38
Tikhor Chungin Jeremiah An Chuah
1 Mattan fapa Shefatiah, Pashhur fapa Gedaliah, Shelemiah fapa Jukal le Malkhiah fapa Pashhur nih mizapi sinah Jeremiah nih a chimmi kha an theih. Amah nih a chimhmi hna cu
2 Bawipa nih, “Khua chungah a tangmi cu ral kut in maw mangòam in maw an thi lai. Sihmanhsehlaw a chuak i Khaldi mi hna sinah aa pemi cu an thi lai lo, zeidang an i chuahpi khawh lo hmanh ah an nunnak he tal cun an luat lai,” a ti, ti hi a si.
3 Jeremiah nih annih a rak chimhmi hna cu, Bawipa nih, “Hi khua hi Babilon siangpahrang ralkapbu kut chungah ka pek lai i an lak lai,” a ti, ti a si.
4 Cun bawi hna nih cun siangpahrang sinah cun, “Hi mipa hi thah awk a si, zeicahtiah hi bantukin a chimnak thawng hin ralkap hna le hi khua chung i a tangmi hna hi an lung a derter hna. Hi pa hi mi òhatnak a kawlmi si loin an chiatnak a kawlmi tu a si deuh,” an ti.
5 Siangpahrang Zedekiah nih cun aa thawh i, “Amah cu nan kut chungah a um ko; zeicahtiah nanmah duh lomi cu siangpahrang nih zeihmanh a tuah kho lo,” tiah a ti hna.
6 Cucaah cun Jeremiah cu an lak i ralvennak inntual i a ummi tikhor ah khan an thlak, hri in an vun thlak. Khor chungah cun ti a um lo, nawncek lawng a um i nawncek chungah cun Jeremiah cu a pil.
7 Cun Ethiopia mi, tildit Ebed-melek, siangpahrang innchung i a ummi nih, Jeremiah cu tikhor chungah an thlak ti kha a theih tikah, siangpahrang cu Benjamin Kutka i a òhut lioah khan
8 a va fuh i siangpahrang cu a thawh i,
9 “Siangpahrang ka bawipa, hi mi hna nih profet Jeremiah cung i an tuahmi hi a òha hrimhrim lo. Annih nih khor chungah an hlonh i khua chung i rawl a um ti lo tikah a umnak hmun ah khan rawl òam in a thi lai,” tiah a ti.
10 Khi tikah siangpahrang nih Ethiopia mi Ebed-melek cu nawl a pek i, “Hika hin mi pathum i kalpi hna law profet Jeremiah cu a thih hlan ah tikhor chung cun va hnuk u,” tiah a ti.
11 Cucaah Ebed-melek nih mi cu siangpahrang inn ah cun aa kalpi hna i thilpuan chiahnak khaan i thilpuan tlek òukòak hna le puanchia hlun òukòak hna kha an lak hna i Jeremiah sinah khan khor chungah cun hri in an vun thlak hna.
12 Cun Ethiopia mi Ebed-melek nih cun Jeremiah cu a vun thawh i, “Kha puanchia hna kha na zaktang le hri karlak ah khan rak i danh hna,” tiah a vun ti. Jeremiah nih cun cuticun a tuah.
13 Cun Jeremiah cu hri in an hnuh i tikhor chung cun an chuah. Jeremiah cu ralvennak inntual ah cun a um.
Zedekiah Nih Jeremiah Cu Ruahnak A Hal
14 Siangpahrang Zedekiah nih profet Jeremiah cu a hei cah i Bawipa inn luhnak kutka a pathumnak khan a sinah cun an luhpi. Siangpahrang nih Jeremiah cu a thawh i, “Bia pakhat in kan hal lai, ka sinin zeihmanh thup hlah,” tiah a ti.
15 Jeremiah nih Zedekiah cu, “Ka chim ahcun na ka thah hrimhrim ding a si ko; ruahnak kan cheuh ahcun naa lak duh ding a si fawn lo,” tiah a ti.
16 Cun Siangpahrang Zedekiah nih Jeremiah sinah cun a thli tein chiat a ser i, “Ka nunnak a sertu Bawipa a nun bangin, kan that lai lo i na nunnak hrawh awk a kawlmi hna kut chung zongah kan chan lai lo,” tiah a ti.
17 Khi tikah Jeremiah nih Zedekiah cu, “Hi bangin Bawipa, Ralkapbu Pathian, Israel Pathian nih a ti: Babilon siangpahrang i a bawi hna sinah hin naa pek ahcun na nunnak cu zuah a si lai i hi khua hi mei in khangh a si lai lo, nangmah le na innchungkhar cu nan nung lai.
18 Sihmanhsehlaw Babilon siangpahrang i a bawi hna sinah naa pek lo a si ahcun, hi khua hi Khaldi mi hna kut chungah pek a si lai i an khangh lai i nangmah zong an kut in na luat lai lo,” tiah a ti.
19 Cun Siangpahrang Zedekiah nih cun Jeremiah sinah khan, “Khaldi mi hna sinah a zammi Judah mi kha ka òih hna, zeicahtiah kha hna kut chungah khan Khaldi mi hna nih hin an ka chanh lai i òhalo in an ka tuah sual lai,” tiah a ti.
20 Cun Jeremiah nih, “An in chan lai lo. Kan chimhmi paohpaoh ah hin Bawipa bia na zulh ahcun, nangmah caah a òha dih ko lai i na nunnak kha zuah a si lai.
21 Sihmanhsehlaw i pek kha na duh lo ahcun hihi Bawipa nih a ka hmuhsakmi langhnak cu a si:
22 Zohhmanh Judah siangpahrang inn chungah a tangmi nu vialte hna cu Babilon siangpahrang i a bawi hna sinah kalpi an si lai i annih nih,
Na hawikom lila nih khan
nangmah cu a ping ah
an in hruai i
na caah an òhawng tuk;
Na ke cu nawncek chungah
an pilter i
an in mertak i an in kaltak cang,
an ti lai.
23 Na nupi vialte hna le na fale vialte hna cu Khaldi mi hna sinah hruai an si lai i nangmah hrimhrim zong an kut chungin na luat lai lo. Babilon siangpahrang nih an tlaih lai i hi khua hi mei in a khangh lai,” tiah a ti.
24 Cun Zedekiah nih Jeremiah cu, “Hi bia hi ahohmanh theihter hna hlah, cun na thi lai lo.
25 Bawi hna nih khan nangmah he bia kan i ruah kha an theih i na sinah an rat i an in thawh i, ‘Siangpahrang sinah na chimmi le siangpahrang nih an chimhmi cu kan chim tuah, kan sinin zeihmanh thup hlah law kan in that lai lo,’ an ti ahcun,
26 annih cu na thawh hna lai i, ‘Jonathan inn ah khan ka va thih nakhnga lo, khika ah ka kua òhan ti hlah, tiah siangpahrang cu ka nawl,’ tiah na ti lai,” tiah a ti.
27 Bawi vialte cu Jeremiah sinah cun an ra taktak i bia an hal i siangpahrang nih a chim bantukte khan a leh hna. Annih nih an tuah khawhmi zeihmanh a um lo, zeicahtiah ahohmanh nih bia an i ruah thawng kha a lang in an thei hna lo.
28 Cun Jeremiah cu ralvennak inntual ah cun Jerusalem an lak ni tiang a um. Ref 38.28: Eze 33.21