cungah cun a tuah.
31 Cun Joshua cu a sinah a ummi Israel mi vialte hna he Libnah in Lakhish ah an va lan i an kulh i an tuk:
32 cun Bawipa nih Lakhish khua cu Israel mi kut chungah a pek i a ni hnihnak ni ah a lak i cu khua cu a chung i a ummi vialte he vainam in a sam, Libnah cung i a tuah bantuk khan.
33 Cun Gezer siangpahrang Horam cu Lakhish bawmh awkah a hung kal i, Joshua nih amah he a mi hna he, pakhat hmanh taang lo tiangin, a thah hna.
34 Cun Joshua cu Israel mi vialte he Lakhish in Eglon ah an va lan; cun an kulh i an doh;
35 cu ni ah cun an lak i vainam in an sam dih; cu khua chung i a ummi paoh cu khi ni ah a hrawh cikcek hna, Lakhish cung i a tuah bang khan.
36 Cun Joshua cu Israel mi vialte he Eglon in Hebron ah an hung kal i an hung doh;
37 an lak i a siangpahrang he a khua hna he, a chung i a ummi vialte hna he, vainam in an sam dih hna; pakhat hmanh a zuah hna lo, Eglon cungah a tuah bantuk khan, a chung i a ummi vialte he a hrawh dih cikcek.
38 Cun Joshua cu Israel mi vialte he Debir leiah aa mer i a doh,
39 a siangpahrang he a khua hna he a lak dih; vainam in an sam dih hna i a chung i a ummi vialte cu an hrawh cikcek hna; pakhat hmanh a zuah hna lo; Hebron cung le Libnah le a siangpahrang cung i a tuah bang khan Debir le a siangpahrang cungah a tuah.
40 Cu bangin Joshua nih ram cu a ning piin, tlangram siseh, Negeb siseh, rawnram siseh, tlangpangzau siseh, an siangpahrang vialte he a tei dih hna; pakhat hmanh a zuah hna lo, Bawipa Israel Pathian nih nawl a pek bang khan thaw a chuah paohpaoh cu a hrawh dih cikcek hna.
41 Joshua nih annih cu Kadesh-barnea in Gaza tiang a tei hna. Goshen ram vialte zong Gibeon tiangin.
42 Bawipa Israel Pathian nih Israel mi cu a dohpi hna caah Joshua nih hi siangpahrang vialte hna le an ram cu òum khat ah a lak dih hna.
43 Cun Joshua cu amah sinah a ummi Israel mi vialte he Gilgal i an riahhmun ah cun an kir òhan.