44
Izipt Ram I Judah Mi Sinah Jeremiah Nih Bia A Chim
1 Izipt ram chung Migdol, Tahpanhes, Nof le Pathros ram chungah a ummi Judah mi vialte kongah Jeremiah sin i a rami bia:
2 “Hi bangin Ralkapbu Bawipa, Israel Pathian nih a ti: Jerusalem khua le Judah ram khua vialte hna cungah ka tluntermi òhat lonak vialte cu nan hmuh cang: atu ah cun an òiao dih i ahohmanh um ti loin kaltak an si dih cang,
3 hihi zei ruangah dah a si, ti ahcun, an hngalh bal lomi pathian kha an zulh hnanak thawng le cu pathian hna sinah raithawinak an khanghnak thawngin ka thin a ka phoktu hna òhat lonak ruangah khan a si. Hi a tuahtu cu nanmah le nan pupa hna kha nan si.
4 Ka sal profet vialte hna kha hi ralrinnak bia he hin nannih sinah ka rak thlah lengmang hna i, ‘Ka huatmi thil fihnung hi tuah sawh hlah u,’ tiah ka ti lengmang.
5 Sihmanhsehlaw nan pale hna nih an ngai duh lo, zei ah an rel lo. An òhat lonak kha an ngol hlei lo i pathian dang hna sin i raithawinak khangh kha an baang hlei lo.
6 Cucaah Judah ram chung khua hna le Jerusalem khuachung lampi hna ah khan ka thinhunnak cu mei bantukin a kang i nihin i òiaotakmi hnawmpon an simi ah hin an cang.
7 “Atu cu Bawipa, Ralkapbu Pathian, Israel Pathian nih hi bangin a ti: Zeicahdah nanmah lila cungah hi bantuk a nganmi rawhralnak hi nan i tlunter? Zeicahdah Judah mi nan cungah, pa si u, nu si u, ngakchia si u, bawhte si u law, a nungmi um lo tiangin, rawhnak nan i tlunter?
8 Mah hihi umnak hmun nan i khuarnak Izipt ram i pathian dang hna sinah raithawinak nan pekchanhnak thawngin siasal biaknak nan tuahmi in ka thin nan ka phawhnak ruangah a si. Nanmah le nanmah kha nan i hrawk lai i vawlei cung miphun vialte sinah nihsawh awk le zawmhtaih awkah nan cang lai.
9 Nan pupa hna òhat lonak kha siseh, Judah siangpahrang hna òhat lonak kha siseh, an nupile hna òhat lonak kha siseh, nanmah òhat lonak hrimhrim kha siseh, nan nupile hna òhat lonak kha siseh, Judah ram chung le Jerusalem khua chung lam hna i an tuahmi hna kha, nan philh cang hna maw?
10 Nihin ni tiang hin ngaihchiatnak nan ngei lo i hmaizahnak zong nan ngei rih lo, nan pupa hna le nanmah hmai i ka chiahmi ka phungbia le ka nawlbia kha nan zul hna lo.
11 Cucaah Ralkapbu Bawipa, Israel Pathian nih hi bangin a ti: Nan cung i òhat lonak tlunter awk le Judah mi kha hloh cikcek awkah ka lung kaa thlek cang.
12 Izipt ram chung i um hmun khuar awkah kal aa tim pengmi cu Izipt ram ah cun an donghnak an phan dih lai. A cheu cu nam in an thi lai, a cheu cu mangòam in an thi lai. A sang he a niam he aa khatrep in vainam in siseh, mangòam in siseh, an thi lai i annih cu vawlhpamhmi, tuksapur, holhchia tlenghnak le thangchiatmi an si lai.
13 Jerusalem i a ummi kha dan ka tat hna bantukin Izipt ram chung i a ummi hna cu vainam le mangòam le rai in dan ka tat ve hna lai.
14 Judah ram i a tangmi hna nih khan Judah ram ah kan kir òhan te lai i khika ah kan um òhan te lai ti ruahchannak in Izipt ram i um hmun khuar awkah an ra; sihmanhsehlaw an kir òhan ti lai lo, pakhat hmanh an nung lai lo, pakhat hmanh an luat lai lo.
15 “Cun an nupile hna nih pathian dang sinah raithawinak an khangh ti a hngalmi pa vialte hna le an pawng i a rak dir lulhmi nu vialte hna nih Jeremiah cu an leh i, ‘ Bawipa min in na kan chimhmi cu kan ngai lai lo.
16 Kannih kan i hren chihnak biakamnak kha tlinter awkah kan i tim.
17 Judah ram khua hna le Jerusalem khua chung lam hna ah, kanmah le kan pupa hna le kan siangpahrang hna le bawile hna nih kan tuah tawn bantuk khan Vancung Khuazingnu sinah cun raithawinak kha kan khangh ko lai i thlet thawinak kha kan pekchanh ko lai. Zeicahtiah kha caan ah khan rawl tampi kan rak ngei i kan hna a rak ngam; vanchiatnak zeihmanh kan tong lo.
18 Sihmanhsehlaw Vancung Khuazingnu sin i thawinak khangh kan ngol le thlet thawinak pekchanh kan ngol ri in zei paohpaoh kan chambau dih i vainam le mangòam in kan thi lengmang,’ an ti.
19 Cun nu hna nih cun, ‘Vancung Khuazingnu sinah thawinak kan khangh i thlet thawinak kan bungh tikah khan, thlapa samthihkuang a lomi changreu thlum a cung i amah mui a cuangmi kan ser kha kan vale nih òha tein an hngalh ko,’ an ti.
20 Cun Jeremiah nih hi nu hna le pa hna le mi vialte sinin cu bantuk lehnak kha a hmuh tikah aa thawh i,
21 ‘Nanmah le nan pupa hna le nan siangpahrang hna le nan bawile hna le hi ramchung mi hna nih Judah ramchung khua hna ah le Jerusalem khuachung lam ah nan tuahmi raithawinak kha Bawipa nih a philh hna lo,
22 a in khawh ti lo tiangin a lung chungah cun an kai luaimai. Nan tuahnak cu an òhalo tuk hringhran i nan tuahmi thil cu fih an nung tuk hringhran. Nan ram cu òiaotakmi hmun pakpalawng ah a cang i nihin i a si ko rih bantuk hin tuksapur le nihsawh awk, ahohmanh um lonak hmun a si ko rih.
23 Nannih nih hi raithawinak kha nan khangh hna i Bawipa cungah nan sual i Bawipa cu a nawl nan ngai lo i phungbia le a nawlbia le cawnpiaknak kha nan zulh lo caah, hi harnak hi nan cungah a tlung,’ ” tiah a ti.
24 Jeremiah nih mi vialte le nu vialte hna cu a thawh òhan rih hna i, “Judah ram in a ra i Izipt ram ah a ummi vialte, nan dihlak in Bawipa bia hi thei tuah u.
25 Hi bangin Ralkapbu Bawipa, Israel Pathian nih a ti: Nu hna, nan bia le nan tuahnak kha nan zulhter. ‘Kan i kammi, Vancung Khuazingnu sin i raithawinak khangh le a sin i thlet thawinak pekchanh cu kan tlinter lai,’ nan ti. Si ko seh, nan biahrennak cu tlinter u law nan biakamnak cu tuah taktak hna u.
26 Sihmanhsehlaw Judah ram in a ra i Izipt ram ah a ummi vialte hna Bawipa bia hi ngai tuah u. Ka min cu Judah mi hna hmur ah a cuang ti lai lo, tiin keimah nih ka min a nganmi in chiat ka ser cang, tiah Bawipa nih a ti; Izipt ram chungah cun, ‘ Bawipa Pathian a nun bangin,’ ti in chiat an ser ti lai lo.
27 Nan cung i òhatnak tlunter awkah si loin òhat lonak tlunter dingah nannih cu òha tein kan zoh hna, cun Judah ram mi Izipt ram i a ummi vialte nih pakhat hmanh an taan lo tiangin vainam le mangòam in an thi lai.
28 Cun cu tikah cun Judah ram mi Izipt ram i khua a vung sami hna lakah a nung rihmi hna nih khan, aho bia dah a dir, anmah bia maw keimah bia dah, ti kha an hngalh lai.
29 Ka bia nih nan cungah òhat lonak a tlunter khawh lai ti hngalh khawh nakhnga ding caah, nannih cu hi hmun ah hin dantat kan timh hna i cu hmelchunhnak cu hi kan pekmi hna hi a si:
30 Hi bangin Bawipa nih a ti: Judah siangpahrang Zedekiah cu a nunnak thah awkah a kawltu a ral Babilon siangpahrang Nebukhadnezzar sinah ka pek bantuk khan Izipt siangpahrang Faro Hofra cu a ral hna kut chung le a nunnak hrawh awk a kawlmi hna kut chungah khan ka chanh lai,” tiah a ti. Ref 44.30: 2Sia 25.1-7